اصلع وحليوة 00

بسم الله الرحمن الرحيم .

طبعا العنوان حيشد الصلع واهل القصات بيدخلو يقرأو الموضوع من باب الشماتة فينا يالصلع .
ولكن موضوعي يخص الصلع فقط ولو سمحتم يأبو غرة تطلع برا . وهذة اسرار تخص الصلع مثلي وشرواية من المصلعين.
بما اني اشهر اصلع في عائلتي واتعايشت مع صلعتي من يوم كان عمري 20 سنة وفي البداية كنت متضايق بالمرة وخاصة ان اغلب اصحابي ما يدرون ايش مخبية هالتشخيصة ولاول مرة افرح اني سعودي علشان الغترة والعقال ويوم يكونو البشكة مربعين بلوت كل واحد فيهم يعلق غترتة ويشخص علي بشعرة وانا الوحيد الي كاشت بالغترة علشان لا يكتشفون السر الي مخبية تعرفون شباب ومحشاتهم والقبر .
وسرت انطوائي الشباب يسافرون وانا بأموت من القهر وكل مامريت من عند صالون حلاقة اوقف واطالع من برا المحل وكلي حسرة على الشعر الي ينقص وينرمي وقلبي يتقطع .
وما فية احد حاسس وقتها بمشكلتي ويوم اني تجوزت0 ليلة الدخلة رقدت بالطاقية وعلشنها عروس مستحية تسألني الين فتن علي اخوي الصغير وعدت الازمة على خير ولانة في عقد النكاح ما كانو مشترطين علي اني اكون بشعر .
وقدرت اتعايش ولله الحمد مع صلعتي وبمباركة من زوجتي اقلها تضمن انة ما فية احد بيطالع في وجهي .واذا كانت مستعجلة ما يحتاج تناظر المراية نظرتين في صلعتي وهي تشوف نفسها وتشخص بمزاجها
علما ان الصلع ارتبط بالمشاهير والعضماء ومنهم من اخلص لصلعتة وما غير من معالم شكلة مثل رؤساء دول وكتاب ومفكرين وبعض المشاهير من الفنانين والمذيعين على رأسهم الدكتور الخطيب والدكتور عماد الدين ومن المطربين الراحل طلال المداح والفنان احمد بدير والموجي وغيرهم كثير والي اتنكر لصلعتة وباعها برخيص مثل سمير غانم 0 وحيد سيف 0 سمير صبري 0 ياسر العظمة 0 يونس شلبي 0 وانظم لقافلتهم اخيرا الفنان عبد المجيد عبدالله .
والي زاد الطين بلة ان السينما ساهمت في هضم حقنا ورسمت البطل دائما حليوة ابو شوشة ومرة يجينا بفرق يمين ومرة يفرق شعرة يسار وحطو الاصلع يااما حرامي والا قهوجي والاغاني كمان استفزتنا محمد عبدة يغني ( هلا يابو شعر ثاير ) ومطربة تقول ياحلاق اعملي غرة ونجاة الصغيرة تقول ضفائرة منذ اعوام يربيها .
وكل يومين والثاني جايبين دعاية عن الشامبو ماعاد فية لا حياء ولا احترام للصلع ولا فكرو حتى يخترعو شامبو للصلع ولو جبر خواطر ويش فيها لو غنو مثلا عن الصلع مثل الست ام كلثوم لو قالت ماخطرطش على بالك يوم يااصلع تسئل عني .
والا فريد الاطرش يابو صلعة جنان مليانة حنان والا الراحل بن مداح ياصلعة تحت المطر تسعى والحقها بحجر .
ولكن قررت ان اعمل جمعية خاصة للصلع ونسوي منتدى خاص فينا ونسمية صلعيات ونشرط ان يكون جميع الاعضاء من الصلع ونخصص صفحات نسميها صلعة الواحة صلعة الادب صلعة القشرة صلعة الفكر اما الاعضاء اذا كان الواحد مبتديء وتوه جديد نكتبلة عضو بداية قشرة واذا كتب اكثر من 30 موضوع نسمية عضو بداية صلعة واذا الله وفقة واستمر نكتب عضو اصلع واذا تعدت مواضيعة 100 مقال نكتب عضو اصلع جدير بالاحترام .
لذا اخواني الصلع فلنتحد معاً ضد الحملات البربرية ضد الصلع والمصلعين ونحارب الباروكات وزراعة الشعر فنحن خُُلقنا بهذا الشكل وسنضل كما خلقنا الله متفاخرين مجاهرين بصلعاتنا حتى وان لم تعجب البعض ابقو على صلاعاتكم ولا تفرطو بشبر منها فهي تبقى عزيزة وان جارت علية .

عنترنيت