اتمنى مساعدتكم وافكاركم في عزيمة عشا بناتيه

مادام العزيمة بناتي ليه ما تغيري النمط المعتاد شوي ....
مثلا اول ما يجوك (طبعا كل وحده بتجيك بوقت )تكونين انت محضره عصير في البيت مثلا شمبانيا سعودي وتصبيه في علبه زجاج كبيره شكله مره حلو فيه ،تلاقيهم في محلات العود والهايبر ماركت،وتحطينه في صينيه فيها ثلج علشان مايصير حار،وكل من تجي تصبين لها...
واذا اجتمعوا قدمي لهم كابتشينو وقهوة تركي مع موس وتشيز كيك وكيك طبعا كلها من اللي تجي صغيره...
بعدين قدمي شاي ونعناع (ممكن تخلي مويه حاره في براد وجهزي في علبه خشب جنبها انواع الشاي والنعناع والشاي الاخضر ،فيه في ماري نون اشكال روعه ..مكعبات وقلوب)وقدمي معاها اطباق طويله مثلا.. سبرنغ رول ،كبه، فطاير، تبوله ،واللي تعرفين انها اصناف تعجبهم..وكل وحده هيلب هير سيلف...
وممكن بعد مايخلصو تجيبي ايسكريم...
احس كذا بيكون فيه وقت اكثر تقعدوا مع بعض ...وترتاحي من الروحه والجيه والتلزيم عليهم ...
اذا اعجبتك الفكره قولي لي اعطيك المقادير...


ولاتنسين اعزمينا....

مشكوورة قلبي .. اللهي جزاك الفردووس ..

اعجبتني فكره الشمبانياا .. بس حلو طعمه ماقد ذقته !

وش مقاديره تكفين ..

وفكرة التقديم اللي قلتي عليهاا حلوة لو كانت الجيه بين العشااوين .. بس جيتهم عزيمة عشاا ..

انا بصلح بوفيه ..

بس ودي تقديم القهوه وش احط معه ؟

وغير كذا ودجي ااجر نافورة الشكولا .. مدري وين ممكن احصلهاا ؟؟ ووش احط معها غير الفراواله والمارشيلمو ..

اهلين اختي...ابطفشك مني بس والله لاني احب هالحركات ولي مزاج فيها ..
الشمبانيا كوكتيل مقاديرها سهله وهي ...(قارورة عصير تفاح +علبة سفن اب او مياه بيريه)تحطينهم في اناء التقديم وتقطعي عليهم كم ورقة نعناع طازه وكوب عنب اسود بدون تقطيع وتفاحه تقطعيها ارباع بعدين شرايح رفيعه وليمونه برضه شرايح وبرتقاله كمان شرايح ...وتخليه ساعه في الثلاجه قبل التقديم علشان يمتزج الطعم...وبعدين تصبينه وتشيلي من الفاكهه بالملقط تضيفيها بالكاس....وثلج


القهوه ..اختي ماحددتي تبين من اليت ولا اوصف لك اشياء من المحلات ...بس ممكن تجيبي علب من عند الحلاب ولا جهينه وتعبيها حلويات (بقلاوه ،عش البلبل،كنافه واحسن شئ القباني جرير )..ممكن تشوفي ماري نون في الثلاثين عندهم انواع حلى القهوه وصلاحيتها شهر كامل اشكالها غريبه مرسوم عليها كوب قهوه وحركات وتزينهم للصواني ابداع واحسن تسوي طلبيه قبل عندهم لان اغلب الاشكال الحلوه موجوده بالكاتلوج عندهم ومو عارضينها..ومري تمور الصالحيه عندهم انواع مره لذيذه ولا تدرين من ايش متكونه بس اشكالها عاديه....اذا تبين وصفات حلى بيت آمري....


بالنسبةللنافوره تلقينها عند محلات تجهيز الحفلات ومحلات الفطاير بس اذا بتستخدميها دايم فيه اماكن تبيع انواع رخيصه (عن السدحان ب140 ريال) وقدميها مع اناناس تكوني قاصه قاعدته علشان يثبت وجيبي اعواد الشوي غرزي فيها مارشمالو وفراوله وحلاو السمسم (القديم اللي يجي الواح لصقيه بشوي كراميل على العود) وكانشو وانواع بسكويت اللي تحبين ولصقيها بنفس الطريقه....
اتذكر وارجع ازعجك...

ما شاء الله عليك اختى ارحمنى يا رب .. اقول تجين ترتبين لى عزيمه !!! انا مالى خلق هالشغلات ابد ابد ...

ارحمني يارب ماشاء الله عليك