انا متابعه المنتدى من سنيييين بس ماكنت افكر اشارك مادري ليه ,,لين جا اليوم اللي تطق براسي:05: واقول ليه ماسجل واكتب اللي عندي حتى لو شي بسيط يمكن احد يستفيد لو بشي والاقي دعوه حلوه منكم
بكتب لكم بهالموضوع اشياء لو تتبعونها مع العنايه الخارجيه بيصير كلو تمام ان شاءالله واللي مهمله نفسها وتبي ترجع للعنايه بس مهيب عارفه وشلون وكيف تبدا تقرا موضوعي وان شاءالله تستفيد
ماراح احط شي واجد واللي انا بكتبه مو لازم تتبعونه بحذافيره كل وحده تاخذ الشي اللي يناسبها وتسوي اللي يريحها
نبدا
بسم الله الرحمن الرحيم
اول شي مستحيل تلاقين نتيجه بجسمك او شعرك او بشرة وجهك وانتي مهمله اكلك وماتاكلين كويس
جسمك وشعرك محتاج تغذيه كويسه وصحيه عشان تطلعين مزه (متعوب على مزه ههههههههه)
انا مثلي مثلكم اموووت على الشيبسات والقهوه والحلا مايمر يومي بدونهم بس بديت اصحح نظام اكلي وأمشي على نظام معين
الكلام طويل شوي بس كله مفيد ان شاءالله وبأقل من خمس دقايق بتقرينه
اول شي
تروحين تكشفين عند دكتوره تشوفين اذا فيك انيميا (فقر دم يعني) او اذا فيك نقص فيتامينات وخليها تصرف لك الفيتامينات اللي انتي تحتاجينها لشعرك وجسمك (لاااازم تروحين ولاتاخذين شي بدون استشارة الدكتوره لانك راح تضرين نفسك بدل ماتفيدينها لان كثرة الفيتامينات او اخذها بدون وصفه تضرك ماتفيدك
.........................................................................................
..............................................................
ثاني شي الاكل الصحي والمفيد
كلنا ناكل مقالي ونشرب قهوه وشاهي ومشروبات غازيه وغيره وبالاخير نشوف الاسيويات ونتحسر على اعمارنا ليش هم كذا وليش احنا كذا
انا ماقولك خلي اكلك كله مفيد واحرمي نفسك من كل شي تحبينه لاا كولي بس قللي الاشياء اللي مامنها فايده قد ماتقدرين انا عن نفسي مخليه لي يوم مفتوح واخبص فيه زي مابي (بس باعتدال مو تخبصين كثير عشان المعده ماتنهبل مسكينه هههههههههه ,, اما باقي ايام الاسبوع خليه اكل صحي ونوعي بالاكل عشان ماتملين
الوجبات خمس وجبات باليوم **الكلام من اخصائيات تغذيه مو من عندي**
فطور سناك غدا سناك عشاء ,,ولاتاكلين شي بعد الساعه 8 ولو جعتي كولي ورقيات زي السبانخ والجرجير والخس ... (تنبيه)..... لااازم اذا كنتي بتسوين دايت او تعتمدين نظام الاكل الصحي تحطين لك يوم تكسرين الروتين فيه عشان المعده تحرق سعرات ....ومانصح للريجيمات المنتشره بالمنتديات لانكم ماتدرون عن صحتها اتبعي شي من اخصائيين تغذيه.
( البيض مايكون اكثر من 3 بيضات بالاسبوع) انا اكله مرتين او ثلاث مرات بالاسبوع بالكثير بس مايمر علي اسبوع بدونه لو بيضه وحده )
والسمك واللحوم مفييييده بس على حسب نوعه وطريقتك بطبخه (كولوه باعتدال لا افراط ولاتفريط) السمك لايمر عليك اسبوع بدونه لانه مفييييد
...............................................................................
........................................................
ثالث شي
الشرب (وَجَعَلْنَا مِنَ الْمَاء كُلَّ شَيْءٍ حَيٍّ أَفَلَا يُؤْمِنُونَ } صدق الله العظيم . سورةالأنبياء30
شفت كثيير اخصائيين تجميل واول شي ينصحون فيه كثرة المويه
اشربي ثلاثه لتر مويه باليوم جيبي لك جيك وعبيه وحطي معه موية ورد وقسميه على اليوم كله ..فيه صوره منتشره لبريطانيه كيف الفرق بين وجهها لمن انتظمت على شرب 3 لتر مويه ب 3 شهور بس
وجهها تغييييييرر وصارت اصغر بالعمر صار وجهها منور ومشدود اكيد اغلبكم شافوها ومن عقبها تشجعت اني اشرب هالكميه من المويه ,, بتقولين مابي اتردد لدورة المياه_ الله يكرمكم _ بقول لك اول الايام بس بعدين وش تبين بالاملاح الضاره بجسمك خلي السموم والاملاح اللي بجسمك تطلع
لاتشربين المويه وانتي واقفه وعلى دفعه وحده اجلسي وسمي بالله واشربي شوي شوي لان كان عندنا دكتوره تقول لنا كان يطلع من حلقها دم فلما راحت تكشف قال لها انتي تشربين المويه دفعه وحده وهذا مضر مايصلح اشربيه على دفعات صغيره وانتي جالسه
شرب العصاير الطبيعيه من الفواكه والخضار الفرش اللي يكون طازج وانتي توك عاصرته مفيييد لجسمك وشعرك وبشرتك وكل شي فيك وانتبهي من العصاير اللي بها مواد حافظه لانها تظر
انا لي كم يوم ااعصر لي الفجر برتقال واشربه (احيانا يجي مغص خفيف مادري لانه على الجوع او مادري ليش)بس بعد كم يوم ماصار يمغصني يمكن لاني تعودت عليه,,,,, بعصر معه خضار وفواكه غيره واصير اعتمده فطور (اعصري ورقيات خضرا مع الفواكه مره بتفيدك ان شاءالله
والطريقه ذي شايفتها باليوتيوب امريكي وزوجته وبنته كلهم مع الفطور او بدال الفطور يخلطون فواكه وخضار مع بعض ويشربونها زي العصير وماشاءالله بنتهم صحتها وخدودها تفتح النفس
برضو شرب الاعشاب حلو بس ماحب انه يكون اكثر من كوبين باليوم بالكثييير بالنسبه لي اغلب الاحيان اكتفي بكوب واحد وانوع احيان بابونج واحيان ينسون واحيان شاهي ابيض والا اخضر مع الزنجبيل وغيره
واهم شي النوم
اذا نومك منتظم تنامين بالليل وساعه الظهر قيلوله صدقيني بيعكس هالشي عليك وعلى بشرتك وصحتك
اما اللي تنام الفجر لين آخر النهار وتقوم هاذي تبشر بالهالات السودا والبشره التعبانه والنفسيه الزفت صدقوني مجربه ولين اللحين احاول قد ماقدر انظم نومي
هذا اول موضوع لي واذا شفت تشجيع منكم بنزل مواضيع ثانيه ان شاءالله :biggrinlo :smheart:
بس عندى سوال انا في الاربعين وجهى تعبان مرة هل التغذية ترجعنى زى اول
ولا لايصلح العطار ما افسدة الدهر على ما قالوا
لا الة الا انت سبحانك انى كنت من الضالمين:7_5_131: