ابغى اسوي مفاجأه لولدي بمناسبة العيد ساااااعدوني والله لادعيلكم

حبيبتي لا تزعلي والله الرجال اغلبهم كذا نكد انتي شوفي انا عندي افكار خنفشارية اسويها لعيالي لمن ابغا افرحهم
ترى الاطفال كلمة حفلة لوحدها تفرحهم
بس لا تضحكي على افكاري اهم شي انها تنجح مع الصغار انا مجربتها :22:
اول فكرة
انا عندي ستين نوع حفلات فجأة اقوم اقول مين يبغا حفلة اندوميييييييييييييييييييييي
يطيرو من الفرح اقوم اسوي اندومي يختي واحطها في الصحن وجنبها بيضة مقلية وجنبها شوي بزاليا واحط تحتها مناديل وشوية شموع ونطفي الانوار ونغني وننقز وبعدين نقعد ناكل حفلة الاندومي وحتى بوريكي حفلة الاندومي اللي سويتها الاسبوع اللي فات هع هع

وربي انهم يفرحو كانه حفلة منجد الله يحفظهم
ماشاء الله تبارك الله

دحين الفكرة اللي حيقوم ولدك يلقى العيد يارب يحفظه لكي

انا قد سويتها وربي انو لمن شفت الفرحة في عيونهم نسيت التعب

جبت اكياس بلونات وقعدت انفخ فيها انفخ وانفخ الين انتفخت لوزي انا ههههههههه لانه ما عندي اللي ينفخ البلالين
نفخت يمكن 200 بلونة انا واخواتي ننفخ ونعبيها فاكياس زبالة الله يكرمك ونخبيها في البلكونة
ومن كسلي لا اروح اشتري قليتر من المكتبة رحت من المطبخ خلطت شوية موية ودقيق هذا كان الغرا
وجبت البودرة اللمعة حقت الميك اب حقي اللي الوانها غبية وما احبها ومسكت كم بلونة امسحها بالغرا اللي سويته وارشها بالغليتر وعلقتها بخيط الين ما نشفت

وكم حبة كتبت فيها اسم ولدي عبودي ما كان لسة يقرا بس يعرف اسمه ويفتخر مرة لمن يشوف اسمه مكتوب

وقصقصت من مجلة ميكي الصور الحلوة لميكي والشخصيات اللي يحبهم ولصقتهم باللصق في كل مكان ولبنتي اميرات ديزني

وجبت فرو وقصقصته وعملت فيه اشكال زي الارانب والقطط الاشياء اللي عيالي يحبوها لا تسئليني عن مصدر الفرو<<<ما تبغا تعترف انه كان عندها قميص نوم شكله مو حلو بفرو ومركون من سنين ههههههههههه

ليش الاشياء كلها توليف ؟؟؟لانه فجأة صنفتلي اسوي لعيالي حفلة لانهم كانو منكدين

وجبت صورهم لصقتها على كم بلونة وربطت البلونات اللي بالقليتر بخيوط وعلقتها في السقف طبعا حوست حوسة الين ثبتت

والبلونات اللي فيها صورهم كمان علقتها

المهم جبت شموع وشريط اغاني فرايحي حق الاطفال من اول عندي حق انا فروحة حلوة واخوي عبودي بلوة طلعته من الارشيف هههههههههههههههه

المهم لمن كنت اسوي غرفتهم صرفتهم عند الجيران وناديتهم قلتلهم يللا نوم
دخلو غرفتهم واخواتي كانو متخبيين ولابسين طرابيش عملناها من مجلة ميكي الله يبارك فيها خخخخخخخخخخ
وشغلنا الشريط وشوفي الفرحة في عيونهم فرحت انا بكبري
وكمان عشان تكون حفلة قمة في التلفيق والتوليف كلمت البقالة جاب شبسات وشوكلاتات وعصيرات ووووالزي منه

الفكرة التالتة

هذي الفكرة سويتها قبل لا اغير غرفة ولدي لانه كان لوحده لسة ما جبت بنتي فلمن جات راما وقدها غرفة عبودي قديمة وبويتها معدومة قلت يللا خليني افرحهم قبل لا اغير الغرفة

الغرفة كانت سماوي وكان فيها سرير ولدي وسرير صغير حق بنتي
كل اللي جبته كان بخاخ اصفر وورق جدران ازرق واصفر وطقم لحاف اصفر وازرق
وانا من اول عندي بوية صغييرة لونها ازرق اشتريتها من ايكيا عشان اسوي طاولة وما سويتها ورخيصة مرة اعتقد كم وعشرين اذا ما خاب ظني
جبت كرتون فرغته على شكل نجمة لانه اياميها ولدي دوبه اتعلم يرسم النجمة وفرحان فيها
وركبت الحزام وبالبخاخ المكان اللي تحت الحزام سرت امشي مسافة واحط الكرتون وابخ في الفراغ اشيله سار عندي نجمة صفرا
واتعمد احطها على مكان البقع عشان اخبيها
طبعا زوجي كان يتريق عليا ويقلولي ما تبطلي الجنان حقك بس ما عليا منه هههههههههههه
وسويت نجوم صغار كمان

