اطباق منوعه لعجائن رمضان

المنين المصرى
المقادير:
1 كيلو دقيق (طحين)_ 1/2 1 كوب سمن سايح_ زرة ملح _1 ملعقة صغيرة شمر _1 ملعقة صغيرة يانسون _ 1 ملعقة صغيرة سكر _1 ملعقة خميرة فورية او قطعة خميرة بيرة فى حجم اليوسفى الصغيرة من عند الخباز _ 1/4 كوب ماء دافىء _من 1/2 ل 1 كوب حليب دافىء للعجن. 1 ملعقة كبيرة سمسم
الطريقة :
ينخل الدقيق و الملح و نضع عليهم الشمر و اليانسون و السمسم.و الخميرة.يقدح السمن على النار ثم نصبه على الدقيق ونبدء بالكبشة نقلب حتى يختلط السمن بالدقيق ونتركة شوية يبرد حتى تتحمل اليد درجة الحرارة ونبدء فى دعك العجينة كويس جدا ودة شرط نجاح المنين (نبس العجينة )نضيف الحليب شوية شوية حتى تتكون عجينة متوسطة و تترك الاناء نغطيها و نتركها فى مكان دافىء لتخمر اى تذيد . بعد ماتخمر نبدأ فى تشكيلها اما نأخذ قطعة فى حجم اليوسفى الصغيرة وندورها كويس بين ايدينا و نضعها فى صينية مش مدهونة و نبطط خفيف بأيدنا عليها او ناخد قطعة عجينة و بأيدينا الاثنين نبرم فيها امامنا على الترابيزة الى ان تصبح عصاية طويلة مبرومة نحضر السكينة و نقطع بالورب على مسافات متساوية وحدات المنين ثم نشيلهم بالراحة و نرصصهم فى الصينية و نبطط خفيف بأيدنا نترك المنين يخمر ثم ندخلة الفرن متوسط فى الرف الوسط حواللى 1/3 ساعة
ملحوظة : اذا استعملتى الخميرة بيرة يبقى تضعيها فى كوب مع السكر لحد ماتسيل خالص و بعدين تضعى الماء الدافىء و تقلبى و تتركى الكوب فى مكان دافىء لحد ماتلاقيها خمرت .ثم تضعيها على الدقيق بعد وضع السمن


البـــــــــــــــيتزا
المقادير:
2 ملعقة خميرة صغيرة+ م سكر+ 3 كوبايات دقيق + 1 كوب لبن + 1/2 كوب زيت ورشة ملح
الطريقة:
ضعى الخميرة مع سكر صغيرة وحطى عليهم شويه مية دافية وحطيهم بمكان دافى وياريت لو مظلم 10 دقايق يعنى مثلاانا بحطهم بالفرن بس من غير ما اولعه..يعدين هاتى ال دقيق اللبن + الزيت ورشة ملح وعليهم الخميرة واعجنيهم وسيبيها تخمر 3 ساعات ويعدين افرديها فى الصوانى وحطى عليها الاضافات اللى انتى عايزاها للبيتزا كل واحده حسب مابتحب وحطيها فى فرن حامى شغال مكن قبلها بخمس او عشر دقايق ودخليها لمده من تلت لنصساعة على حسب ما تفتحى الفرن وتشوفى الجبنه ساحت والعجينه استوت بس خلى بالك بلاش تحطيها فى الفرن من تحت عشان متتحرقش خليها على رف بالنسبة لسوى البيتزا انا ساعات بدخلها الفرن 5 دقائق تحت بدون الاضافات و بعديناطلعها ارمى فيها الاضافات و ارش الجبنة و معلقة زيت و ادخلها فوق يادوب تسيحالجبنة . و على فكرة اعملى الطريقة دى اذا كنتى حتشيليها فى الفريزر للطوارىءالشديدة توصلى للمرحلة بتاعة و ضعها فى الفرن بدون اى اضافات لمدة 6 دقائق بالضبطولما تبرد حطيها فى كيس فى الفريزروعند الاستخدام تطلعيها و يادوب ترمى عليهاالاضافات و تدخليها فى الفرن

