اضطريت اعتذر لاختي على شي تافه

انا مشكلتي من يوم تزوجت امي مانعه علي اقول اتفه كلام لزوجي بتقولون طيب لاتقولين لزوجك شي اي صح ما اقوله الاخبار والاشياء الكبيره والخاصه لكن في شغلات يوميه تافهه زي يوم هو يقولي اخواتي يحبون يسهرون هذا مو سر وبنفس الوقت مجرد كلام عابر ماله معنى بس عند اهلي يعتبرون اني افشيت اسرارهم يعني عندي وحده من اخواتي تكره الاعراس كره العمى مره جانا عرس وحضرنا كلنا رجعت بيتي من ضمن السوالف قلتله اختي فلانه ماحضرت قال عسى ماشر يحسب صار شي كبير قلتله لا بس هي ماتحب الاعراس وبعدها بفتره قلت لاختي هالكلام على سبيل السوالف لا اكثر زعلت ووجها انعفس قال من قالك اني اكره الاعراس؟ انا احبها لايكون قلتي لزوجك اني اكره الاعراس؟ انا وجهي صار علامات استفهام وجاني قلق مع ان الموضوع سخيف
ومره من المرات اختي ووحده من اخوات زوجي حملوا بنفس الوقت المهم زوجي واخته وامه علموني عن حمل بنتهم اما امي واختي حذروني لا اعلم زوجي وانا قلت معهم حق مابعلمه وبسكت لان الموضوع سخيف وبعد خمس شهور اختي بطنها كبرت وصارت عزومه وحضرنا كلنا انا واهلي وحمولتي المهم اخت زوجي انتبهت لبطن اختي الاعمى يدري انها حامل ووجهي صار الوان ماصرت قادره احط عيني بعين اخت زوجي المهم اخت زوجي زعلت ورمت علي كلمتين ان في ناس نعدهم اهلنا وهم مايستاهلون هالمعامله واكتشفت شي اكبر اكتشفت ان اهلي معلمين كل الناس ومخبيين فقط على حمولتي طيب حمولتي اكيد بيتحسسون لو الموضوع تخبى عن الكل اهون لكن بس هم اللي مايدرون فشله على وجهي انا والمشكله الاكبر بيقولون اهلها مسيطرين عليها وتخاف منهم لدرجة مو قادره تقول اتفه الامور وخصوصا زوجي دايم يسمع اخر واحد عن اي شي يتعلق بأهلي
ولو حمولتي ملاقيف بقول يستاهلون معاملة اهلي كفوهم لكن ولا مره سألوني عن خصوصياتي انا عشان يسألون عن خصوصيات اهلي
المشكله المعامله هذه حتى معاي انا تصدقون اني اتصل على امي واثناء السوالف تعرفون انتم الامهات الكبار يقولون اللي يطري على بالهم فقالتلي امي اختك سوت سونار وطلع اللي ببطنها ولد وماقالتلي انه سر علمتني عالموضوع وبس بعد كم يوم اتصلت اختي وقالتلي ترى اللي ببطني ولد قلتلها ايه امي علمتني وعينك ماتشوف الا النور قومت الدنيا وليه امي تعلمك الحين بوريها ؟ وليه امي ماعلمتني انها علمتك ؟ تفاهمت معها وانهينا السالفه وهي تافهه بس هي كبرتها
اختي الثانيه المخطوبه بيوم وانا اسلم على امي قلتلها ان شاءالله يعطيها مهر يكيفها وزود قالتلي امي هو اتفق معنا انه بيعطيها مهر بمبلغ كذا بعد كم يوم اختي قالتلي ترى بيعطيني المهر قريب انا قلتلها يارب انه يعطيك مبلغ كبير يفرح قلبك وتصرفين لين تشبعين قالت وش قصدك لايكون مفكره انه بيعطيني مهر قليل ؟ انا لو قلتله عطيني مليون بيعطيني

ومره وحده من خواتي انخطبت وام الخاطب اتصلت على امي بعد الشوفه وقالت لامي مافي نصيب جات امي وقالتلي انتبهي تقولين لزوجك ان الخاطب رفض اختك تراني علمت الناس ان حنا اللي رفضنا الخاطب ونشروا اهلي هالكلام بين اقاربنا ان اهلي هم اللي رفضوا الخاطب مع ان العكس صحيح ! وقرايبنا كلهم الحين معتقدين ان اهلي اللي رفضوا الخاطب والولد ياغافلين لكم الله هو اللي رفض واضطريت اقول لزوجي هالكلام الكذب عشان لاتصير مشاكل والمضحك المبكي ان امي لو جابت طاري الخاطب اللي رفض اختي تقولي فلان اللي حنا رفضناه كيت وكيت! تعيد وتكرر بكلمة فلان اللي حنا رفضناه وانا وهي لحالنا مامعنا احد يعني يكذبون الكذبه قدامي ويبوني اصدقها حتى بيني وبين نفسي ولا اعترض ولاتصير مشاكل وكلام جارح
وبيوم جات اختي المتزوجه وقالت شوفي هالاسوره الذهب زوجي جابها لي قلت الله يهنيك وش المناسبه وتزعل زعل الله لايوريكم طيرت حاجبها فوق وقالت ترى زوجي يعطيني بمناسبه وبدون مناسبه المهم اعتذرت لها وقلت لها حقك علي وانا اسفه ما اقصد
انا مع اني قادره ارد عليها رد يجرح لكن سكت عشان لا اخسر علاقتي بأختي لحمي ودمي ويوم ارجع بالذاكره لورى يوم زوجي عطاني مهري فتحته قدام خواتي مع انه كان قليل وخليت خواتي يشوفونه ريال ريال ولا كابرت ولا سويت حواجز عادي عندي ان اخواتي يشوفون عيوبي زيما يشوفون ميزاتي لكن خواتي لا لازم يكونون قدامي ميه ميه ومو ناقصهم اي شي وخصوصا يوم تزوجت صاروا يحرجوني مع زوجي واهله على مواضيع تافهه اياك تعلمين واياك تقولين وكذا مره زوجي يكتشف من الناس يقول اختك صارلها كذا وكذا انتي معقول ماتدرين ؟ وجهي يصير قد النمله ان قلت ادري او ما ادري كلها تفشل
وهذا حالي معهم بكل شي وانا تاركتهم بس افضفضلكم لاني حيل مضايقه بس مجرد افضفض الاخوات مو كذا علاقتهم المفروض مابينهم مكابره