اختي درة البحرين .....قصتي وقصتك وشوفي الفرق ...

السلام عليكم ورحمة الله وبركاته :)

خواتي اليوم قعدت اقرا قصة الاخت درة البحرين اللي منزلتنها في هالقسم ووالله العظيم من فترة وانا ابغي انزل موضوعي ومشكلتي اللي اغلبكم تعرفونها مع اهل زوجي بس اقول في نفسي شو الفايده هاذيلا ناس مايبوني ولا يفهمون ليش اتعب نفسي
خواتي اللي حاز في نفسي هو زوجي مب اي شخص ثاني احس سعادته ببيته وعياله وفيني ناقصه احسه يضحك ويسولف بس شايل هم في قلبه اشوفه بنظرات عيونه وبنبرة صوته يوم يرد من بيت اهله :(
للي ما يعرفون قصتي مع اهل زوجي بقولكم باختصار اني عشت عندهم تقريبا سبع سنين ونص على الحلوه والمره ما كانت حياتنا تخلو من المشاكل مثل اي بيت مشاكل عاديه على العيال والخدم وغيره وكنت احاول اكون الاحسن واسامح واتغاضى وانسى وارد مثل قبل واحسن ويعلم الله اني ضحيت وايد بوقتي وشغلي وبعيالي عشان ارضي اهل زوجي ماتتصورون الظروف اللي مريت فيها والمواقف اللي تعرضت لها والسبه بس اني ادور راحت اهله وحابه اخدمهم لانهم اهل زوجي وعشان حبي لعمي الله يرحمه ابو زوجي لاني مثل اختي درة البحرين حرمت من حب الابو مب لانه طلق امي لا لانه مزواااااااج لاخر درجه تتصورونها وكنت متعلقه فيه ابغي احس بحنانه واني طفله لها ابو يحن عليها ويلبي طلباتها ويدلعها بس وين وزوجات ابوي كل يوم شكل وكل يوم لون ولسان ظلمنا الله يسامحه ويحله دنيا واخره وظلمنا حريمه وكلو حقوقنا واموالنا وعشنا بفقر مع ان ابوي اغنى عمامي بس كانت فلوسه وخيره مب لنا لعياله الثانيين وزوجاته واهله
المهم يوم تزوجت حبيت زوجي لدرجه خفت منها اني مااقدر اكون قد حبه لي ولو بتصدقون اني كنت خايفه من حبي له لاني كنت خايفه يكون مصيري مثل مصير امي وماخذه فكره سيئه جدا عن جنس الرجال وانهم مالهم امان وووو فكنت احبه بخوف وبنفس الوقت احاول اكسب اهله عشان احس اني عايشه باستقرار وفي بيت خالي من المشاكل والحنه والرنه على كل شي استغربت اول ما جيت عندهم كيف امهم قويه وكيف ابوه طيب وكيف ان الكل ما يقدر يقول لا لاوامر امهم بنفس الوقت كيف ام زوجي مسيطره على البيت والمصروف ومدلعتنهم اخر دلع يعني لو يبغي اي واحد منهم اي شي مهما كان على طول تعطيه وتروح وتشتري له وكنت احس بالفرق بين حياتي اللي عشتها في بيت اهلي وبالحياة اللي اشوفها قدامي مااكذب عليكم كنت احيانا احس بالغيره واقول شمعنا هم وليش نحن ما كنا كذا ؟؟؟