كيكة البـــــــــيتزا
المقادير:
6 ملعقة طعام طحين+6 ملعقة طعام حليب بودرة+1 ملعقة طعام باكنج باودر+4 بيض+ربع فنجان صغير زيت+ثلاثة أرباع فنجان صغير لبن زبادي +1 فنجان صغير ماء+ربع ملعقة صغيرة ملح،الحشوة:فلفل أخضر مقطع مكعبات - طماطم مقطعة مكعبات - شرائح فطر - شرائح زيتون أسود - جبنة شيدر مبشورة(ممكن أستعمال لحم مفروم مسلوق أو ربيان مسلوق أو دجاج)
الطريقة
إدهني قالب الكيك (كيكات الكوب)cup cake بالزبدة أو الزيت (أو نفس القوالب الورقية و رتبيها في صينية فرن مدهونة أيضا) و سخني الفرن- خضري الحشوات- في وعاء أو زبدية أخلطي كل مكونات العجين بخلاط الكيك مع بعض حتى تتجانس(1 - 2 دقيقة- إملأي نصف القوالب بالعجين ثم إنثري الخلطة عليها و ليكن الجبن آخر شيء- قللي حرارة الفرن الى 180 درجة مئوية أو 350 فهرنهايت و أدخلي القالب و راقبيه لأن ينضج خلال (10 - 20 دقيقة أي يحمر العجين من أسفل) ثم حمري الوجه...

فطائر اللحم
المقادير:
للعجينة: 3 أكواب دقيق _ زرة ملح+كوب و ربع ماء دافيء +ربع كوب زيت +ملعقة خميرة جافة+نصف ملعقة صغيرة سكر
الحشوة: عصاج و علية معلقة كبيرة بقدونس مفروم
الطريقة:
نضع الخميرة مع السكر و ربع كوب الماء الدافىء ونقلبهم كويس ثم نضعهم على باقى المقدار تخلط باقي المكونات و نتركها لتتخمر لمدة ساعة أو ساعتين. تقطع العجينة لكرات صغيرة قد الليمونة تفرد العجينة حتى تصبح رقيقة وبعدين نجيب كوباية و ندوس بيها على العجينة عشان تطلع لنا دوائر و تحطى على كل دائرة معلقة عصاج و تجيبى طرف الدائرة على الطرف التانى حتبقى عاملة شكل القطايف ترص الفطائر في صينية مدهونه و تمسح الوش بالفرشاة بلبن و ندخلها الفرن لحد ما تلاقى لونها دهبى و ممكن تحمريها فى زيت

الفطاير بالكفتة
المقادير:
مقادير الكفته:- نصف كيلو لحم مفروم- بصله كبيره مبشوره- ملح - فلفل - بهار - نصف كوب بقسماط ناعم- بقدونس مفروم
مقادير العجينه:- 2 كوب دقيق - 2 كوب ماء مغلي- ربع كوب زيت- ملعقه صغيره ممسوحه ملح
الطريقة:
طريقة الكفته -- نعحن جميع مكونات الكفته جيدا ، طريقة العجينه- نضع الميه والزيت والملح في حله علي النار ونتركها حتي تغلي- نضع الدقيق ونقلب العجين ثم نرفعه عن النار- نترك العجينه تبرد .. ونكرر العجن جيدا ..- نشكلها كور صغيره في حجم الليمونه .. - نفردها ونحشيها بعجينة الكفته علي شكل دوائر- نمسح مقلايه تيفال بالزيت ونرص فيها الدوائر المحشيه -نتركها علي نار هادئه وهي مغطاه - نرشها بالماء من حين لآخر ونقلبها علي الوش التاني إلي أن تحمر قليلا من الجهتين - توضع في طبق التقديم ونجملها بالبقدونس

خبز الصاج ( الرقاق )
المقادير:
تقديريه 1 كيلو دقيق + ماء دافئ للعجن + ملح
الطريقة:
نكون عجينه طريه شويه وبدون خميره .ونقرصها كور صغيره علي سطح مرشوش بالدقيق ..نتركها مغطاه بقماشه ساعه لترتاح
طريقة الخبز للخبز كالصاج نحتاج إما صينيه أو مقلايه أو مصفاه ألمنيوم مستديره نضعها مقلوبه علي بوتاجاز متوسط الحراره
وقت الخبز نفرد فطيره بالنشابه بمساعدة دقيق مرشوش علي الرخامه نخبزها علي السطح الألمنيوم .. علي الجهتين وفي نفس الوقت نفرد فطيره أخري لنخبزها بعدها ..وهكذا .. إلي أن ننتهي من كل العجين .. يستعمل خبز الصاج أو الرقاق عندنا في عمل صينية رقاق أو سندوتشات شاورما يمكن عمل مناقيش وقت الخبز بدهن االرقاق بالزعتر أو الجبنه وغيره من أصناف المناقيش

