اقرؤا قصتي مع شعري

تحيه كبيرة للجميع حبيت احكي لكم قصتي مع شعري ، في البداية خلونا أقولكم طبيعة شعري الا هي خفيف لا هو ناعم سايح و لا خشن مجعد وسط بس يميل للناعم مهوب كثير ، قبل الزواج كنت اعتني به عناية فائقة من تزييت و حنا و قناعات ، ولا عمري فكرت اني اصبغه والنتيجة كان شعري حلو ما يتعبني حتى ان واحده من صديقاتي قالت لي شعرك فيه لمعة غريبة شوي أشوف وجهي فيه و لدرجة اني ما كنت احتاج للاستشور الا في المناسبات الكبيرة حيث كنت اغسله أخليه ينشف شوي ثم امسكه كله كعكا على فوق الى ان ينشف مره وكنت أحط عليه كريم 21 حق اليدين والله رهيب للشعر حتى أمي و كل أخواتي يستعملونه وانا رجعت له بعد ان استعملت كل أنواع الكريمات .
بس بعد الزواج الله لا يوريكم صبغات و استشوار ، وكنت استحي أحط شي في شعري عند زوجي علشان الريحة لاني كنت استخدم زيت النارجيل الا ريحته قويه و طبعا زاد إهمالي له انتكس انتكاسه قويه اصبح شكله خشن و منتفش وباهت و بدون لمعة حتى ان فيه كثير من البنات ما شفتهم الا بعد زواجي بسنين ارتعوا وقالوا وشفي شعرك صار كذا ، انا وقفت مع نفسي قلت لازم أشوف حل مع شعري و أرجعه زي ما كان ، وان راح اكتب لكم البرنامج الذي كنت اتبعه و انا بنت ثم البرنامج العلاجي له بعد ما تزوجت لأنه طويل شوي:

البرنامج الأول: خلال أسبوع و كنت أبدا الأربعاء علشان المدرسة
الأربعاء: أكون عجنه حنا في الليل مكونه من: ( حنا + ليمون + خل + شوي زيت + ماء أو شاي ) إذا طلعت من المدرسة أحطه في شعري و الفه عادي واتركه الى العشاء ثم اغسله بالماء زين ، و اتركه الى ان ينشف ثم امشطه زين في الحمام طبعا حتى ينزل ما بقى من الحنة ، أكون مسخنه الزيت ( زيت النارجيل الا هو جوز الهند الا علبته خضراء ) و أزيته زين ثم الفه و أخليه الى بكره.

الخميس: اسوي خلطة ( زبادي + صفار بيض و البياض احطه على وجهي ) و أحيانا أحط زبادي بس ، و بعدين أحطه على شعري قبل ما اتروش بساعتين على الزيت طبعا ، ثم اغسله بالشامبو زين ، ثم أخليه ينشف و الفه.

الجمعة: من يوم ما اصحى أفك شعري و أخليه طوال اليوم مفكوك الى الليل اغسله بس ببلسم طبعا للمدرسة ثم الفه لبكره.

الاثنين: إذا طلعت من المدرسة أحط زيت و أخليه الى الليل ثم اغسله و الفه لبكره.

و هكذا كل أسبوع مع العلم ان هذا البرنامج كنت مستمرة عليه نظام للعناية بشعري و ليس على انه برنامج لمده ثم اتركه فقط كنت اغير الزيت أحيانا على اساس ما يتعود شعري عليه بس شهر و ارجع لزيت النارجين لأنه بصراحه روعه بس يبيله صبر وريحته قويه ، و أغير في الشامبو أحيانا صانسلك و أحيانا سلفكرين و البلسم الا تبعهم طبعا الخاص بالشعر الجاف.
اما الزيوت الا استخدمتها: زيت مخلط أمي كانت تشتريه من حرمه ، زيت دابر أملا أبوي كان يطلعني برا البيت ما يحب ريحته ، أحيانا إذا ماتوفر عندي زيت استخدم زيت عافيه الذرة بس ما اطول عليه لان امي تصرخ علي مابقى الا زيت الغداء وبس.

هذا برنامجي و زي ماانتو شايفين حاطه حيلي في شعري لأنه ماكان عندي أي مشكله لا في جسمي او بشرتي و الحمدلله.
بس تعبت من الكتابة و التذكر البرنامج الثاني اسمحوا لي بنزله بعدين لأنه طويل شوي ،
و أي استفسار انا حاضرة و سلامتكم.