اسرع .. واسهل ..وابسط عجينة للحشو في العالــــم

كل عام وانتوا بخير يا طباخات ياماهرات ... عندي لكم اليوم اسهل وابسط طريقة عجينة للحشو ... يمكن ما تصدقون ان فعلا هاذي مقاديرها .. وانا بعد في البداية ماصدقت ... لكن النتيجة كانت عجيبة ...
المهم مابطول عليكم ...
المقادير ...
علبة قيمر ..او قشطة نستله
كاسة طحين (رقم 1 )
شفتــــــوا البســــــاطة
يعني هذا المقدار اذا حبيتي تزيدين ..نفس المقدار يزيد معاج .. يعني 2 قيمر 2 كاسة طحين ..5 قيمر .5 كاسة طحين ..

الطريقــــــة
نعجن الطحين مع القيمر الى ان تصبح العجينة مطاطية ..ممكن اضافة رشات من الطحين اذا حسيتيها تلزق في يدج وانت تعجنين .. خذي بالج لا تحطين ماء او ملح او زيت او خميرة.. وبعدين ريحيها 10 دقايق .. وبعدين افرديها بالنشاب وقطعيها دوائر واحشيها ثم سكريها على شكل نص دائرة .. ممكن تحشينها بعصاج ناشف (من غير صلصة ) او خضرة هندية .. او جبن كيري (دايما اسويها والصغار يحبونها بحشوة الكيري )
وحمريها في الزيت لين يصبح لونها ذهبي ... خلي بالج لأنها بسرعة تتحمر
.. والحلو فيها انج بتلقين الفطيرة بعد التحمير صارت مثل خبز البوري الهندي عليه فقاعات..
وانا بعد اخترعت لها طريقة ثانية .. واللي هي اني عقب ما قطعتها دوائر حمرتها على طول بدون حشو ..فصارت مثل قطع خبز البوري الدائرية بس صغيرة قدمتها على العشا مع تشكيلة مربى وأجبان ...طلع شكلها رهيييييييييب .... وبالهنا والشفـــا