طريقة أخرى لخبز الصاج
المقادير:
1 ك دقيق أبيض+2 ك دقيق قمح+½ م/ك خميرة+½ م/ك ملح+1 ك ماء
الطريقة:
تعجن جميع المقادير مع بعضها حتى تتماسك، ثم تكور على هيئة كور وتترك حتى تتخمر.تفرد كل وحدة من وحدات العجينة باليد مع رشها بدقيق القمح، ثم تقلب بين اليدين حتى ترق ويكبر حجمها.توضع العجينة على مخدة وترق أكثر حتى يزداد حجمها أكثر، ثم توضع على الصاج وهو ساخن، ويترك لدقيقة واحدة حتى تتكون فقاعات ويميل لون الخبز إلى اللون الذهبي.يرفع الخبز من على الصاج، ويترك حتى يطرى، ثم تحشى بحشوات مختلفة حسب الرغبة.* ملاحظة: يمكن استخدام نفس العجينة للحلويات مع زيادة:¼ ك سكر2 م/ك زيت

الفطير المشلتت
المقادير:
1 ك دقيق+ماء للعجن+سنه ملح وزيها سكر
الطريقة:
يوضع الماء قليلا قليل على الدقيق المنخول ويقلب باطراف الاصابع حتى يصير عجينه ونبدا بتفتيغ العجينه تفتيغ العجينه وهو العامل الاساسى فى نجاحها كفطير وهوه انك بتعجنى العجينه بايديكى وهى مقبوضه يعنى تقبض كف ايدك وتعكسى اليمين مع الشمال وتعجنى لمده ربع ساعه بالظبط وتمسكى قطعه من العجينه وتضغطى عليها بين السبابه والابها م ولو الضغط نتيجته طلعت العجينه رقيقه بدون اى كلكيع فيها خلاص سيبيها ساعه تهدا اما لو كانت فيها كلاكيع تبقى محتاجه عجن تانى وتكررى تانى لمده ربع ساعه وبعد ما ترتاح العجينه تقطع على شكل كورات بحجم كوره التنس الى ان يتم تقطيع المقدار كله وبرده تسيبيها ساعه تهدا
وبعدين تجيبى صينيه كبيره مفلطحه وتضعى عليها زيت زره وتبتدى براحه يدك تفردى العجينه الى ان تبقى رقيقه جدااا وتكبر على قد الصينيه تضعى فيها قطع من الزبد او السمن موش سايح يكون ماسك شويه وتوزعى السمن على كل الدايره وفى المنتصف
ثم تطبقى العجينه يعنى تجيبى اليمين فى النص والشمال فى النص وفوق فى النص وتحتحت فى النص وتلميها وتحطيها فى حاجه لوحدها على جنب ثم تجيبى كوره تانيه تفرديها زى ما عملنا فى الاولى بس من غير سمن وتحطى الاولى فى وسط التانيه وتلمى الاحرف تانى --الاحرف بتاعه العجينه التانيه تلميها فى المنتصف مثل الولى وتجمعى الاتنين على بعض وتجيبى صينيه مدهونه سمن وتضعى فيها الفطيره اللى هيه طبقتين وتضعيها فى الصينيه وتطبططيها شويه على مقاس الصينيه وتضعى على وجهها قطع السمن او الزبد وتوضع فى فرن شديد الحراره وعند احمرار الوجه تخرج ويقدم معها العسل الاسود او الجبن المصرى القديم

طريقة أخرى الفطير المشلتت
المقادير:
-كيلو دقيق - -نصف كيلو سمن سايح - -ماء دافئ للعجن - -ملعقه صغيره ملح - -حوالي نصف كوب زيت ذره لمسح وفرد العجين
الطريقة:
نعجن الدقيق بالماء والملح حتي تتكون لدينا عجينه تنفصل عن إناء العجن و طريه لتكون سهلة الفرد بالنشابه و نتركها ساعه لترتاح .. ندعك العجينه مرة أخري ونقسمها لعشرين قطعه مستديره وندهنها بزيت الذره ونضعها في صينيه بها زيت ونتركها ساعه ليسهل فردها .. وقت تجهيز الفطيره ندهن الطاوله بالزيت ونفرد قطعه من العجين لدرجه رقيقه و شفافه جداونمطها من الحواف ونضعها في صينية الخبز ونرشها بالسمن ونفرد قطعه أخري ونضعها فوق الأولي وندهنها أيضا بالسمن وهكذا حتي عشر قطع للفطيره الواحده وكل مره نرش السمن.. ثم نطوي الأركان الأربعه للفطيره للداخل . فتشكل مربع نلفه كالسويسرول ونتركه حتي نعمل الفطيره الثانيه بنفس الطريقه.. في صينية الخبز نفرد الفطيره باليد ونبططها بشكل مستدير نخبز في فرن ساخن علي درجة400في الرف الأوسط حوالي نصف ساعة ثم نخرجهاوندهن الوجه بالكريمه اللباني (القشده ) ونعيدها لتحمير الوجه تؤكل مع الجبنه وعسل النحل والقشده والبيض المسلوق ممكن خلط السمنه بزيت ذره لتكون فطيره قليلة الدسم ..

