اعرف الحل بس مااقدر انفذه

مراحب يابنات


اماني تنقل لكم قصتي بمعرفها ارجوكم انا راح اقرا كل ردودكم ابي ردود حكيمه لاني كثير تعبانه من حياتي
انا متزوجه من ٨ سنوات. زوجي اخذته عن غير اقتناع تام رغم انه مميزاته تحلم فيها اي بنت اخلاقه الكل يمدح فيها وبار باهله ومعروف ووظيفته ماشاء الله وشكله وسيم ويعطي اصغر من عمره بكثير. وكريم وعنده مروءه وشهم ولايحب يأذي حد وكمان ضميره صاحي على طول ويحب اهلي ويساعدهم بأي شي يبونه.
مشكلتي معه ماني عارفه القى لها حل وتعبت كثير كثير منه زوجي مار بتجربه طلاق من ملكه فماادري هل اثرت عليه. او هل زواج ابوه على امه وحرمانهم من العيشه الطبيعيه اثرت فيه ماني عارفه افسر وش فيه بالضبط
انا شخصيتي قياديه الكل يحترمني ويقدرني وصاحبه قرار وظيفتي كبيره زوجي اكثر انسان محطمني ومكسرني يعني ما يسولف معي ، ماعنده مبدا المشاركه ابداا ، ياخذ قرارات كثيره تخصني وتخصه بدون ما يرجع لي حتى، اتفاجا في امور مسويها عقب شهور او حتى سنوات ، اذا كلمته على طول يفشلني او يحترقني ولا حتى يناظرني ، يعاملني كأني انسانه ماتفهم زي البهيمه وكاني ما اعرف اخذ قرار ولا اعرف اتصرف ويزعزع ثقتي في نفسي وفي قراراتي ولا شي اسويه يمدحه ولا يتغزل ولا يدلع وتطور الحال ينام كثير بالصاله ومرات حتى ما يقرب لي يقول تعبان او مرهق او راحت عليه نومه وانا مع الصغار.
يشككني في نفسي وفي اي شي اعمله. ما يعرف يجاملني ابداا
يعني لو اعمل نشاط صغير لولدي للمدرسه واتعب فيه اقوله وش رايك يقولي مو حلو وانتي سالتيني عن راي استغرب والله ليه طيب ما يجاملني.
للامانه هو اخر كم سنه مر بظروف صعبه فقد امه واخوه ورطهم بمشاريع وديون وهو اللي وقف مع اهله وابوه وللان يساعدهم ويقولي الضغوط اللي امر فيها اصعب من اي مرحله في حياتي.
طيب انا وقفت معاه كثير وساعدته وساندته نفسيا وماديا ومخليته على الاخر يطلع للعمل ما يجي الا بالليل و انا انيم الصغار ماعندنا وقت حتى نسولف مع بعض او نتقوى طيب خل نطلع نسافر قليل مره كل طلعاتي لحالي مع اطفالي وانا متحمله الجزء الاكبر من تربيتهم هو عنده انه مش مقصر دام موفر لنا البيت والمصاريف. وما يعترف بخطا لو نموت دايم انا الغلطانه طبعا اطباعه وتصرفاته من اول الزواج كذا بس الان زادت
وش اسوي بعمري اموت حسره كل يوم على حالي وحظي عملت له كل شي
هديت تعاملت بلين بحب وحنان وقفت معاه وساندته وصبرته وحزنت لحزنه وفرحت لاي شي يفرحه عطيته وضحيت من وقتي وصحتي وفلوسي وتعبي وسعادتي وصبري وبرضو مو عاجب
قبل فتره عملو لي منظار قولون وطلع عندي ورم والحمدلله حميد الطبيب قال من الحاله النفسيه لانه القولون في غدد عصبيه وعطاني محاضره كيف لازم اهدي من نفسي مااقدر احس اني انطبخ على نار هاديه من افعاله معدتي دايم تالمني وقلبي وصدري احس بثقل عليه ومااقدر افضفض لاي حد مااحب الناس تعرف اسراري امثل القوه وانا اموت الف مره باليوم ماصرت اطيق اتعدل والبس بالبيت كان ودي اتزين واتضبط له اكشخ للدوام والطلعات بس
بالنهايه خلصت لشغلتين مافي ثالث لهم اما انه متعقد من طلاقه ويحسب انه اذا شارك زوجته وعبر عن حنانه راح تتسلط عليه وتحكمه او انه ما يحبني ابداا. طيب اذا انا عندك حالي حال البهيمه وما افهم ليه تخليني اربي عيالك.
انا في بالي امور نخلص البيت لانه لاطفالي ويرجع لي فلوسي اني موقع على نفسه لي اوراق وشيكات تحفظ حقي. وماابي اجرجر ابو عيالي بالمحاكم وبعد ما يستقرون اطفالي في بيتهم افكر جديا بالانفصال
اقترحت عليه مايحتاج يطلقوي يتركني اعيش لحالي مع اطفالي. ويجي اي وقت لهم اذا يحب ويتوكل براحته يبي يعمل برا او يتزوج يسوي اللي يبيه براحته. المهم ماابي اشوفه كفايه تجريح واهانه وتهميش اللي اطلبه ابدا مش شي صعب ابسط حقوقي ان يحترمني واعيش مثل اي زوجه يقدرني ويحسسني بقيمتي رفض هالاقتراح.
قلت له ننفصل يمسكني من يدي اللي تالمني خلي الاطفال وتوكلي. وانا مااقدر اتركهم ابدا مستعده اضحي بكل شي علشانهم المصيبه اخاف يجيني مرض من القهر او انجلط وينحرمون مني البارحه واحد منهم حضني وحضن ابوه ويقربنا من بعض يقولي احبكم ماما وبابا والصغير نروح اي مكان يسحبني بيد وبالثانيه ابوه يمسكنا حنا الاثنين . مواقف صغيره بس تبين وش كثر الاطفال يحتاجون الام والاب ماابيهم يتشتتون
كيف اصبر نفسي واعتبره مش موجود. انا طبعا ماانتظر منه شي ابدا وحتى وقت ما تكون فيه مشاحنات مااقدر اكون سعيده لاني قلبي مشحون مره







اماني شكرا عزيزتي ولا تنصدمي الله يخليك من امور اول مره تعرفينها عني.