ااه مقهوره حسبي الله ونعم الوكيل

السلام عليكم
كيفكم ياحلا حوائيات
راح ابدا بالموضوع دوغري لان مالي بالمقدمات .
طبعا سويت هالمعرف عشان هالمشكله

لان معرفي القديم كلن يعرفه خواتي وزوجات اخواني وخوات زوجي صعبه اكتب فيه

المهم يابنات انا مقهوووره من زوجي صار لنا ٨ سنوات متزوجين واخذته وانا صغيره بالعمر وهو كبير

اول شي راح اتكلم عن زوجي
طيب وحنون ومايرفض لي طلب لو ايش اطلب مايقصر الا اذا ماله حيله

يحبني ومتاكده من حبه لي طبعا الافعال تبين الحب ويعشق اولاده حد الجنون
عندي ثلاث اولاد الله يخليهم لي ويخلي لكم اولادكم
كل يوم يطلعنا ويمشينا ولا عمره مد ايده علي ويحترمني ويقدرني

طبعا هذي ايجابياته


سلبياته اشياء عاديه ماتذكر ..

وحياتنا مستقره ولله الحمد ولا تخلو من المشاكل والمشادات العائليه يعني اي اثنين لابد تصير بينهم مشاكل بس بسيطه وتنحل

المهم سلمكن الله بعمري كله طول هاالثمان سنين ماشفت منه خيانات لا مكالمات ولا رسايل كان جواله مفتوح ويخليه عندي اربع وعشرين ساعه عادي

قبل شهرين اخذت التويتر حقه بدون لايدري لانه فاتح حساب جديد ولا قالي عليه وانا ماسالته عنه ولا ابي اعرفه لاني عارفه الحساب قبل بدون لايدري
المهم رحت سويت حساب وضفته عندي وتحرشت فيه بالكلام طبعا بشوف عنه جلست اتكلم معه واهو يتكلم عادي كانه يخاطب واحد من اصحابه قلت انا عندي بنت ومتزوجه وتسذا. وانت قال انا عندي ثلاث اولاد اسمائهم تسذا وتسذا وجلست اسولف معه وهو يرد ويسولف المهم جبت طاري زوجته اللي هي انا قلت له شكلك دامك داخل هنا منحاش من حرمتك قال لا والله عادي قلت ماجربت تحب من هنا بشوف عنه قال ولا فكرت قلت الحب حلو وتسذا قال ايه حلو وبعدين سولفنا بالحب وقلت حب الطفوله وماقبل الزواج انا جالسه استدرجه هو قال زمان حبيت وحده قبل اتزوج بس ماصار نصيب هي تزوجت.. انقهرت بس قلت ماعليه كل الشباب يمرون بهالفتره وانا يوم كان مراهق كنت بزر

وسكت قلت شكلك ماتحب حرمتك ذي قال بالعكس هي كل حياتي عاد من بعد كلمته ذي ارتحت وغفرت له كلامه كله قلت اها وسولفت عادي بعدين انقطع ماعاد دخل اول شي اسلم وكيفك وكذا ويرد عادي لين انقطع ماعاد دخل التويتر ..

وسكت انا وقفلت ع الموضوع .. هو حاط رمز سري لجواله ولا قال لي عليه لاني انا حطيت رمز لجوالي ومارضيت اعطيه عشانه يفتحه ويتصفح الواتس ويقرا المحادثات وانا مابيه يقرا رسايل خواتي وخالاتي وصديقاتي قروبات كثيره واحيان سوالف الحريم تفشل وانا انقهرت منه وقفلت جوالي برمز سري ولا علمته وهو راح وقفل جواله بس يفتحه عندي ويحسبني ماشوفه ولقطته هههههه وصرت كل بين فتره وفتره افتح جواله واشوف شفيه وهو مايدري طبعا


المهم قبل كم يوم رحت فتحت جواله وزي العاده مافيه شي ومادري شلون رحت للمذكرات الصوتيه التسجيلات يعني وافتحه والقى مقطع طويل وسمعته وليتني ماسمعته بقول لكم شنو سمعت بس اول بعلمكم زوجي وين يشتغل