فطير مشلتت بالسكر
المقادير
نص مقدار الفطير المشلتت المكتوبة(فوق)يعنى مثلا+نص كيلودقيق +ربع كيلو سمن سايح+ماء دافئ للعجن +1/2م ص ملح
الطريقة
نعجن الدقيق بالماء والملح حتي تتكون لدينا عجينه تنفصل عن إناء العجن و طريه لتكون سهلة الفردبالنشابه و نتركها نص ساعه لترتاح ندعك العجينه مرة أخري ونقسمها لعدة كور مستديرة نعجن كل قطعة لوحدها نفردها و نرققها خالص وندهنها بالسمن السايح ونطبق اطرافها لجوة ( الى الوسط)و بعدين نبططها و نضع سمن سايح و بعدين نطبق الاطراف لجوة تانى وندهن سمن سايح وهكزا تفضلى تطبقى اطراف العجينة لجوة تتدهنى سمن و تبططى كل دة حوالى 6 مرات ورا بعض على طول ادهنى الصينية او صاجة بدون حواف بالسمن ودخليها الفرن متوسط الحرارة ولما تطلع من الفرن ترشيها بالسكر البودرة

بقسماط بالسمسم
المقادير:
5 كوب دقيق+كوب ونصف ماء أو لبن أو خليط منهم دافئ+ملعقه صغيره ملح+خميره بيره + ملعقه سكر+ربع كوب زيت + سمسم مغسول وناشف
الطريقه
ندعك الخميره مع السكر إلي أن تسيل ونضع عليها نصف كوب ماء دافئ ونتركها تخمر بأعجن البقسماط بطريقه سهله أضع في الخلاط الخميره والماء أو اللبن المذكور في المقدار والزيت والملح وأخلط جيدا أضع حوالي من 1 كوب إلي 2 كوب دقيق في الخلاط وأخلط ( علي حسب مقدرة الخلاط في اللف )خلط جيد حتي ينعم أسكب الخليط في طبق غويط .. وأكمل العجن بباقي الدقيق حتي تتكون عجينه متماسكه نتركها تخمر حتي يتضاعف حجمها أشكلها إما ببرمها أصابع طويله أو أصل الأطراف مكونه كعكه أدهن الوجه ببيضه + ملعقه كبيره لبن بودره مخفوقين أرش السمسم علي وجه الكعك أو أدحرج أصابع البقسماط علي السمسم مهم ترك البقسماط يخمر تانية ويتضاعف مرة أخري أخبز في فرن متوسط الحراره .. حتي يتحمص البقسماط

باتون ساليه
المقادير:
1 كيلو دقيق+نص كيلو سمنه+4 بيض+1 ملعقه صغيره ممسوحه ملح+1 ملعقه كبيره كمون+1 ملعقه كبيره خميره بيره + ملعقه صغيره سكر+حوالي من 1 إلي 2 كوب حليب أو ماء للعجن
الطريقه
ندعك الخميره مع السكر إلي أن تسيل ونضع عليها ربع كوب ماء دافئ ونتركها لتخمر نفرك السمن مع الدقيق نضيف البيض المربوب ونقلبه مع الدقيق نضع الخميره ونقلب نكمل العجن بالحليب .. حتي تتكون عجينه متماسكه وناعمه لتكون سهلة التشكيل
يضاف الكمون ونعجن مرة أخرى نترك العجينه تخمر حوالي ساعه نشكلها أصابع رفيعه كالقلم ..ونتركها تخمر نخبزها في فرن حرارته فوق المتوسط قليلا ونركها تنشف بعض الشيء طريقة الباتون ساليه سهله ..وبهذه القادير جميل جدا لكنها طريقه دسمه بعض الشيئ للإفطار اليومي أعملها في بوفيه المناسبات ..وممكن تقليل السمن بعض الشيئ .. بكده تكون وسط بين البقسماط والباتون ساليه

