اتخنقت

السلام عليكم ورحمة الله وبركاته
الموضوع ببساطة شديدة زى ماهو واضح من العنوان .. انا اتخنقت ومش عارفه اعمل ايه .. او عارفه بس مش عارفه انفذ .. هو علشان ماطولش عليكم انا نفسى انحف ومش عارفه .. تعبت من نفسى .. انا مش ممكن اكون طبيعيه ابدا .. انا حتى كتبت قبل كده للاخصائية النفسيه هنا فى المنتدى لكن مامن مجيب .. حتى لو جاوبونى هايعملولى ايه .. الموضوع كله فى ايدي .. وانا وحدى اللى اقدر اتخذ القرار
باكل بطريقه مش طبيعيه .. طول النهار اكل اكل لما قرفت من نفسى .. والمهم ان ممكن اكون مش عاوزه اكل من الاكل ده لكن .. مش عارفه زى ماكون باحوش او بادخر للى مايعرفوا اللهجة المصريه .. يعنى ممكن يكون صنف اكل امامى وانا اصلا لا اشتهيه .. لكن بتجينى رغبه قويه انى افسد الريجيم وكانى بانتقم من نفسى .. والله مش عارفه اقول ايه .. بس انا باكتب وانا منهاره .. انا قرفت من نفسى .. والموضوع ده بياثر على كل حاجه تانيه فى حياتى .. كل نظام حياتى بيفسد .. باشعر بكده حتى فى الصلاه والعباده .. فى علاقاتى مع الناس .. بحس انى مش طايقه اكلم حد .. انا مش متزوجه لكنى مخطوبه .. وزفافى كمان شهرين باذن الله .. يعنى المفروض يكون عندى دافع قوى .. بس حاسه انى مضروبه على راسى ..
اشكركم يابنات لمجرد قراءة موضوعى .. واشكركم اذا رديتم على .. انا حبيت افضفض معاكم