جبت عيال وبدت المشاكل من اول طفله لي حسيت بغيرة ام زوجي مني لاني ما رضيت انها تلغي وجودي وشخصيتي وتخليني تحت سلطتها وخصوصا مع بنتي كانت تحبها ما انكر هالشي بس بنفس الوقت تحاول تلغي وجودي كأم وتثبت انها هي احن وانها هي المفروض تربي عيالي واني المفروض ما افتح فمي بكلمه وحده تجاه عيالي ولا المس وحده فيهن حتى لو غلطت ....... انا طبعا ماعجبني الوضع ولا بغيت عيالي يصيرون نسخه من عماتهم وعمامهم دلع عدم احساس بالمسؤوليه بطره لاخر درجه انانيه وكل واحد يفكر بمصلحته ورغباته وبسسسسس ولو يصير اللي يصير في البيت ما يتدخل ولا له خص لا بخير ولا بشر فنحن في بيت اهلي على الرغم من المأساه اللي عشناها بس امي ربتنا وحافظت علينا وخلت قلوبنا على بعض ودايما تحسون ان اسرارنا وهمومنا مشتركه لو بيصير شي على واحد منا كلنا نوقف معاه وندافع عنه ونحمي بعض وكنت ابغي عيالي يصيرون مثلي ويخافون على بعض ويسالون عن بعض
المهم مشت السنين بخيرها وبشرها بأحزانها وبفرحها وحسيت نفسي عضو من هالبيت خصوصا مع مرض عمي قبل موته ووقفت ام زوجي بروحها ومعاناتها فحسيت عيب علي اكون مثل عيالها واقعد اطالعها وهي تعاني وتدور بالمشاكل ومتطلبات البيت وغيره وغيره بروحها حاولت اساعدها كثر ما اقدر بكل شي اقدر والا ما اقدر عليه واجبرت زوجي يساعد امه لو بشكل مادي وكان ما يصرف علي ولا لى عياله راتبه له ولاهله ورضيت بهالشي عشان امه مع انها ما كانت محتاجه لذيك الدرجه كانت عندها مداخيل وموارد تصرف منها وكنت هبلا على بالي صج محتاجه وهي تكدس بهالفلوس وتخزن وتصرف من جيب زوجي ومن حقي انا وعيالي ومن جيبي بعد يعني ما اخليها ابدا تدفع او تشتري شي وانا اكون معاها دايما اجيب واصرف لو ما عندي اضغط على نفسي بس عشان ترضى ونعيش بسلام
بدت بينا المشاكل من اول ماجبت بنتي قامت تدقق على كل شي وتتهمني لو حتى قلت كلمه او حتى مزحه لبنتي اني اقصدها هي والا بناتها ويعلم الله اني ماكنت اقصد شي يعني ام تلاعب بنتها ومثلا تقول لها يا صايعه بربكم من تقصد بهالكلمه !!! بس شو اقول استحملت وتنازلت والمصيبه اني تنازلت عشان لا تصير مشاكل لاني اكتشفت انها مع كل تنازل تزيد اكثر واكثر
يوم توفى عمي الله يرحمه كان عند زوجي وكاله عامه عنه وصارت مشكله بالنسبه للبيت اللي يبنونه اهل زوجي وانا وقفت للمشكله وراكضت عليها وتابعتها بكل صغيره وكبيره على حساب صحتي وعيالي وشغلي لدرجه اني كنت بنطرد من دوامي والسبب مشاوير بيت اهل زوجي ومشاكلهم بس احتسبتها لوجه الله وقلت ما عليه هاذيلا اهل زوجي يعني اهلي
المهم كنت اوقع على بعض الاوراق المهمه للبيت واتابعها ونصحني رجل قانون اني اخذ وكاله عن زوجي عشان لما صارت مشكله البيت كبيره وتحولت للمحكمه قالي احسن لك خذي وكاله عشان تصير الاجراءات صحيحه وقانونيه شاورنا اهل زوجي ووافقو طبعا على طول لانهم يعرفوني زين ما اهتم للماده ومحد بيخلص امورهم غيري ومشاويرهم ومشاكلهم انا اللي اسعى فيها مب زوجي ولا اي حد ثاني وخذت توكيل وياريتني ما خذت توكيل صار كل شييييييييييييييييي من الالف للياء على راسي وانا لازم اسويه تخيلو وقفتي بين العمال والمهندسين والاستشاريين والخبراء والقضاه وانا حامل لي تسع شهور وطلعتي ونزلتي لموقع البنا ء وقعدتي طوووووووووووول النهار للمغرب لا اكل ولا نوم ولا راحه بين الحديد والاسمنت وغيره وهذا يهزئني وهذا يغلط علي وهذا يناقشني وهذا يطنز علي وكل هذا وانا ساكته واقول معليه عشان ام زوجي وهي قاعده في بيتها هي وعيالها الرجال مرتاحين نايمين متغدين وانا ادور لين نهار
