اااااه يا الامتحانات .. و ما أدراك ما الامتحانات!

السلام عليكم

أكيد كل وحدة منكم تخرجت من المدرسه أو بعدها ما اتخرجت
و أكيد الكل امتحن في المدرسه
و مستحيل محد مر بموقف في الامتحانات

قبل كل شي خلوني أقولكم موقفي

السنة اللي طافت، كنت في الصف السابع، و كانت فترة الامتحانات، و لأن جدولي تقريباً مثل جدول إختي، قريت جدول امتحاناتي مرة وحدة بس

و في يوم من أيام الامتحانات، إماية يت عندي يوم كنت ألعب ع النت
و قات: حصة، شو امتحانج باجر؟
قلت: إماية، ماث (رياضيات)
قالت: متأكده
قلت: هيه هيه
قالت: انزين، ليش ما تقومين تذاكرين
قلت: ذاكرت و خلصت (جذب) و اللحين يالسة آخذ بريك بعدين براجع
قالت: اوكي، بس لا تطولين ع النت
قلت إن شاء الله

لعبت لين ما قلت بس، عقب سرت أجوف التلفزيون
و قبل العشى، إماية قالتلي إنها بتسويلي مراجعه
فسرت و قريت كل قانون ع السريع و سوتلي مراجعه
و أجوبتي كانت معظمها صح <<< جوفوا ذكائي

في اليوم الثاني، في السياره
كنت أراجع شوي القوانين و بعظ الأسئلة اللي أخطأت فيها في المراجعه
و يوم وصلنا المدرسه، سرت فوق عند قسم الاعدادية و أنا مستعده ويا قلمي الأزرق
و كان باقي 10 دقايق ع الامتحان فسرت عند شلتي عشان نراجع <<< العكس، قصدي نسولف و نحش في الناس
بس أنا تفاجأت يوم جفت كل شلتي ماسكين في ايدهم كتاب التاريخ و التربية الوطنية

قلت أكيد كلهم مغلطين و دارسين المادة الغلط
بس مستحيل كلهم، فقالتلي ربيعتي شيما: حصة، نحن علينا امتحان تاريخ و تربية وطنية ماث
قلت: لا، ماث، إنت مغلطه
قالت: حصة، سيري اقري جدول الامتحانات صح، شو بلاج مدوخه
سرت و قريت جدول الامتحانات و كان كلام شيما صح

فأول شي قلت حق شيوم: عطيني موبايلج بسرعه
شيوم: اندوج

خذت موبايلها و سويت حق إماية تلفون و قلتلها: وين إنت
قالت: تونا ظاهرين من المدرسه
قلتلها: ردوا بسرعه
قالت: انزين، مصطفى رجع ورى عند المدرسه (تكلم الدريول)

ركضت مع شيما تحت عند إماية و قلتلها السالفه و تمت تعطيني محاضرة و أنا أسمع و عيوني تدمع و ويهي احمر و منزلة راسي، بعدين إماية رأفت لحالي و سارت ويايا عند مديرة قسمنا و قالتلها السالفة و أنا كنت أصيح، اللي يجوفني غصباً عنه يشفق قلبه عليه

قالت المديرة: حصة، إنت طالبة ممتازة عدنا، و نحن بنعطيج فرصة ساعة تدرسين عشان وقت الامتحان ساعة و نص، و نص ساعة عشان تحلين الامتحان
أنا هزيت راسي موافقة و خذت كتاب شيما و شيما سارت تسوي الامتحان

سرت أدرس في حجرة فاظية، مع ذلك كانت عيوني تدمع، و درست و خلصت و راجعت في 45 دقيقة بس

سرت عند المديرة و خذت منها كلينكس و قلتلها إني درست زين
فودتني صف الامتحان و عطتني ورقة و حليت الامتحان في ربع ساعة بس

و يوم طلعت من الامتحان عقب نص ساعه، قلت حق شيما شو استوالي

و يوم ركبت السياره، كانت إماية مستعده تعطيني محاضره بس يوم جافت شكلي حن قلبها علي و بدت تهديني و تقولي: ماعليه، خيرها في غيرها، يالله، أهم شي إنج سويت الامتحان

سرت بيت يدتي لأني كنت تعبانه شوي، و رقدت من الساعه 10:00 الصبح لين الساعه 2:15 الظهر عقب سرت الصالة و كان الكل متيمع عشان الغدى

قلتلهم السالفة و كان حلجي يعورني و كنت بموت من البرد
فيدتي حطت ايدها ع راسي و قالت: الحص، شعنه ما تقولين إنج محمومه، واعليه، كله من هاي المدرسه، و بدت تدعي على المدرسه و المديرة و كل حد حتى الناطور <<< ماعرف شو دخل الناطور في السالفة

أكلتني يدو غدى و عطتني كل أنواع المشروبات اللي يسونها في البيت مثل الحلول و الماي و الليمون و واااااايد أشياء

و غبت اليوم الثاني من المدرسه لأني كنت مريضة

اااااااااه، تعبت و أنا أكتب

اللحين، كل وحده دخلت و قرت الموضوع، لازم تسوي على الأقل شيء من هالأشياء:
** تسلم
** تعلق
** تظحك
** تذكر موقف استوالها في الامتحانات

يلا جااااااو