عجينة السمبوسه
المقادير:
3 كوب دقيق - نص كوب زيت - حوالي كوب ماء للعجن + ذرة ملح
الطريقة:
أفرك الزيت مع الدقيق حتي يختلط به بالكامل،أعجن بالماء حتي تتكون عجينه متماسكه .. وأستمر في العجن حوالي عشر دقائق مهم أن تكون العجينه ناعمه .. أتركها ترتاح حوالي نص ساعة أفرد العجينه رفيعه .. وأقطعها دوائر وأحشيها ..إما باللحمه المفرومه العصاج أو الجبنه أو الخضار
حشوة الجبنه :كوب جبنه مبشوره إما تركي أو حمراء - كوب جبن قريش مهروسه بالشوكه+نصف كوب زبادي - ملعقة نشا ناعم - 2 بيضه+ملح - فلفل أسود - ملعقة نعناع ناشف ناعم - 2 ملعقة بقدونس مفروم ناعم
أخلط جميع مقادير حشوة الجبنه ..وأتأكد من الطعم ..ممكن تكون محتاجه ملح قليل ممكن أي أصناف جبنه موجوده إستعمليها لو عندك جبنه بيضاء أو موتسريللا مثلا إعملي خلطه من الجبن .. أهم حاجه ما تنسيش النشا .. هوه إللي بيمسك الخلطه في القلي مع وجود البيض أيضا .. بعد حشو السمبوسه بالجبن إقفليها كويس وإقليها في زيت ساخن

عجينة الميل فى
المقادير:
كيلو دقيق +ذرة ملح +معلقة صغيرة بيكنج بودر+3/4 كيلو زبدة +2 كوب ماء للعجن +1/2 معلقة صغيرة عصير ليمون
الطريقة
انخلى الدقيق مع الملح و اعملى حفرة فى وسط الدقيق - نزلى الماء واحدة واحدة على الدقيق و افضلى اعجنى اعجنى بأيدك - لحد ما تتكون معاكى عجينة بس تكون جامدة ماسكة نفسها - بعد ما تتكون العجينة اعجنى فيها شوية بأديكى - افردى العجينة امامك على الرخامة على هيئة مستطيل طويل- رشى الزبدة بيادوب رشة دقبق صغيرة (علشان تسحب الماء اللى موجود فى الزبدة)- افردى الزبدة على نص المستطيل اللى من ناحيتك مثلا بحيث تكون فى المنتصف و بعيدة عن الاطراف و الجناب - .اقفلى النص التانى الفاضى من المستطيل بحيث يغطى الزبدة و دوسى بأديكى على الجناب كويس - بالنشابة بالراحة افردى العجينة عشان الزبدة ما تطلعش منها و طبقيها على هيئة ظرف يعنى تجيبى الجنب اليمين فى نص المستطيل و الجنب الشمال فى نص المستطيل و الطرف اللى ناحيتك ترفعية لنص المستطيل و الطرف اللى هناك فى نص المستطيل كدة حتبقى شكلها بقى مربع او مستطيل صغير - ضعيها فى الفريزر بالظبط لمدة 15دقيقة ولا اقل ولا ازيد بين كل مرتين - تطلعيها بعد ال15 دقيقة وتكررى نفس عملية الفرد بالنشابه و التطبيق تانى و تحطيها برضة فى الفريزر 15 دقيقة تفضلى تعملى كدة لمدة 6 مرات
ملحوظة :سبب الفرد و التطبيق كل هزه المرات هو دة اللى بيخليها طبقات مورقة علشان كدة ماتقلليش عدد المرات اثناء الفرد بالراحة بالنشابة علشان الزبدة ما تطلعش لبرة ظبط الوقت بين كل تطبيقة و التانية مهم جدا احتفظى بها فى الفريزر فى كيس نايلون لحين الاستخدام
ملحوظة: طبعا علشان هى متعبة بس فى عمايلها فأنا من رأيى انك تتعبى مرة واحدة و تخليها عندك فى الفريزر

