السلام عليكم
اولا : الله يرحم والدك و يجعله في فسيح جناته .
ثانيا : الاخوات جزاهم الله خير قالوا عدة نقاط مهمة رح ااكد عليها هنا :
1- انا هنا قاعدة احاول اعطيكي استشارة عامة و لكن لا تكتفي فيها ؛ يفضل تروحي لمحامي او محامية في مدينتك و تجيبي معاكي جميع الاوراق و الاثباتات اللي عندك و تطلعيه على كافة التفاصيل و الوقائع و التواريخ بالزبط .. مبدئيا اطلبي استشارته في البداية لين ما تفهموا راسكم من رجلكم (مع الاخذ بالاعتبار ان الاستشارة ليست مجانية)
بعدين تعملوله وكالة يترافع عنكم او تترافعي انتي بنفسك عن امك و اخواتك .. لان المحامين في قضايا الميراث و التركات ياخذوا اتعاب عالية بطبيعة الحال (احيانا توصل ل10% من مبلغ التركة) بس حتستفيدوا انه حيحل لكم تعقيدات الموضوع باذن الله .
2- مو واضح من كلامك هل تم اتخاذ الاجراءات النظامية الأولية بعد وفاة والدك الله يرحمه ؟ يعني بعد ما طلعتوا شهادة الوفاة هل رحتوا المحكمة و طلعتوا صك حصر الورثة و بعده حصر التركة ؟ لو كنتوا ما عملتوا هالخطوات ضروري جدا تعملوها .. لانو لازم تعرفوا مبدئيا مين هم الورثة ، فيه في موقع وزارة العدل طريقة لحساب الميراث و من هم الورثة حيساعدكم انشالله .
3- اللي عملتوه بانكم استمريتوا تسحبوا من حساب المتوفي غلط .. لان هذي الفلوس بطلت امواله الشخصية او اموال كذا مشتركة بينكم .. صارت تركة لكل واحد منكم فيها نصيب مفروض مقدر شرعا ..
4- لازم تعرفوا من البنك هذي الحوالات متى صارت ؟ هل تمت على دفعات ؟ هل تمت قبل وفاة الوالد ام بعدها ؟ .. اللي عملته اختك ( سواء باقناع والدك الله يرحمه بتحويل الفلوس لها لحرمانكم او لحرمان ورثة غيركم او بقيامها بالتحويل بنفسها و استغلال مرض ابوكي هو شي غير نظامي و غير قانوني ابدا ابدا و لا احد يقنعكم بالعكس ... و حتى لو قالت ان ابوكم اوصى لها فيها فهذا لا يجوز لانه في قاعدة معروفة و هي "لا وصية لوارث" .. كل شخص ياخذ نصيبه الشرعي المقدر له لا اكثر و لا اقل ..
5- شرعا فيه قواعد فقهية زي (لا ضرر و ضرار) و فيه ايه في موضوع المواريث زي
( مِنْ بَعْدِ وَصِيَّةٍ يُوصَى بِهَا أَوْ دَيْنٍ غَيْرَ مُضَارٍّ وَصِيَّةً مِنَ اللَّهِ وَاللَّهُ عَلِيمٌ حَلِيمٌ ) .. لذلك شرعا و قانونا ما يجوز للمورث قبل وفاته انه يخص بعض من اولاده بالميراث دون الاخرين .. كمان مايجوز له يحول بيته لوقف مثلا بقصد حرمانهم من الميراث .. او يطلق زوجته في مرض الموت بقصد حرمانها من الميراث .. و الامثلة كثيرة .. فالشاهد من كلامي : هذا كله يعد اضرار نهت عنه الشريعه و منعه القانون .. ف حتى لو ادعت الاخت ان ابوكي وهبها هذا المال في مرض وفاته كمكافأة على برها فهذا الكلام غير مبرر ابدا و غير نظامي و ما حتأيدها المحكمة ابدا .
6- القانون في صفكم و اتمنى تتوجهوا لمحامي و ترفعوا دعوى في اسرع وقت ؛ لان قضايا الميراث و التركات كل ما طولت كل ما اتعقدت اكثر و اناكلت الحقوق فيها ..
السلام عليكم
اولا : الله يرحم والدك و يجعله في فسيح جناته .
ثانيا : الاخوات جزاهم الله خير...
هل عملت في بنك حضرتك
هل استدعوك قبل كذا
اذا لا
لا تفتين
والموضوع خذرفة من رأسها يا بنت الحلال