زوجي يشتغل بالسجون بمحافطة من محافظات القصيم

المهم فتحت التسجيل اول شي اسمع مشي كانو يمشي وبعدين سمعتو يدق الباب وسمعت صوت حرمه قالت مين قال انا افتحي شفيك خايفه قالت طيب وفتحت الباب واعطاها اغراض او شي مادري ايش وقال لها عطيني نظره بس نظره وهي تقول لا لا قال نظره تكفين قالت اقول يلا روح بس ويضحك واهي تضحك وبعدين قال شرايك بالرسايل حلوه !!!! مادري ايش رددت هي قال يلا باي قالت هي بدلع باااي اخ ياقلبي انا هنا ولعت مت من القهر

للعلم البنت ذي سجانه نفس وظيفة زوجي بس بقسم الحريم واضح يعطيها شي للحريم الموجودات
لانه بعدين صار يمشي وراح لقسم الرجال وكانو صوت مفاتيح وفتح الباب ويصوت عليهم يقول فلان وفلان ويعطيهن فلوس من اهلهم .. فلان لك ميه من امك وفلان لك ٣٠٠ كان يقول كذا بعدين طلع من قسم الرجال واسمعو يغني واانقطع التسجيل ..
رحت فتشت بجواله على كل الارقام واحط كل رقم بالنمبر بوك واشوف الاسم ايش يطلع وطلع اسم السجانه ذي من ضمن الارقام
طبعا انا اعرف اسمها من قبل لاني شفت ورقه لها عند زوجي تبع الشغل .. اعرف اسمها واسم ابوها وقبيلتها ورقمها عندي كمان وهي مو كبيره بعمري تقريبا بالعشرينات

ورحت فتشت بمحادثات الواتس حقة اصحابه حصلتو كاتب لواحد سلام كيفك رد صاحبه قال هلا غريبه شكل عندك اخبار

قال زوجي: اخبار مثل شنو

قال صاحبه :مادري

قال اخبار عن فلانه هاه وحط فيس يغمز ( ذكر اسمها بدلع )

ضحك خويه قال ايه
قال مادري عنها

تكلمو بعدين قال صاحبه انا لو ابي اشبكها شبكتها بس هي فضيحه تفضحنا واخاف تنشب لي تتدور الزواج وضحك زوجي قال تزوجها
قال لا يرحم والديك وبعدين انقطع الحوار

زوجي يوم قال مادري عنها معقوله مايكلمها ورقمها عنده ؟

وبعدين التسجيل قبل شهر وشكل زوجي ماشافه او نساه وشكله مسجل الصوت عشان اصحابه يمكن يبي يسمعهم او انه مانتبه للتسجيل

كلامي مخربط بس قسم مقهوووره
محتاره بنات وش اقول له انا ماودي ابين له اللحين ودي يتطمن واشوف جواله واشوف المستجدات لاني لو واجهته راح ينكر ويقفل جواله

ويغير الرمز ..التسجيل لين اليوم ذا موجود بجوال زوجي مادري افكر اسجل الصوت عندي كدليل
فكرت اكلم البنت واهددها باخوانها واقول ذا التسجيل صوتك وصوت زوجي وبرسله ع مدير السجن وبافضحك بس خفت
مو من زوجي لا والله ماعلي منه زوجي مستعده اواجها واغسل شراعها وهو ماراح يتكلم الا بينطم والمصيبه افتش الجوال كله ماحصل مخادثه لها بعكس محادثات اصحابه كلام يفشل ومخليه اول كان جواله بدون رمز كان يمسح محادثات اصحابه اللحين مخليه
انا خايفه انها صارت بينهم علاقه قبل شهر وانتهت واخاف افتح الموضوع من جديد قلت بشوف وبفتش لين القى دليل ثاني انهم للحين مع بعض
محتاره بنات وعقلي مشوش مادري وش اسوي افكر اروح لاهلي وافكر افضحه عندهم واغسل شراعه وافكر افضح البنت ذي الف فكره وفكره بغقلي من يوم شفت للتسجيل لا ليلي ليل ولا نهاري نهار ضايقه فيني الوسيعه حتى هو ملاحظ بس مايدري شفيني

والله اتوقع لو احصل صدمه ثانيه ماراح اقدر اكمل معه احس نفسي واقفه عنه

حسبي الله ونعم الوكيل