المهم سويت كل شي تتخيلونه عشان اقدر احل الموضوع وكان زوجي او اخوان زوجي ساعات يروحون معاي بس طبعا ما يعرفون اي شي لان كل التفاصيل وكل الموضوع عندي وانا اعرفه وانا اتابع المحامي وغيره وقلت ما عليه عشانهم وفي النهايه يوم توفي ابو زوجي بدا الوجه الثاني يطلع لاهل زوجي مع ان زوجي محذرني قبل ان اهله بسرعه يجحدون وبسرعه لو على كلمه ينسون كل شي ويتنكرون للمعرف وقالي هاذيلا اهلي وانا اعرفهم وكنت اعتقد انه بس ما يبغي يتحمل اي مسؤوليه ويقول هالكلام لاني مشغوله عنه هو وعياله وبالفعل طلع كلام زوجي صح والضربه القاضيه كانت لما توفى ابو زوجي وصار حصر الارث بدا زوجي بالمعاملات والاجراءات بما انه الكبير والتوكيل عنده وحب يتأكد من معلومه قديمه عشان يبري ذمته وشجعته انا وعمه واخته الكبيره واخوه اللي اصغر منه وقلنا له هذا حق وشرع ولازم تتأكد منه وجت المصيبه على راسي اخوه اللي كان معاه ومشاورنه بكل شي طلع مب رجال ولا قد كلمته امه درت بالموضوع وخافت على الراتب وعلى البيوت وغيرها وان تتعطل امورهم قلبت الدنيا على راس زوجي وجمعت عيالها الثانيين واخوانها وشيشتهم على اخوهم وصارت مشكله كبيره وصياح واتهامات وطلعو زوجي يبغي يسرقهم ويرميهم بالشارع !!! تخيلو لاي درجه وقالت له امه انت ولدي ولا اعرفك !!! طبعا دامت القطيعه كم يوم انا خذت الحياد وكانت هي في العده وقاعده في غرفتها اربع وعشرين ساعه ومسكره بابها وما حاولت اتدخل او اروح لها عشان لين يهدا الموضوع
بعدها تقريبا بثلاث او اربع ايام قلت لزوجي وكان يوم الجمعه وخواته واخوانه وجدته كلهم بالبيت قلت له انزل لامك وتفاهم معاها وهاي امك مايصير تغضب عليك ويمكن هي ما فهمت الموضوع عدل وانت ولدها ما يصير تزعل عليها لو انك على حق خصوصا بهالظروف هو كان مقهور من اخوه لانه طلع مب قد الكلام وقدرت امه تاثر عليه وتقلب راسه على زوجي وقالي مع اني مشاورنه وقايل له ليش سوا فيني كذا قلت له طول عمره فلان هذي شخصيته وما له كلمه كلمه توديه وتجيبه لانه غلط وايد على زوجي وكان بيوصل الموضوع لدرجه يضاربون فيها ويتشابكون لو ما الله ستر وهي ام زوجي قعدت تسمع اللي يصير وساكته في غرفتها ولما حست خلااااص انه الموضوع بيتحول لقتال طلعت عند الباب وسكتت ولدها حاولت اتدخل بين زوجي واخوه وافهمه واقوله عيب عليك تغلط على اخوك الكبير وهو امس مشاورنك ومادري شو بس ما عطاني فرصه وقالي لا تتدخلين انا اكلم اخوي ما اكلمك !!! تخيلو اللحين انا ما اتدخل بامورهم !! بعد شو !!!
