اخويا سندي بعد ربي قلب حياتي << مشكلة عضوة بالمنتدى

السلام عليكم ورحمة الله وبركاته
كيفك حبيبتي
الله يسعدك عندي مشكله ،حاولت احلها ماقدرت
لانو اصعب شي لما تكون المشكله من اخوك اللي يقوله عنه سند
راح اقولك عن وضعي بالمختصر وبعدها اقولك المشكله
انا متزوجه وليا 16 سنه .الحمد لله انا وزوجي عائشين ومبسوطين ومشاكلنا زي اي بيت مايخلو من مشاكل بسيطه،وبحياتي لا انا او زوجي اشتكينا لاحد عن حياتنا
مرت فتره صعبه بحياتي وكان سببها مس وبعدها انسحرنا انا وزوجي سحر تفريق،والحمد لله ع كل حال وصبرنا ونحاول نتعالج بالرقيه وسورة البقره ،امورنا ماشيه صح في تاثير ع وضعنا وخاصة انا وع بناتي وزوجي متفهم الوضع ومقدر هدا الشي ولا مره اتكلم او جرحني ع وضعي ،تقريبا لنا 5سنوات مسحورين.عندي اخو اكبر مني بالضبط الفرق بيننا6 سنوات ،هدا اخويا من زمان يكرهني كره فضييييع ويحاول يحطمني وهو ملتزم (استغفر الله احس التزامه بس اسم ) يحاول قدر المستطاعيهينني قدام الناس وزوجي وبناتي.ياما كلمته وامي واخواتي واخواني كلموه بس مافي فايده كره ليا ماله حل.
اخويا بالمختصر دكتور في الجامعه حالته الماديه ماشاء الله تبارك الرحمن جداً عاليه،متزوج وزوجته جامعيه ورافض انها تتوظف ومديها شهريا مصروف خاص فيها اكثر من ثمنيه الاف غير مصروف البيت عنده اولاد وبنت،،يعني كل شي ماشاء الله ربي مديه هو
وماني عارفه ليه يتصرف كدا معايا
من شهر شوال قايمه قيامته عليا جاني وانا حامل اتوحم وبنفس الوقت مسخنه ومزكمه ،وللامانه البيت مو مره مرتب ترتيب بناتي ،تعرفي البنات الصغار كيف يرتبو.
المهم جاني من غير موعد ولا شي ماادري الا هو عند الباب اتصل عليا وانا كنت نايمه لما دق جوالي ع بالي زوجي او بناتي كانو بره،،فلما رديت قلي انا عند الباب افتحي قولتله طيب
وصار يعلق ع الجرس انا بسرعه قمت وحالتي حاله،لما فتحت الباب قولتله انا مزكمه لا تسلم عليا اعديك ودخلته غرفة الجلسه هو رفض يجلس الا بالصالون ، المهم دخل وشاف الطاولات مغبره،وقلي ليه وسخه قولتله ماعندي ضيوف وادا احد بيجيني هداك الوقت انظف وقولتله بنتي الكبيره مسحتها الاسبوع اللي فات قلي الاسبوع اللي فات،المهم ماطول خرج ع طول زيارته ماتجي 5 دقائق.
وبعدها كم يوم شاف اخو زوجي وقام يشتكيله انه زارني وبيتي وسخ واني انا مهمله وهامله بناتي من شدة وساختي واهمالي اخلي بناتي ينضفو البيت،اللي يقهر الغريب يدافع عني وعن وضعي وهو مصمم اني انا السبب واني قويه واتحكم في زوجي ومخلييته طرطور ،لو مايخاف مني كانخاصمني ع وساختي وع اهمالي(الحمد لله زوجي مقدر وضعي ،لانو قبلها كنت حامل وتوفىالجنين في بطني في الشهر السابع.فعلشان كدا مخليني ع راحتي وحتى طبخ هو والبنات يطبخو او يشترو من بره)
طبعاً اخو زوجي نادى اخوه(زوجي) واستفسر منه وحكاه زوجي ع وضعي وانه لازم اقدر وضعها .لما قلي زوجي مره انصدمت وبينت لزوجي عادي .وبعدها كلمت امي وقولتلها وامي خاصمته، وجلست بقلب اخويا لحدت ثاني عيد الحج،اتصل ع زوجي وقله ابغاك بموضوع،واتقابله بره ،واخويا اللي هو سندي طلع فضائحي وزوجي يدافع عني لحدت ماقله زوجي انه احنا مسحورين واللي فينا سحر تفريق.