عجينة الباف باسترى puff pastry
نفس عجينة الميل فى بس الاختلاف الوحيد فى المقادير بس
المقادير :
كيلو زبدة +كيلو دقيق +ماء بارد للعجن +ذرة ملح+1/2 معلقة صغيرة عصير ليمون لكل 1/4 كيلو دقيق

حشوة للتارت المالح
المقادير:
كوب لبن – 2 بيضة – ملعقة نشاء – ملح – فلفل – شرائح جبنة رومى – شرائح بسطرمة
الطريقة :
نضرب البيض كويس ،نزوب النشا فى اللبن البارد و نضعه على البيض و نقلبهم كويس ونحط الملح و الفلفل بعد ما تكونى عملتى التارت و فردتيها فى القوالب المخصوصة للتارت نضع شرائح البسطرمة و الجبنة الرومى فى القوالب وبعدين نصب الخليط اللى عملناة فى قوالب التارت على الجبنة و البسطرمة بحيث اننا ما نملاش القوالب الا ل 3/4 القوالب فقط علشان هو حينتفخ اثناء السوى نضعهم فى فرن ساخن لمدة 5 دقائق و بعدين نخلية متوسط الحرارة تقريبا من 1/3 ل 1/4 ساعة

حشوة أخرى للتارت المالح
استبدلى الحشوة اللى فوق يعنى بدل الجبنة و البسطرمة نضع فى كل قالب حوالى ملعقة خضار مسلوق ونضع عليها طبقة خفيفة جدا من البشاميل الخفيف و نرش رشة جبنة رومى مبشورة وندخلها الفرن

حشوه أخرى للتارت المالح
المقادير:
2 بيضة +نص كوب جبنة شيدر+بصله صغيره +ملعقه كبيرة زبده +كوب لبن - فلفل اسود+وممكن زى ما انتى عاوزة قطع سوسيس او قطع مشروم او قطع دجاج

الطريقه
نخلط الزبده مع الجبنة والدقيق واعجنهم قطع صغيره واضعهم فى قوالب التارت وندخلهاالفرن لحد ما تصفر او تحمر خفيف وبعدين نحط ونوزع الجبنة الشيدر في القوالب
ونعمل الحشوه : نسيح الزبده ونقلب البصله فيها لحد ما تدبل و تصفر ونحط فوقها قطع الدجاج او السوسيس او المشروم ونوزعها في القوالب فوق الجبنة نخلط اللبن والبيضمع الفلفل وجوزة طيب ونصبه فوقها وندخلها الفرن عشر دقائق
التارت المالح نضع عليه حشوة جبنه أو دجاج مسلوق أو مع الخضار .. البسله .. الفلفل الحلو .. سبانخ .. مشروم .. أو ممكن جمبري .. وبعد كده نخفق2 أو3 بيضات مع كريمه وملح وفلفل أسود.. ونضعها فوق الحشو ..ثم الجبن المبشور .. بعد فرد التارت المالح بالعجينه نخبزه في فرن متوسط الحراره ..وبعد كده نحشيه .. ونعيد خبزه مرة أخري بالحشو

تارت التونة بالخضار
المقادير:
1/2 كوب زيت +1ونص كوب دقيق +زرة ملح+2 معلقة ماء للعجن +علبة تونة مخلوطة ب 2 معلقة مستردة+الخضار( فلفلة رومى خضراء – فلفلة رومى حمراء – فلفلة رومى صفراء – اكوسه مقطعة صغير – بصلة صغيرة مقطعة صغير – طماطماية صغيرة مقطعة صغير- ) ملح – فلفل – بهارات +معلقة كبيرة ثوم مهروس

الطريقة
نضع الدقيق و الملح و الزيت والماء ونعجنهم بأيدنا لحد ما تتماسك بس العجينة نفردها فى صينية التارت بنفس الطريقة السابقة مع رفع الجوانب وادخلها الفرن .حوالى 10 دقائق .بعد ما نطلعها من الفرن ادهن قعر التارت بالتونة المخلوطة بالمستردة ثم اضع عليها الخضروات و ادخلها الفرن لحد ما تلاقى جوانب التارت احمرت

طريقة الخضار للتارت
نضع فى مقلاية معلقتين زيت لحد ما يسخن اضع الثوم لحد ما يصفر خفيف وبعدين اضع الكوسة و الفلفل بالوانه والبصل و الطماطم مع التوابل نقلب كلة على النار لحد ما الخضار لونة يزهزة و يستوى يادوب تقليبتين وبعدين نصبه فى التارت طعمها جميل







التوقيع