قرأت الردود واحس انه ربما فيه مبالغه من صاحبة الموضوع او يمكن سوء تقدير للواقع

انا من الاشخاص اللي اشجع كل بنت متزوجه او عزباء انها تحقق طموحاتها واهدافها وتسعى في الوظيفه وايجاد مصدر دخل خاص فيها ويكون لها استقلاليه وامان مادي ..
لكن بنفس الوقت موضوع النفقه عليها كزوجه وأم ومربيه ونفقه على البيت والاطفال والكسوى لا تسقط عن الزوج حتى وان كانت الزوجه مليونيره واجب عليه كزوج الانفاق على بيته واهل بيته ..

واذا الزوجه بطيب نفس تنازلت عن حقها في النفقه شي راجع لها ومحد يقدر يجبرها تاخذ من زوجها ورفضها لا يسقط النفقه عن مثيلاتها من النساء .
بشكل عام الحياة الزوجيه اذا ماكان فيها قوانين واضحه فيما يتعلق بالانفاق والمعيشه بيكون في خلاف كبير واتكالية وتنصل من المسؤليات من الطرفين والحمدلله الشرع ضبط هذا الموضوع بالعدل ..

وحتى في دول الغرب الزوجين يصير بينهم اتفاق وممكن الأم بما انها تحمل وترضع وتهتم بالاطفال تختار تجلس بالبيت والزوج يشتغل وممكن الزوجين يشتغلون وكلن له راتبه لكن يبقى في رقبته اطفاله وبيته يصرف عليهم حتى اللي تتطلق الزوج بالقانون ملزم يحمل مسؤلية اطفاله مايسقطون عنه ..


يعني الحياة ماتمشي حسب ظروفك الخاصة واختياراتك الشخصية وتطالبين بتعميمها على جميع الناس

لان اللي يناسبك ويريحك غير مناسب لكثير من العوائل ..
ومثل ماذكرت في ردودي اذا الزوجه بكامل قواها العقليه وبإرادتها تنازلت عن نفقتها هي حره تتحمل نتيجة قرارها محد يقدر يثنيها عن قرارها الشخصي ولا يتدخل في حياتها ..

كذلك باقي الناس اللي اختارو ان نفقتهم ياخذونها من الزوج والأب بالتراضي بينهم لهم كامل الحريه في حياتهم .



واحب اقول شي الفرق بين المسلمه اللي تختار تتنازل عن نفقتها وتصرف على نفسها وعلى البيت وبين الاجنبيه اللي تصرف على نفسها وعلى البيت انه في حالة الطلاق عند المسلمه ترجع بيت اهلها خالية اليدين ماتملك شي فقط تاخذ اغراضها الشخصيه اما الاجنبيه مثل امريكا في حالة الطلاق تحصل المطلقه على نصف الممتلكات مناصفه بينها وبين الطليق يعني مافي مجال للمقارنه والمطالبه بإسقاط النفقه !

عواطف

شكرا على التعليق
من ناحية الحقوق والواجبات كلامك ١٠٠٪؜ ومافيه عليه اي اعتراض ولكن...
لو انا ابغى اغير الحسبه
انا ابغى حقوق مختلفه وبالمقابل بؤدي واجبات مختلفه


انا ابغى يكون لي حرية العمل وتحقيق ذاتي يعني اني بطلع من البيت ساعات طويل كل يوم ومو معقول مقابل هذا الشي ما ادفع ولا ريال في البيت ولا حتى نفسي ما اصرف عليها! كذا فيه ظلم


انا ابغى زوج يساعدني في شغل البيت ونقسم المسؤليات يمسك الاولاد عشان اطلع او لو صار عندي عمل ولو عندنا طفل رضيع يساعدني فيه ولو صحى في الليل موب ينزعج ويهاوشني يقول اطلعي نامو برى انتي وولدك صجيتوني لا بالعكس نقسم الوقت مره انا اصحى ومره هو


ابغى احيانا لو احتجت اغير جو اقدر اسافر مع صديقاتي او اخواتي لحالنا بدون زوجي هل يعقل بسوي كذا وانا ماعندي استقلال مادي؟


ابغى لو اهلي احتاجو اساهم ادفع اجار شقه لو احد من اهلي انزنق او ادفع قسط سياره لاخوي الصغير


ابغى ايضا اساهم في تأمين مستقبل اطفالي الزوج لحاله لو كان مجرد موظف مابيقدر يأمنه


كثير من هذي الاشياء ماديه ومعنويه ولو صرتي مساهمه في البيت وناجحه في عملك الزوج بيتحمل يشارك معك لانه شايف نتيجه (وطبعا اختيار الزوج من البداية له دور مو معقول يكون هذا طموحك وتوافقين تتزوجين شخص يبغى زوجة زي جداتنا لازم يكون عارف وش تطلعاتك عشان يكون على بينه من البداية)


دايم اشوف حياة الفاشنيستات واستغرب كيف ازواجهم يرضون بنمط الحياة هذا الي كله استهلاك وتفاهه واهمال لاطفالهم.. اتذكر مره وحده ميك اب ارتست كويتيه حطت مكياج لزوجها عشان تورينا! استغربت كيف وافق على كذا؟ بعدين عرفت السبب. السبب انها تدخله ملايين لذلك يضغط على نفسه ويتنازل ويتحمل.


