اخواتى طالبتكم تدخلون تحلون مشكلتى الله يوفكم0هذاطلبه

اختي شو يعني الرز المفلفل هذا اولا وثانيا نحن هني في الامارات اكلنا غير عن اكلكم في السعوديه ولكن بخبرج عن سر الطبخ عندنا هو مكعبات الماجي والبهارات المختلفه الهند ية يعني البرياني نحطله بهار البرياني والكاري المطحون والكزبرة المطحونه والفلفل الاسود المطحون وحب الهال وعيدان القرفة والقرنفل وللمقلوبه نحط البهارات السبع السوريه مكتوب على الكرتون بهار الطاهي وهو يبيعونه في الجمعيات ويحطونلها بعد شوية قرفه مطحونه ومكعبات ماجي وكبستنا غير عن كبستكم يا الغاليه اما عن مقدار الماي ما اعرف شو قصدج يوم قلتي ننقعه يعني تنقعينه قبل الطبخ اذا هذا هو قصدج هي نعم ننقعه تقريبا نصف ساعه قبل ما تطبخينه وبعدين تصبين عنه الماي وتطبخينه واذا تبيني اشرح لج بالتفصيل الممل اناحاضرة عيوني لج يالغاليه انا اعرف اسوي من العيوش البرياني والعيش الصيني والمكبوس والمقلوبه والخروف المحشي والعيش الابيض العادي والتونه في قاعة القدر والبرياني في قاعة القدر والسمك في قاعة القدر والعيش بالطماطم والدجاج بصويا الصوص شوفي انتي اي طريقه تبين وانا حاضرة من عيوني واذا ما عجبك شي منهم فاتمنى ان البنات يفيدونج يالغاليه والله يهديلج زوجك ا نشاءالله تعالى

أختيhaidi1000
الله يكرمك اشرحي لي طريقتك في الخروف المحشي مأجورة غير مأمورة

تحياتى اختى hed1000اسفه اذا كتبت اسمك غلط لكن اكتب بسرعه خايفه يجى زوجى ويهاوش الرز المفلفل يعنى الغير متماسك وابى طريقت الزربيان الله يعافيك وشكرن لكل من رد على وابى المزيد لو سمحتو وش تتغدون كل يوم عشان اصلح كل يوم شى وينكم يا مشرفات ورا ما تردون الله يهديكم :26:

اختي الغالية

شوفي هذا الرابط وراح تلاقين فيه الكثير من الاطباق اللي تساعدك وترضي زوجك

http://forum.hawaaworld.com/showthread.php?threadid=117266


ماجي

هلاومرحبااختي ام اسما من عيوني فديتج حبيبتي طريقتي في الخروف المحشي هي :
تيبين كيلو لحم غنم مفروم فرم خشن وتيبين بعد عيش امريكي وبازلاء وبهار الطاهي اللي هو السبع بهارات اللي يستخدمونها اخوانا السوريين واللبنانين وقرفه مطحونه وزيت نباتي اوسمن حسب الرغبه اول شي تقلين اللحم المفروم في الزيت وتضيفين عليه البهارات السبع والقرفة ومكعبات الماجي طبعا هذا كله بعد ما اللحم ينزل الماي ماله وينشف عنه الماي وبعدين ضيفيله العيش الامريكي والماي على كل كاس عيش كاس ونص ماي وبعدين يوم بيستوي العيش نص استوا حطيله البازلاء لو كانت مجمدة ولو كانت طازجه حطيها مع العيش على طول وبعد ما ينشف الماي ويستوي العيش تحطينه في الفرن على حراره معتدله لمدة خمس او عشر دقايق وبعدين طلعيه من الفرن وعلى فكرة حبيبتي نسيت اقولج البهارات السبع احط كميه منها يعني تقريبا ملعقة ونص او ملعقتين عشان العيش يحمر واطعمي الملح اذا محتاج زيادة حسب الرغبه هذا العيش اما اللحم بشرح لج اياه في الخطوة الثانيه تحت:
اللحم حبيبتي تاخذين ورك ذبيحه او كتف او اي قطعه كبيره من الذبيحه وتبهرينها بفلفل ابيض وفلفل اسود وبهار الطاهي وقرفه مطحونه وملح وتفركينها بخل ابيض وتحطينها في صينيه تيفال مالة الفرن وتحطين عليه كاسين ماي او كاس واحد على حسب الكميه الي عندج ونفس مقدار الماي تحطين كاس خل ابيض وتحطين عليهم نص كاس زيت وقرفه عيدان وهيل حب وقرنفل وكمون حب وورق غار وليمونه يابسه وليمونه خضرا وجزرة مقطعه حلقات وثوم حب وبصله مقطعة حلقات وشوية بهار الطاهي وملح شويه طبعا هذا في الماي والزيت غير اللي فركتبيبه اللحم وتلحفينه في قصدير وتحطينه في الفرن طبعا بيطول لين يستوي اللحم وبعد ما ينشف عنه الماي شيلي القصدير عنه وخليه يحمر ونسيت اقولج اجرحي قطعة اللحم علشان تشرب البهارات وعند التقديم حطي العيش وفوقه قطعة اللحم وقلي مكسرات مثل الصنوبر والبيذام والكاجو وذريهم فوق اللحم والعيش اعرف اني تعبتج لكن الطريقه وايد سهله بس انا صعبيتها لاني اباها تضبط معاج وعلى فكرة مب ظروري تسوين الحم اللي في الفرن يعني انا ما اسويه الا يوم يكون عندي عزيمه اكتفي بالعيش واللحم المفروم في الايام العاديه بس طعمه يهبل انتي بس اقري الطريقه مرة ومرتين وثلاث وانتي بتضبطينها انشاء الله