المهم زوجي اقنعته ونزل حق امه وكلمها وصار تبادل اتهامات وصياح وغيره وغيره وطلع الوجه الاخر المصيبه مب هنيه المصيبه ان كل شي انقلب علي انا وتعرفون كيف !!! امه لما قعدت تناقش زوجي وتتهمه وتقوله تبغي ترمي عيالي في الشارع ومن هالكلام وتجيب ناس ينصبون عليك ويقصون عليك وتصدقهم وما تصدقني انا وقفت مع الحق وحاولت افهمها وقلت لها هذا حق وشرع وجدة زوجي قالت نفس الكلام وقلت لها ولدك الثاني الخايس ( وهاي الكلمه اللي ودتني بستين مصيبه مع اني اقولها دايما حتى حق عيالي ) اخوه مشاوره ومسوي كل شي عنه ليش غير رايه شو اللي قلبه على اخوه وطلعه حرامي طبعا هي اللي قلبت راس عيالها على بعض
مع تدخل جدة زوجي واخته الكبيره وانهيار زوجي التام قعد يا خواتي يبكي من كل قلبه لانه حس بالظلم ومن منو من امه مب اي حد ثاني
انتهى الموضوع وسكروه بان زوجي ما يتدخل في موضوع الورث وحلف زوجي انه ماله خص ورمى الاوراق وخلى العلاقه سطحيه بينه وبينهم اهله بس ما يتدخل بامورهم الماليه امه حست انها فقدت ولدها الكبير وانا تميت على الحياد ماحبيت اتدخل لاني قلت اذا هذا ولدها طلعته حرامي وما فيه خير عيل انا الغريبه شو بتقول لي ؟؟؟
بعد فترة نادت عليه امه وحاولت تراضيه وتعتذر منه وتفهمه قصدها وتصفي قلبها وقلبه وتعيد المياه لمجاريها واللحين بتعرفون كيف السالفه قلبت علي وطلعوني انا اللي سبب هالمصايب طبعا هم ما شافو كل اللي سويته عشانهم بس تذكرت شي واحد لما سبيت ولدها وقلت الخايس !!! اللي ما فيه خير قالت لزوجي زوجتك مادخلت بالخير بينك وبين اخوك وتحاول تدخل بالشر وتفرق بينكم !!! واني حاولت اقلب زوجي على اخوانه واهله !!! تخيلو !!!!
المهم زوجي سكتها ولا قدرت تاثر عليه وهو قالي انا ما اكذب عليكم زعلت وشلت في قلبي وقمت اطلع وادش البيت لفترة يمكن اسبوعين او ثلاثه واخلي الاحتكاك سطحي جدا بيني وبينهم هي قالت اني مافيني خير وخليتها بعدتها وحيده في البيت مع ان بناتها وجاراتها واهلها واهلي يوميا تقريبا عندها في البيت بس انا سكت ما قلت شي لاني ما بغيت الموضوع ينفتح من جديد
مشت قضية البيت وطبعا عيالها كلهم وبما فيهم زوجي ما يعرفون اي شي عن القضيه ولا اي اجراء ولااااااااااا اي شي كله عندي كلمني زوجي وطيب خاطري وقالي معليه خذي اجر وتابعي الموضوع بما انك انتي اللي بديتي فيه خلصيه لانه ماراح يخلصه حد غيرك لانه اخوه اللي صارت المشكله بينه وبين زوجي وتضارب معاه قام يسب اطراف القضيه وسوا مشاكل وكبر الموضوع ودمر اشياء وايد من اللي سويتها وبنيتها وخسرنا اطراف في القضيه كانو تحت امرنا ومعانا والسبه اخوه !!