وجبت البوية كانت طاولته معدومه صبغتها ازرق وفي النص حطيت نجمة كبيرة

والستارة خليتها بس اضفت عليها شرايط صفرا
اشتريت لحاف لسرير ولدي ولحاف حق سرير الطفل لبنتي نفس الشكل لونه اصفر وفيه دباديب سماوي مرة كان رخيص لانه انا عارفة انه مؤقت مو هامني يكون كشخة وكمان في النهاية لحاف رح يفيدني احطه مع اللحف

وفرشت السرر ابجورة ولدي كانت قدها معوقة مسكينة رحت عملتلها ترميمات وطلعت حلوة ورتبت الدباديب في الغرفة
وجبت عندي فازة مدورة حقت السمكة مرفوعة في المطبخ فاضية جبتها حطيت جوتها حجار اللي زي اللب الازرق واخدت سمكة من الحوض اللي في الص**** عندي وحطيتها على الطاولة حقته

جبت اللابتوب شغلت صوت موية

عطرت الغرفة وقلت لزوجي يللا روح جيب امي وعيالي اللي كنت مصرفتهم عندها والله والله فرحة في حياتي ما شفت زيها
حتى امي واخواتي انجنو على شكل الغرفة مع انها قديمة لكن صراحة عجبتني

الفكرة الرابعة واسهل فكرة واحلى فكرة
ابدئي من اليوم اشتري زين وبلونات واشتريله هدية لكن للصغار الهدايا مو بالكيف لا هي بالكم يحسبوها غلط مساكين جييله هدية بالف ما رح يفرح زي لو جبتيله 10 هدايا ب100
يعني جيبيله هديتين ثلاثة والاولاد سهلين كم قربوعة على كم سيارة اديتي الواجب وزيادة
وهو نايم زيني غرفته وجيبي اي طاولة من برا حطي عليها الهدايا
وحطي حوالينها زبرقة واشياء ملونة واشياء تلمع
وبس رح يقوم من النوم ويطير فرح جا العيد :42:

اختي بالنسبة لزوجك لا يحس انك متنكدة بسببه احيانا الرجال يزيدو النكد اذا شافو انه خلا الوحدة مكتأبة وصدقيني انا شعاري في الحياة زعلي ودموعي اغلى من اني اصرفها عشان رجال صح انهم غاليين بس اذا بدئو في النكد لاااااااااا والف لا اسمح للنكد هذا يئثر عليا
والله انا طريقتي واللي دايما تنجح اول ما اشوف بوادر النكد من اساسه ما اجلس عنده اروح اخد بنتي اقولها يللة نسوي حفلة مصرية
ونروح افرق شعري وشعرها ونربط ايشاربات والبس ولدي طربوش ونحط انا وبنتي ارواج حمرا ونقعد انا وعيالي نحتفل حفلة مصرية الين غصبن عنه يسير يضحك ويقول انتي وعيالم مجانين ههههههههههههه

ومرات نعمل حفلة عجينة اروح المطبخ واعمل عجينة ملح اللي هي مععروفة كاسة ملح وكاسة دقيق ونفرش ارض المطبخ كها سفر ونقعد نعجن وكل واحد يتفنن واشي اخطبوط واشي وحش وكل واحد ارص الاعمال الفنية حقتهم في صينية ولمن يخلصو ادخلها الفرن تجمد تسير زي الحجار اطلعها واجيب التلاوين بعد ما تبرد يلونو الوحوش حقتهم
وبعدين احط لكل واحد صحن كبير ارض اعماله الفنية واكون بالعجينة عاملة كورة واغرز في نصها عود حق الشوي كبير او شوكة والصق فيها صورهم وكل صورة حولها اعمالهم الفنية الله لا يوريكي اشكال تفجع واحطها في غرفة الجلوس ويكونو مرة مفتخرين بنفسهم وكل ما جا احد يستعرضو بالفن حقهم

المهم لا تخلي الزعل يسيطر عليكي الين ما تحلي مشاكلك مع زوجك وترجعو سمن على عسل ان شاء الله اهم شي لا يشوفك حزينة ومكسورة بسببه وكمان عيالك لهم عليكي حق والام الحزينة اطفالها يكونو جدا تعيسين