السلام عليكم ورحمة الله وبركاته
حياكم الله يا الغاليات في موضوعي الخاص بالمسابقة ...واللي فيه بنشر غسيلي ....>>> وترى الكوي عليييكم ....هههههه
في البداية اشكر المشرفات ...اللي اسعدونا بالمسابقة.... واللي اثروا فيها قسم الترفيه....
واخص بالشكرالاخت - سكاااايب – ...واسأل الله ان يجزاهم عنا خير الجزاااء ....
المواقف اللي مرت علي كثيرة....بس انا مضطرة اختار من بينها ..والا كان ما خلصنا ..
*** الموقف الاول ***
الموقف هذا حصل في اول يوم دراسي لي بالمدرسة .... باول ابتدائي..
في هاليوم الظاهر ان طموحي كان فووووق... في العلالي ..وماكنت فاهمة ان النجاح خطوة خطوة ...
لا كنت ابي اتخرج من الابتدائي بسنة وحده بس ...خخخخخخ ؟؟؟
بأول يوم لبست مريولي واخذت شنطتي ... ورحت المدرسة مع اختي اللي كانت بخامس ابتدائي...وكانوا اهلي.. موصينها علي ...
يوم دخلنا المدرسة ...اخذتني اختي وودتني عند الابلة المسئولة عن الطالبات الجديدات....وراحت وخلتني ...ما شفت الا غبرتها ...
طبعا هي مستعجلة تبي تشوووف صديقاتها....وانا جلست بمكاني مدري وش الطبخة.....شوي الا اسمع صافرة الإنذااار ..>>>اقصد الجرس ...
واتروع وش فيه...الا ابلتي تقول يله يا بنات على الطوابير ...ويمشون البنات وراها.. وانا معاهم ...>>> مع الخيل يا شقرا...
و نمشى الى ان وصلنا للطوابير...وكان طبعا كل فصل له طابور خاص فيه ...ووقفتنا الابلة في طابورنا منظمين وش ملحنا...
المهم ...خلصوا الاذاعة والمقدمات ....وبدت حركة الطوابير ...مشى طابورى ...وانا مفهية امشي واطالع يمين ويسار ...
يوم وصلنا الدرج بنطلع فوق لفصولنا ...الا ويدخل علينا طابور فصل سادس ......واختلط الحابل بالنابل ..>>اسمع بالمثل..
وصار فيه اشتباك بين الطابورين ...>>> حشى صارت معركة ...هههههه ..عاد انا ضيعت....واروح امشي مع سادس ..ووراهم وراهم إلى أن وصلوا فصلهم ...
ويدخلون فصلهم وانا وراهم ...ويجلسون على كراسيهم وانا معاهم ....>>> واثقة الاخت من نفسها .....
وهم يطالعون فيني باستغراب وانا ماسكة الكرسي والطاولة ..>>> احسبهم ناوين عليها ..ههههاااي
هم ما هموني بالبداية ...بس كنت مستغربة ليش هم جالسين على كراسيهم ورجولهم توصل بالارض وانا لا ..>>>؟؟
حاولت اوصل رجولي للارض ..عجزت كل شوي اطيح وارجع اطلع على الكرسي ...>>> هم يشوفون محاولاتي و يضحكون .علي....والكرسي طبعا كان كبييييير علي....
كل هذا ولا فهمت انهم اكبر مني ..واني داخلة فصل مو فصلي...كل اللي همني المكان لا يروح علي... >>>الله من الغباء
.المهم جلست اكمل محاولاتي اني اوصل للارض برجلي زيهم ....واثناء ذلك الا اشوف عند الباب ...ابلتي اللي حطتني اختي عندها ...اثر البنات راحوا علموا الادارة ..اكيد قالوا تعالو شوفي البزر اللي عندنا...
الابله كانت معصبه مرة...وتطالعني بطريقة تخوف..وهي كانت ضخمة ودبى ..>>> يعني مرعبه ...
نادتني واخذتني من يدي وتسحب فيني وانا اسحب شنطتي ...والله يا بنات اني امشي فوق الارض من سرعتها وتسحيبها لي....
إلى أن وصلنا لفصلي ..دخلتني وقالت اجلسي هنا هذا فصلك وش موديك سادس ..>>> معصبة لها ساعة تدور علي..خافت من المسئولية.....ههههههه
عاد انا يوم دخلت الفصل ...جلست بمكان لقيته فاضي ...>>>> وكانت فرحتى لا توصف والابتسامة شاقة وجهي... ..تدرون ليش
لانه اخيرا لقيت كرسي قدي...وارجولي بتوصل الارض زي اللي بساااادس ....خخخخخ
----------******---------*******------------******-------------
*** الموقف الثاني ***
صااار بايام المتوسط ....كان فيه وحدة من البنات ...راعية مشاكل ..وكنت دايم ما
اسكت لها ارد عليها ....لا وبعد افزع لصديقاتي اذا سوت لهم شي...>>> شديده وراعية فزعاااات ..
البنت هذي كانت كريهة بمعني الكلمة....ولسانها طويييييل .. ...>>> يمكن يجي خمسة كيلوووو.....خخخخخ
في مرة تهاوشت هالبنت مع صديقتي ...وانا وباقي الشلة كنا جالسين بحوش المدرسة الخارجي...مسوين حلقة
جت صديقتي عندنا... والبنت وشلتها وراها ...يتكلمون عليها...وصلت عندنا وهم يترادون ....قربت البنت من عندنا وجت فوق راسي بالضبط...
وجلست تسب كعادتها .....وهي في ثورة هيجانها ...قامت ترش علينا من هالسعابيل .....
>>> انا عاد قلت خلينا بدل ما نتهاوش معها نفشلها ونضحك عليها .....>> ...المهم وهي مستمرة في اغراقنا بسعابيلها.... قلت انا للبنات
ابشروا يا بنااات ابشروا بالمطر امطرت ......يله طلعو مظلاتكم ....
قامت قربت مني وقالت وش تقولين ..قمت انا اتكلم كلام فيه حرف الثاء واجد ...واسوي اني اطلع امطار زيها.....خخخخخ....
وهي معصبة وانا ميته ضحك عليها وتقرب تسوي بتخوفني وانا اقرب ...واقول اللهم حولينا ولا علينا ..اللهم على الاكام..وبطون الاودية ....خخخخ>>> دعاء المطر
تفشلت وراحت هي وشلتها....وصار كل من يشوفها ..يقول ..دعاء المطر ..>>> صارت عياره لها ......خخخخخخخ
-------******------********---------*********--------
والمواقف كثيرة .مثل ما قلت لكم ..بس انا بكتفي بهالموقفين...>>>عشان احافظ على برستيجي في المنتدى ...اخاف تغيرون فكرتكم عني ...>>> مسوية مؤدبة...
وان شاء اكون اسعدتكم ....وما كنت ثقيله عليكم .. ..
وسلامتكم .....
والله منتي هينه فشلتي البنت الله يهديك..
على العموم مره ثانيه لا تطالعي فوق ترى تنكسر رقبتك اسم الله عليك..