اخويا صار يضحك وقله تضحك عليك اساور
ترى اساور ممثله،فزوجي حلف له وحكاه عن حياتنا قبل وبعد وقله اذا منتى مصدق اقرا علينا قله اساساً كذب مافي سحر ولا يحزنون
فتناقشو ع هدا الموضوع،فقلهاخويا ،،اساور هيا مهمله من هيا بنت وطلعله فضائحي كلها وقله كانت عند امي زمان تعشق الاندومي ومن جبروتها حرمت بناتك منه(انا كنت اكله زمان قبل مااعرف مصايبه ودحين بناتي مانعتهم منه عشان اخاف ع صحتهم تقريبا من مره الى مرتين في السنه ياكلوه وبعض الاحيان سنه كامله مايكلوه وبناتي مو مره يحبوه)وهيا قاسيه ع البنات ،بدل مدلع بناتها بالجوالات والخرجات مع صحباتهم حابستهم (للامانه انا اخاف عليهم والشئ الثاني صحباتهم ماعندهم جوالات مسوين قروب بجوالات امهاتهم وكمان ماعندهم خرجات ولا زيارات) فقله زوجي الدنيا دحين تخوف راح قاطعه وقله يعني بناتك المحترمات والمودبات ،محد تعب امي غير اساور بافعالها الان مو راضيه تعقل ولا تكبر عمرها45 سنه (مكبرني عشر سنوات) المهم كلام كثييير صار حوار بينهم،،وانت مالك شخصيه لها،انا ومنك اكسر راسها والمفروض تجيب البنات عند امي لوحدهم من غيرها،هيا حارمتهم من الناس(ازور امي بحكم المدارس مره في الاسبوع،،وايام الاجازه من مرتين ل 3 في الاسبوع،،)
ومن بعدها زوجي قلب عليا صار يكرهني واي حركه او تصرف اسويه صار يخاصمني ويقولي اخوك يقول ويقول كان زمان ميجيب سيرة العمر ،دحين مايناديني الا العجوزه،وصار يخاصم ع البيت لو لقا ورقه قام يخاصمني رتبي شوفي البيت كيف زباله حتى اخوك يقول انتي مهمله ووووو،صبرت وسكت وراح اشترى جوال لبنتي(بنتي ثانيه متوسط)وانا من اول نبهتها لو ابوك جاب لك جوال قولي انا ماابغ،وقولتلها سبب الرفض ايه وبنتياقتنعت
،ولما اشترالها ابوها ادالها هو ،،قالتلهانا ماابغ جوال ياريتك قولتلي قبل ،راح عصب عليا قدام البنات وقلي انت اللي قولتيلها انت حارمه بناتك انت معقدتهم قولتله انا قلي ايوه حتى اخوك يقول
قولتله اخويا كلامه منزل من السما فلازم تقول قال ،هنا عصب عليا وقلي اصلن انت فاجره قولتله انا قلي مو بس انا اللي اقول،،،سمت متكلمت .
وراح قلي لعلمك اهلي واهلك كلهم جاهم خبر انك انت انسانه وسخه ومهمله والبيت زباله،قولتله البركه فيك كان جبت شغاله ،قلي هذا اللي فالحه فيه،سكت مارديت عليه ،آه ايش اقوله واقرب الناس ليا حرضه عليا وشوه سمعتي عندي حسبي الله ونعم الوكيل فيه
المهم جاني بعدها بساعتين واعتذر واتاسف ع كلمته واتفاهمنا ومشيتها،لانه اول مره يقولها والشي الثاني اشتكي مين .
وامس طلبت اغراض وداني وعند المحل قلي ماعندي فلوس قولتله هذا من واجبك انك تصرف عليا قام يخاصم ويقولي انا بس اجيب الاساسيات من اكل وشرب للبيت وانا ماني مسؤول عنك من اليوم ورايح ماراح اصرف عليك عجبك عجبك ماعجبك افتحي الباب واخرجي،قولتله انا زوجتك مجبور تصرف عليا،،
قلي اخوك يقول ،قلت يادين النبي،قلي ايوه صح نسيت اقول قال وصار يضحك ضحك استهزاء،سكت مارديت عليه.وطول وقتي في السياره ساكته طبعاً مشتريت،وهو كمل اغراضه الناقصه ورجعنا للبيت وماتكلمنا من امس
صحي الصباح للدوام مالقى فطور له ،قال لبنتي في فطور قالتله ماما سوت وفطرنا(دائما اشيل له فطور) جا من العمل وراح اخد دوش لما خرج لقانا جالسين نتغدا ماستنناه كالعاده ومابقي شي (سال بنتي في غدا قلت هدا الموجود اكل الباقي وهو ساكت ) ومابينا كلام وقال لبنتي صحوني ع اذان العصر وماصحيته ،صحي ع الساعه خمسه ومتكلم ودحين اخد بناتي وداهم عند امي،،وقلي غصبن عنك اخده مره في الاسبوع لوحدهم عجبك عجبك ماعجبك دقي راسك في الجدر،،سكت مارديت خليته يكلم نفسه ،،اخدهم وراحو
ماني عارفه ايش اسوي،فكرت ازعل وروح بيت اهلي لاول مره مااحس انه عندي سند، ايش اقول لاهلي انتو السبب، والطلاق ماابغاه لسبييين( ماابغ احقق رغبة اخويا ولا ابغ احقق رغبة اللي ساحرتنا)
لاول مره احس اني عاجزه عن حل مشكله،فقلت اسالك واطلب المشورة منك
وسامحيني يالغاليه طولت عليك