الاشياء المادية هي جزء بسيط من المعادله وفيه اجزاء اخرى مثل المساهمه في بناء البلد واكتشاف مواهبك الخاصه واستغلالها (احيانا بيئة ربة المنزل والبيت غير مناسبه لاكتشاف المواهب) يعني مثلا قوليلي لو وحده عندها موهبه خارقه في القدرة على التأثير والتحدث "الببلك سبيكنق" في المؤتمرات مثلا الخ كيف بتكتشف قدرتها هذي وهي في البيت. قريبتي ربة منزل وعندها دبلوماسيه عاليه جدا جدا اتوقع انها تنفع في الخارجية او سفيره بس محد اكتشفها ولا حتى هي اكتشفت ذاتها لان بيئة البيت ماتضعك تحت الاختبار والاكتشاف


شويه واكمل الرد

طيب هذا جزء والجزء الاخر ان الانسان كيف ممكن يتطور ويصير واعي وافقه واسع وتتنمى قدراته وهو مسكر على نفسه الباب.. البشر تتطور من الاحتكاك والتعليم والسفر والتجارب والقراءة واغلب هذي الاشياء تحتاج انسان حر مستقل ماديا.
حتى زوجك مع الوقت ممكن يتطور ويتطور ويتطور وينمو بسبب كل هالعوامل وفجأة تصيرين عاجزه عن مجاراته ويصير ينظرلك انك مو على مستواه الثقافي والعقلي ووعيك اقل من وعيه ويصير يستخف بك ودايما نسمع الرجال يقولون "كلام حريم" يقولونها باستهتار

اعرف ان احيانا الانسان مايكون بيده الخيار وظروفه وتربيته تفرض عليه نمط الحياة هذا الي اشبه بحياة امهاتنا ولكن طرحت الموضوع عشان اعرض نمط حياة مختلف واسمع من كل الاطراف ممكن فيه شي فاتني او يغير قناعتي. وطبعا ما افرض شي على احد انا طرحت حججي وممكن اي احد ينقض بحرية كامله واحترم هذا الشي. والي اقتنعو بالكلام ولكن فاتتهم الفرصه على الاقل خلونا نتداركها في بناتنا ونربي جيل مؤمن بالعمل وبالاستقلال المادي. مع ان الفرصه عمرها ماتفوت وفيه ناس بدأت متأخر بعد ماكبرت عيالها ونجحت في تحقيق ذاتها

كنت مثلك .. اموووت من الجوووع
و السبب ... انا مسسستحيه اطلب
كل ما اتذكر الغبااء الي كان فيني وقتهااا ادق على راااسي
لحي و لللحي و لحيييي و عوووديه ع الطلبات و المصاريف و خذي منه مصررروف لك .. و عوديه يعطيك فلووس كااش دايمااا .. البوكي مالتج لا يفضى 👍🏻
وزني ع المطبخ و الادوات الاساااسيه .. ترا فرصتك لا تضيع عيشي دور الدلوووعه الغنووجه و اطلبي فطور غداا و عشااا ... يمكن ابن الاجواد ما يعرررف و السبب تستحين تقوليله🤣🤣 مثل زوجي كان انتضره منه فيه يفهممم بس الرجل موب كائن متعدد المواهب مستنيه منه يقرا افكاارج ... لا حبيبتي
مشكلتج .. عقده لساانك فكيهاا و بس.. و تعلمي اطلبي باسلووووب حلوو و غنوووج و شوويه دلع
فرصتك .. اول سنه زواج لا تعوووض..
عيشي و تدللي 💜

ماقريت كل الردود
بس واضح المبالغة الشديدة من صاحبة الموضوع
انت موظفة وتصرفي على نفسك وراضية شي جميل الله يوفقك
بس مستحيل يكون وضع اللي زوجها يصرف عليها مررررة غريب بالنسبة لك
ليه وين عايشة انتي حسستيني انك بجزيرة لوحدك


طيب انت شايفه انه طلب الفلوس من الزوج مرررة صعب ومؤلم ومذل
طيب ليه مايكون كمان أخذ الموظفة فلوس من صاحب العمل شي صعب ومؤلم ومذل
راح تقولي لأنه من حقها تاخذ فلوس مقابل عملها و مجهودها بالعمل .. صح
طيب حتى الزوجة من حقها تاخذ فلوس من زوجها لمجرد موافقتها على الزواج منه وتقديمها لحقوقه اللي أقرها الشرع الموضوع مافيه مذله ولا ألم ومايحتاج دراما
لكن رغم كذا انا أؤيد انه المرأة تحاول تشتغل ويكون لها راتب مستقل مادياً ماهو عشان تتنازل عن صرف زوجها لها لكن عشان تحسن وتطور حياتها أكثر وتحقق طموحها وتأمن نفسها