اختــــار ميــــــــــــن؟

السلام عليكم ورحمة الله


اخواتي الغاليات في هذا المنتدى الرائع

انا اخت لكم في الله واتمنى واطمع في كرمكم يا بنات

تكفون وقفوا جنبي وساعدوني

الله يحفظكم من كل مكروه

مشكلتي..

اني انخطبت من شخصين ..

الاول..يقرب لابوي بس من بعيد ..وانسان مكافح وباني نفسه بنفسه (عصامي) وماشاء الله حالته الماديه فوق الممتازه وطبعا شغله في الخارج في الدول الاوروبيه اللي تتبع للبورصه وكمان عنده استثماراته الخاصه يعني الوضع المادي 100%

اخلاقه..محااافظ على الصلااه ..بار بوالديه ..لدرجه انه ابوه قبل مايتوفى هو اللي تكفل بعلاجه وتسفيره للخارج وفي احدث البلدان والمشافي..وطبعا بذل الغالي والرخيص من اجل ان يسهر على راحة والده رحمة الله عليه..وحتى بعد وفاة والده كان لديه اخوه صغار من ابوه اي مو اشقاءه وكان حنووووون معهم واصغر واحد فيهم يناديه بابا

المشكله..واللي مو مزعجتني كثير ..هي انه الفرق بيني وبينه عشرين سنه ..

ملاحظه: انا واثقه من نفسي والحمدلله وقدرتي على احتواء اي رجل ..انا عمري 21

اللي اعجبني فيه..اعتماده على نفسه ما كان يملك شي والحين يملك الكثير ..وانه صاحب قرار لما جاء يخطبني خطبني بطريقه حلوه مره تخيلو ما شاور احد ولا حتى اهله خطبني على سمعة ابوي ومكانته عندهم ..وقال لابوي جمله اعجبتني كثير (قال تأكد يا عم اني راح ارد لك جميلك في بنتك وما راح انساللك جميلك ويكفيني شرف اني ماخذ بنت فلان)..طبعا يقصد بالجميل هو موافقة ابوي عليه رغم انه اكبر مني ب20 سنه

رأي امي وابوي اللي اهتم فيه كثير ..ابوي حبيبي معجب جدا بالرجل هذا وموافق عليه وحسيت من عيونه وكلامه انه وده اوافق عليه لانه الرجال ما يتفوت لدرجة انه في المجالس الشياب يخطبونه لبناتهم..

وامي ..في البدايه كانت متحمسه وموافقه وبعدين حسيتها بدات تتراجع عن رايها

انا..عاجبني بس خايفه من ثلاث اشياء..الاول..اقول في نفسي رجال الى الان ما تزوج وطول عمره عايش برا كل اهتمامه في الشغل وجمع الفلوس والله يعلم يمكن يكون سبق تزوج اجنبيه هناك والباقي انتم تعرفونه...والشي الثاني ..بصراحه اهله مخوفيني ومره صعبين ولا قدرت اتاقلم معهم ولا اندمج معهم لاني اعر فهم من زمان يعني حقين نقد وكلام وقيل وقال وغيره بس امي قالتلي لاتخافين من هالنقطه لانه الرجال بيبعدك عنهم ..والشي الثالث اخاف اندم على اختياري له مدري والله مدري

الشخص الثاني ..

ولد خالي انسان حبوب وخفيف دم وعلى قد حاله توه بادي حياته وراتبه حوالي 8000 وعنده محل متشارك فيه مع صاحبه ويمشي حاله

اخلاقه عارف ربه وراعي صلاه

عمره..الفرق بيني وبينه 9 سنوات بس..

رأي ابوي..بصراحه ابوي ما كان متحمس مره وكان شبه رافض واحساسه ان الشخص الاول افضل لكنه ماعارض ابد
امي..مواااافقه وتقول احس سعادتك مع هذا الرجال..واعترف الاخ لامي انه يحبني من زمان وحاطني في راسه..طبعا امي قصدها من ناحية الرجال عارفينه وقريب من عمري وكذا..

انا..بصراحه اشوف انه مريح مو غامض مثل الاول ..بس انا ماودي بواحد يقرب لي ..يعني ماكنت حاطته ببالي ابد ..وتبون الصراحه فرحت بالخطبه الاولى اكثر من الثانيه

طبعا كلكم بتقولون استخيري بقولكم انا لي سنه استخير والله ما حسيت بشي ولا وصلت لقرار

محتاره محتاره

تكفوووون خووواتي لاتخلوني ..لاتحرموني مشورتكم الله لايحرمكم رحمته وجنته

والله الله بالجواب المفيد..

بنات لاتفشلوني ترى هذا اهم موضوع في حياتي موضوع مصيري وانا امنتكم هذي الامانه

في انتظاركم