الرأي الحر :

دار هذا الحوار الحقيقي بين شخصين عراقيين احدهما في الغربة والثاني في قلب بغداد ـ ـ ـ طبعاً حذفت الأسماء وبعض الأخبار العائلية الخاصة ـ ـ ـ { ابو ـ س} هو المتغرب والثاني لقبته بـ الصديق وهو صديق أبو س من بغداد ـ ـ ـ { ابو ـ س} أنته شغلك شلونة الصديق والله انكول الحمد الله بس خطره { ابو ـ س } ووالوضع يمكم الله يعينكم على الي دنسمعة الصديق والله السمع مو مثل الشوف { ابو ـ س } ا لله يعينكم والله خايفين عليكم وعلى اهلي الصديق احنه صارت عدنه كتلت الانسان اسهل من كتلت الجلب { ابو ـس } الله يحفظكم { ابو ـ س } : الأهل شلونهم وأخوتك الصديق اني اكعد الصبح يجيني سايق ايوديني للشورجه المسدس بيدي جاهز اي واحد ايوكفني لو قاتل لو مقتول ارجع الضهر بعد ماطلع ليثاني يوم { ابو ـ س } لا حول ولا قوة الا بالله الصديق والله موزينين امي مريضه كبل اليوم وكعت صاروخين ابيت اخويه { ابو ـ س } الله يحفظكم خو ما صار شي عليهم الصديق لا هو جان بلشغل اوجهاله بالمدرسه { ابو ـ س} زين يعني همه كانو قاصدين بيته لو مكان ثاني الصديق لا مو احنه هسه منطقه تقصف منطقه بلهاونات والصواريخ لاعلى التعيين الصديق توكع براس الابرياء { ابو ـ س } الوضع كل ماجال بالانكس واي تحسن ماكو { ابو ـ س } : يابة الله الحافظ الصديق البارحه واليوم ضربو الاعظميه 100قذيفة هاون اوصاروخ { ابو ـ س } لا { ابو ـ س} خوماكو شي عليكم لو على أهلي { ابو ـ س } شوكت راح تفض اني مدا أشوف حل الصديق لا بس الله يستر من الجاي اذا تكدر تسحب اهلك اسحبوهم اليوم كبل باجر { ابو ـ س } والله يا .... كلش صعبة وياريت لونكدر اكثر شي أني خايف على أخوية لان شاب ويطلع من البيت هواية الصديق هو هذا الي اني اقصده الصديق خالي ايبيعون شعدهم ويطلعون { ابو ـ س} طبعاً أنته مو غريب وتعرف هذه الشغله شكد تكلف وياريت مضمونة الصديق احنه الناس الي ماعدنه ارتباطات سياسيه باقين ننتضر الموت الصديق بهذا البلد الكافر { ابو ـ س } والله يا أخوية حاس بيك { ابو ـ س} وأنتو ألي أكلتوها بليا ذنب { ابو ـ س } الله يحفظكم بس الصديق شحجيلك والله يوميه انموت عشر موتات الصديق الله كريم اني اسف ضوجتك { ابو ـ س } لا تكول هيجي ليش أني مدا اشوف { ابو ـ س } وأهلي هم ديكولون الصديق بس تدري احنه بعد ماعدنه علاقات مال صديق او اي روابط عائليه يعني احنه هسه الي ايموت واحد من اقاربه المقربين منكدر اروح للفاتحه { ابو ـ س } ليش الصديق لان متكدر اتروح المنطقه غير منطقتك { ابو ـ س } زين لعد موكالو واضعين خطة جديدة راح تنظم الأمن الصديق يمعود انته هم اصدك بالحراميه { ابو ـ س } الله ينتقم منهم الصديق آخر زمن { ابو ـ س } أبويه شلونة الصديق ابوك مابيه شي على حاله بس مديصير احسن من حاله الي جان بيه الصديق اني رحتله قبل شهر اوشفته { ابو ـ س } يعني الواحد أذا تخربط باليل شلون يودوه للمستشفى الصديق حته الصبح متكدر وين اتوديه اذا الاطباء كلهم انهزمو ولي بقه كتلوه { ابو ـ س } لا الاه الا الله الصديق احنه نفتقر لاكل الخدمات كهرباء تجينه ساعه وحده كل 24ساعه { ابو ـ س } هاي والدنيا شتا لعد الصيف شلون الصديق حتى الاكل والمسواك اغله من اي دوله بالعالم { ابو ـ س } والفقير شديسوي الصديق كيلو الطماطه ابدولار اونص الصديق الفقير ينجرف بالتسليب والقتل { ابو ـ س} وهاي الناس منين دتعيش الصديق الله معيشها بالقدره { ابو ـس} ونعم بالله الصديق انته اتخيل تكعد اصبح تلكي ذابيلك ورقه خلال 3ساعات اتعوف البيت تطلع من البيت حته ملابسك متكدر تاخذه اوراسا يجي واحد ياخذ بيتك الي هو ملكك { ابو ـ س} الله يبعد عنكم أولاد الحرام هاي صارت تكساس مو بغداد الصديق اويكعد بيه وانته بعد متكدر اتخش للمنطقه الي المفروض بيتك بيه الصديق احنه صار بينه الي مصار بكل العالم لان احنه موخوش ناس والناس الزينه الله ياخذه ويخلصه { ابو ـ س} زين محاولت تروح لغير محافضة الصديق ماكدر { ابو ـ س } لا تكول هيجي خلي أيمانك جبير والله يفرجهة أن شاء الله بس صدك أحنا العراقيين شفنا الموت بعيونا ومنين من أخوانا الصديق الله كريم انته تريد وانا اريد والله يفعل مايريد موهذا هو حال بغداد الآن لا حول ولا قوة إلا بالله . الى هنا وقطعت المحاورة الباقي حديث عانلي هذه المحادثة جرت قبل ساعة من الآن ـ ـ ـ يعني القصف كان اليوم على الأعضمية والله يستر .

دار هذا الحوار الحقيقي بين شخصين عراقيين احدهما في الغربة والثاني في قلب بغداد ـ ـ ـ طبعاً حذفت...

بنت ديالى :

لا يمكنك مشاهدة هذا التعليق لانتهاكه شروط الاستخدام.

thinsation :

اضم صوتي لخواتي ممكن تثبيت الموضوع جزاكم الله خيرا:(

اضم صوتي لخواتي ممكن تثبيت الموضوع جزاكم الله خيرا:(