احكي لك واحكي لي ( بلاوينا واحنا صغار)

خلينا نتكلم عن بلاوينا واحنا صغار وعلشان تتشجعوا حبدأ انا. انا لمن كنت صغيرة كنت شقية مرة زي الاولاد ما في شجرة إلا وتلقوني متشعبكة فيها ولا جدر إلا وانا لاصق فيه . تقول امي لمن كنت صغيرة بعد مايروحوا اخواتي للمدرسه ادخل على دولاب الملابس تبعهم والبس فستان فوق فستان فوق فستان فوق فستان واخرج عليها والاكمام تسحب واطراف الفساتين تسحب واقعد ادور حول نفسي فرحانه <<<< عارضة ازياء اسم الله علي
كمان كنت اخذ كل اللبان من دواليب اخواتي واحطها في فمي واخرج من الغرفة فمي مليان من اللبان واختي يلي اصغر مني ورايه تبكي علشان ما اعطيتها لبان وتقول امي ليه ما تعطيها وانا ما اقدر ارد عليها من كثرة اللبان يلي في فمي:icon28:
ولمن دخلت اولى ابتدائي سوت ابلتي اذاعه مدرسية وقالت لي يالله قولي انشودة وقدام البنات جلست اغني ( كلا عندو سيارات وجدي عندو حمار...بيركبنا خلفوا وبياخدنا مشوار)
اختي الكبيرة مسكينة ساحت في الطابور من الكسيفة والبنات جلسوا يضحكوا وانا فرحانه على بالي مبسوطين:biggrinlo
ومرة وانا رايحة المدرسة ابويه خاصمني ودخلت المدرسة وانا زعلانه قالت لي صاحبتي ليه زعلانة ؟؟وانا ما ادري ايش اقول لها على بالي انا الوحيدة يلي ابوها يخاصمها واقول لها ( وحده من احصنتنا يلي في امريكا ماتت) البنت مسكينه جالسه حزينة وانا عمري ما سافرت امريكا ولا عندي حصان لعبة كيف حقيقي:D أم الكذب ياشيخة
وبما اننا في السيرة اقول لكم على حكاية اختي لمن كانت اولى ابتدائي . جات في يوم وقالت لنا الابلى تقول تبغى سورة من القرآن . ولمن ما فهمنا ايش تبغى وبحكم انها اخر العنقود اشتغل البكاء لحد الليل وفي النهاية استسلمنا وقلنا اكيد تبغى لوحة للفصل واعطيناها سجادة حائط عليها آية الكرسي واليوم الثاني رجعت السجادة ومعاها ورقة من ا لابلى مكتوب فيها: ارجوا احضار صورة من كرت العائلة
اختي المحروسة سمعت صورة ورمت الباقي
يالله همتكم كل وحدة تقول لنا بلاويها