دوبني راجعة من لندن وتقريبا كل اللي في لندن قالوه البنات ما قصروا وعن سوق بربوش ولا مدي شسمه ما قد سمعت عنه الصراحة علشان كده ما أفيدك
بس فيه كما كنز رود وده قريب من النايتس بريدج وهو شارع طويل في محلات على الجانبين حلوة وبعضها مختلف عن اللي في اكسفورد .
وكمان عندك في حديقة كبيرة اسمها باترسيا حلوة ومنوعة والمميز فيها انهم يأجروا دراجات بكل أنواعها يعني من الدراجات أبو 3 عجلات اللي للأطفال الصغار لغاية دراجة يسوقوها 5 أشخاص سوا وفيها ركن لألعاب الأطفال يعني مرة فن صراحة.
والهايد بارك متعة بحد ذاتها وقريبة من وسط لندن ومتنوعة يوم تروحوا جنب البحيرة ويوم جهة ألعاب الأطفال والمراجيح والثالت تجلسوا في المساحات الخضرة تمتعي زوجك بالخضرة والوجه الحسن وأولادك يلعبوا قدامك.
وفيه مول كبير بره لندن يبعد حوالي ساعة إلا شوية وطبعا ما تروحي مع تاكسي لانه عداده حيعدي يمكن يوصل أكتر من 60 أو 70 باوند الأفضل تتفقي مع ميني كاب أو تاجروا سيارة مع سواق بالساعة . اي نسيت اسم المول ( بلو ووتر ).
وطبعا فيه الريجنت بارك وفيها تجديف وقوارب للأطفال ببدلات العجل وجنبها لندن زو حديقة الحيوانات.
وفيه لندن اكواريوم عند لندن أي اللي قالت عليها أوراق الزمن .
وفي منطقة ليستر اسكوير ودي اللي فيها السينمات والهيبز ورسامين الكاركتير والفنانين المتجولي وكمان فيها ملاهي أو بالأصح معظمها ألعاب الكترونيات وألعاب بسيطة للأطفال من 3 أو 4 أدوار . بس المنطقة دي زحمة شوية وفي الليل بتلم علشان كده روحيها قبل المغرب ( المغرب هناك الساعة 9 تقريبا ) ولا تكوني كاشخة كتير يعني لا تكوني ملفتة .
كمان اذا صدف يوم الأحد وما كنتوا مخططين لشيء روحوا الكوفيت جاردن هادي مو حديقة لكن زي الحارة أو منطقة صغيرة فيها أكشاك مرصوصة جنب بعض تبيع أشياء منوعة ألعاب ملا بس تحف كل شيء وفيها شوية بوتيكات بس الحلو فيها يوم الأحد لما تتعمل فيها عروض في وسط الشارع مهرجين عازفين أكروبات مرة ممتعة بس هي تقفل بدري أعتقد 6 وماهي كبيرة كتير يعني لا تضيعوا يوم كامل عليها .
وبعدين عندي اضافة صغيرة اليوم اللي تتسوقوا في اكسفورد وجالكم وقت الغذاء في مكان في مطاعم مرة حلوة ومنوعة يعني اللي تبغي تلاقيه ايطالي تركي مغربي فرنسي لبناني كله قريب من بعضه صراحة ما أعرف اسمها لكن
كيف توصليلها ؟؟ شوفي وانتي ماشية يكون سلفردجس علىيسارك تمشي لين محل جاب يجي على يسارك تدخلي بعده حيكون على يمينك محل بودي شوب وبس تمشي شوية وابدي نقي من ذيك المطاعم وبالهنا والشفا واتمنالك سفرة موفقة انتي وعيلك يعطيكم ربي خيرها ويكفيكم شرها.

اهلا بك

قضيت في لندن اجمل ايامي ..وانصحك بمتحف الشمع اعتقد اسمة مدام توسو ان كنت ماني غلطانة

وكمان اسواق شارع اديجوال رود واللي يسمونه شارع العرب وكمان ساحة التلفغار او الطرف الاغر راح تطعمين الحمام وتختفين من كثر مامغطيك الحمام

ومحل A&C

وسوق الاحد بسيط وحلو وكمان التون تاورز ممتع


((للمعلومية معلوماتي قديييييمة من 12 سنة ))


ولاتنسين ان تأخذي معك كتيبات تدعو للاسلام وتعرف بة باللغة الانجليزية واتركيها في بعض الاماكن العامة علها ان تقع في يد احدهم واتركي بها رقم تلفون مركز اسلامي يعودون الية في حالة الاستفسار

وكوني سفيرة لدينك ووطنك ...:17:

أعطر سلاااااااام

ورحلة سعيدة

والله يا اختي العزيزه ما قصرتي كفيتي ووفيتي علي هذي المعلومات الحلوه مثلك
بس بغيت اعرف محل ماركس وسبنسر بعد يكون في شارع اكسفورد والا له مكان ثاني

مشكورة اختي الوردة الجوريه علي مساهماتك واتمني اني اكون خير سفيره لديني ولبلدي

وردة الشارجة ايوة ماركس اند سبنسر موجود في شارع أكسفورد وله فروع تانية بس ايش تبغيبه يابنت الحلال الله يغنينا عنه ومن ترك شيئا لوجه الله عوضه الله خير ان شاء الله . والمحل ده معروف 100% انه أكبر داعم للكيان الصهيوني اللي يسموه اسرائيل ده غير انه مخصص ريع يوم السبت والأحد كله لهم ولما تروحي شوفي بعض صلاة الجمعة كيف المحتجين والمتظاهرين مسلمين ومسيحيين عرب وانجليز واقفين قدامه ويوعوا الناس بفعايله ويجمعوا التبرعات للفلسطينين .