قلت لزوجي اصلا انا ما كنت بتخلى عن الموضوع وبتابعه لانه تعتبر نذاله مني اذا ما سويت هالشي ورجعت لمشاويري وهمومي ومشاكل القضيه والمحامي والمقاول وغيره وغيره في نفس الوقت حبيت اصفي القلوب وارجع كل شي مثل ما كان قمت نفس قبل ادير البيت والخدامات والسواق والضيوف وكلللللللللل شي تتخيلونه وكانو يسوون صيانه للبيت وهدم وتابعت كل صغيره وكبيره في الموضوع هذا بعد بالرغم اني بغيت ام زوجي تسوي صيانه لغرفة بناتي وانا بدفع لها المبلغ باقساط بس للاسف في البدايه وافقت وبعدين يوم شافت مبلغ البيت والتكلفه شوي غاليه عليها اول غرفه واول شي لغته من الصيانه وشالته من الخرطه هي غرفة بناتي !!! وانا سكت ما قلت شي وهي سوت وطلعت وزادت اشياء ما تتخيلونها ومبالغ كبيره لعيالها ولها !!! قلت ما عليه الله يسامحها ومع ذلك استاجرت لهم بيت لين تخلص صيانة بيتهم وراكضت شرق وغرب ادور بيت وانا في النفاس وتركت بنتي عندها وامتتخيلون كثر شو تعبت لين حصلت لهم بيت لان كل البييوت اللي القاها يعترضون عليها يعني ساعات يقول ولدها اخو زوجي مافي باركن حق سيارتي وين احطها بالشمس والا في السكه !!! ومن هالامور اللي تتعب الاعصاب وتقهر ومع ذلك المشاوير والدواره والتعب حقي وسكت لقيت بيت اخيرا وعجبهم ومشيت بالاجراءات على شغلي عشان استاجر لهم البيت وهم بيدفعون لي اللي يقطعونه من راتبي مع انها في البدايه كانت تبغي زوجي يدفع النص واخوه النص بالاضافه للمصروف اللي يدفعه للبيت وهو مبلغ مب شوي واخوانه يساهمون بما يقل عن النصف ومع ذلك دايما المديح لاخوانه والشكر لهم !!! انا رفضت قلت لها زوجي ماله خص المبلغ يدفعه فلان وانتو يكفيه المبلغ اللي يساهم فيه للبيت وسكتت على مضض !! اثثت البيت وفرشته من جيبي من المبلغ اللي عطوني اياه الدوام وقلت لها اعتبريه هديه مني لك بالرغم اني ملزومه ارجع المبلغ للشغل اذا طلعت من البيت قبل الاربع سنين واحنا كنا نبيه لمدة سنه بس او اقل ولا قلت شي نقلت كل شي الكهرباء الاتصالات كللللللللللللل شي تتصورونه وتابعت كل شي بروحي لين خلص البيت ورجعنا وصار النقل بعد علي والتاثيث والديكور وكللللللللللللللللللل شي وحبيت اهديها سويت لها غرفتها وجهزتها كهديه مني لها ووسطت اهلي واخواني جابو لي العمال وكل شي وبارخص الاسعار وخلص البيت من ديكور واثاث وقلت لها امري متى تبين تنتقلين لبيتك ؟؟؟ وكانت توها مخلصه العده وقريب العيد الفطر قالت لي اليوم الفلاني قلت لها ابشري وفالك طيب لانها قعدت تشتكي من القعده بروحها وان ماعندها جيران والمكان بعيد وووو
نقلت للبيت الجديد وجهزت لها كل شي حتى صحونها رتبتهم وصفيتهم في المطبخ ونظفت البيت بمساعدة خداماتي وخدامات اهلي وجت هي وبناتها وعيالها بعد ما خلصت كل شي ووالله يا خواتي محد منهم شال ثوب معاي او سالني تبغين مساعده بشي !!! وبعد سكت