احذروا اليوكو يا بنات و لا تقولوا ما قلنالكم..دمرني يا بنات

بسم الله الرحمن الرحيم...

يا بنات أحذر أي وحدة تسوي اليوكو...والله يا بنات أكتبلكم هالتحذير و الدموع مغرقة عيني و ما أطلب منكم الا ان تدعولي بأن الله يعوضني بشعري..

يا بنات أنا مسوية اليوكو صارلي تقريبا سنة اذا ما كان أقل..سويته بالمركز الألماني اللي بوظبي..يا بنات حسافة عالبيزات و الوقت و المشوار اللي حطيته بلا فايدة..

أول ما سويته كان روعة لمدة شهرين تقريبا و بعدين اعتفس شعري صار وايد جاف و متقصف و اتبهدل بهدله..أما عن حالته و هو مبلول بالماي فحدث و لا حرج الله لا راواكم يتكسر تقول خيوط أو كأنه مصبوب عليه شحم أو زيت سيارات (يوزك مثل ما نقول بالعامية)...عذبني و أنا أمشطه كل يوم يبيله تمشيط ساعه..أما الشعر اليديد اللي طلع لي أقولكم و هالكلام بذمتي ليوم الدين ..يا بنات الكسرات طلعتلي بشكل فظيع ..شعري ما كان فيه غير ثلاث كسرات و كانت حبته حلوة بس الكسرات اللي كانت متعبتني ..تعالوا شوفوا الشعر اليديد اللي طلعلي من أوله لأخره كسرات و شعري طلع خشن و متلعوز ..شو أقول شو أوصف لأوصف ..ويا اليوم اللي صبغت فيه و يا ليتني ما صبغت..شعري احترق و مات ..تدرون شو مات ..مات يعني انعدم خلاص طاح كله..كله طاح ..صار مشوه ..و مرت حوالي ثلاث اشهر من الصبغ .. ما استحملت شعري كيف صار خشن و مكسر و متقصف و حالته لله..جان اقوم يا بنات و شريت تمليس اللي هو سوفت اند فري و حطيته عشعري ما كملت دقيقه ابي امشطه علشان اوزع الكريم اللي اشوف شعري كله بالمشط...المشط سحب كل شعري ..شعري ذاب بالمشط..خذيت الخصل أشوفهن الا الاقي شعري كله ذايب..وأركض يا بنات عزكم الله عالحمام و أنا ما شاءالله (بعد شو)شعري وايد كثيف و ينات لو تشوفون المنظر بغى يغمى علي من المنظر شعري كله طاح كله كله كله يا بنات كله طاح عدى الشعر اليديد اللي طالع و اللي ما جاسه اليوكو واللي طوله ما يتعدى 10 سم من الفروة.. صرت مينونه حتى خفت أكمل غسيله أو حتى أجيسه..بس أيوده تطيح لي جديلة عبارة عن 200 شعرة تقريبا..شعري طاح ..الحمدلله ريلي ما كان بالبيت هو بالدوام و بيرجع الاربعاء و يا ويلي خصوصا انه ما كان يبيني أسوي اليوكو..أرجع للموضوع ..ما عرفت هاذيج الساعه شو أسوي بعمري و أنا أصيح و الخدامه مدمعه و بناتي يصيحون..على أول تاكسي على أقرب صالون..تجمعن علي كل اللي بالصالون شوي بيصيحون..واللي يشتغلن بالصالون يبون يضربوني عالسويته ..المهم بعد ما شافوا شعري تبين لهم ان بس يمكن 15 سم من شعري كان بحالة سليمه و الباقي لازم ينقص و منعدم لانه خلاص احترق..قصوا شعري يا بنات ..الحين شعري الله لا راواكم منتف نفس الديايه مثل الولد و يا ليته بنفس الطول نتفوه صار بشع و ما ناسبته اي قصة لانه خربان و لازم يقصونه بطريقه غير متساويه بسبت احتراقه و الله يا بنات بموت بموت تعالوا شوفوا شكلي و حالتي منهاره..حطولي زيوت و مساج و قالولي لازم تداومي عالزيوت و المساج علشان يرد يطول..و هذي حكمتك يا رب..

يا بنات رجاء حار لا تلعبون بشعوركم بهالسم..هيه نعم سم يا بنات ..لا تحاولوا تجربوه..حتى و هو ناعم في بدايه الشهور احس ماله روح بس طايح نفس شعور الفلبينيات لا تقدرين تودينه لا يمين و لا شمال؟؟

يا بنات هاي تجربتي و اتمنى تكون عظمة و عبره لكل وحده علما باني سويت هالسم بمركز متخصص و عنده شهادة اليوكو و ها اكبر دليل ان اليوكو اصلا خدعه و زط بيزات سواء كان الاصلي ولا التقليد ...

و أرجوكم لا تنسوني بالدعاء و يا ويلي من ريلي بس يرجع خوفي بس يتزوج الثانية بعد ما يشوف حالتي.