اكتب لكم معاناتي بعد ماضاقت علي الدنيا

بسم الله الرحمن الرحيم

السلام عليكم ورحمة الله وبركاته

خواتي العزيزات

انا اكتب لكم معاناتي بعد ماضاقت علي الدنيا

دعيت ربي كثير والحمد لله انا متفائلة ان ربي بيفرجها علي

لكن قلت اقولكم مشكلتي استفيد منكم...


انا لي زوج سابق متبليني من يوم وانا معاه

عيشتي معاه ماتسر لا عدو ولا صديق

جيت عند اهلي طالبه الطلاق

ماقدرت احصله الا بعد سنه كاملة الله العالم وش تعرضت فيها منه

ضغوط نفسيه وخاصه ان عندي ولد منه دايم يهددني باخذه

غث اهلي وغثني وقهرني

دايم اتصالات عليهم باي وقت وتهديدات

ابوي معاه السكر وجاه قبل كذا تعب بقلبه من المغثات اللي يشوفها وضغوطات العمل

وامي جاها القولون منه

لكن اهلي مسوين قدامي انه شي عادي وماهمهم

والسبب ؟؟؟؟

ان زوجي السابق ولد عمي

وابوي يموت نفسه ولا يصير شي بينه وبين اخوه مع العلم ان اخوه نفسه مايتهم لابوي ولا يبادله نفس الشعور لو صار لواحد من عياله شي


صبرت لعيون ابوي وجاملت عمي كثير


تخيلوا انه يجي (ولد عمي )لعندنا بالبيت ويقعد يتقهوى ويسولف ما كانه مسوي مشكله

ويقول لابوي مافيه احسن من العزوبيه ؟؟؟؟

صدق من قال عش رجبا ترا عجبا

بعد معاناتي سنه كامله الحمد لله وصلني الطلاق

وحمدت ربي كثير على هالنعمه متوقعه اني افتكيت من شره لكن هيهات

بالعكس زاد عن اول

وصار ما همه الا الولد ( بجي اخذ الولد _ بسافر فيه برا علشان يتربى زين _ متى تزوجون بنتكم علشان اخذ الولد ... ) ومن هالكلام


انا هالحين لي سنتين مطلقه منه ولا افتكيت من شره...

فاضي ماعنده لا شغل ولا مشغله

كل هذا واحنا صابرين

سوا لنا ( ولد عمي )مشكلة قويه مع ابوي علشان الولد لدرجه اني عمي يدعي على ولدي انه يموت لانه سبب لهم مشاكل !!! باللهي يا بنات كل

وحده تحط نفسها مكاني ( يدعى على ولدك بالموت ) ليه وش سوى بزر عمره ماتعدى ثلاث سنين بس ما اقول الاحسبي الله ونعم الوكيل...

دعت عليه امي من المغثه اللي شفناها منه

وسبحان الله يا بنات ربكم مايترك احد

بعد يومين بالضبط انطرد من شغله طرد نهائي لا رجعه فيه

ولا يقبل في اي مكان

ومو هذا موضوعنا


موضوعنا بعد ماتفرغ

تحول لمحترف مشاكل

كلم قبل يومين على امي ومسوي فيها ان عنده موضوع ولا يبي احد يدري فيه


تتوقعووووون وشوووووووووو الموضوووووع

وربي ما طرا على بالي يكون في الجرأة ولو واحد بالمية انه يقول مثل كذا

متوقعه كالعاده عن الولد

لكن

!!!!!!


بنات الآاااقيه

يتهمني في عرضي


يقول انه شاف لي مقطع فيديو مع واحد وهو متاكد انها انا وبسبب خوفه علي وغيرته كلم امي ( من متى يغار من متى يبي مصلحتي اصلا )

اتهام بااااااااااااطل عينك عينك

جرأه ماشفت مثلها ابدا في حياتي

بالاول كان كلامه واثق من نفسه وان اللي الرجل اللي بالمقطع مرسل له بالذات علشان يغثه

ويتغير الكلام بانه صار المقطع موزع بين الشباب بالجوال وانه عرفني وانغث وماقدر ينام !!!!

قلت خليه يرسل المقطع ان كان صادق على جوال احد اخواني

قال اوكي

قفل ومادرينا قبل ماتتم دقيقه اتصل وقال ماقدرت مو راضي يرسل

يقول عندكم ايميل ارسله عليه ؟؟؟

قلت يالله يرسل كان هو صادق والله صبري نفذ

والله يابنات ان هالحين تمينا يومين لا اتصال منه ولا ايميل


الكذاااااااااااااااااااااب حسبي الله عليه


والله دمعتي على خدي كل ليله من الحره اللي فيني

مادري وش يبي بالضبط ابي افهم


وش السوااااااااااااات

تحملته كثيييييييييييييير لمتى بصبر


امي تقول اصبري ان الله مع الصابرين والقذف بالمحصنات شي مو سهل ربي بينتقم منه


ياماما انا متفائله بربي بياخذ حقي منه لكن لازم اعمل بالاسباب


ليه المحاكم موجوده وليه الشرطه ومن هالقطاعات موجوده

الا للخدمة بعد الله سبحانه وتعالى


لمتى بصبر

لمتى بخليه يتدخل فيني

متى باحس بحريتي منه

لمتى ساكتين معطينه وجه لحد انه صار يتهم بالاعراض


بس علشانه ولد عمي ؟؟؟؟؟؟؟؟

انا ناويه واخوي نرفع دعوى عليه وبلغت امي بالموضوع وشكلها لانت مع كلامي لاني وربي ضاقت بي الدنيا منه

مافيه ليله ما ادعي ربي ان الله يكفين شره

لكن امي تقول اصبروا وفاتحوا ابوكم بالموضوع

انا اعرف ابوي وربي مايحرك فيه شعره الا انه ينغث من جوا ولا يسوي شي يشتت العايله الكريمه

وحيانا افكر اني اسوي بلاغ للشرطه بانه شخص مزعج علشان ياخذون عليه تعهد بعدم التعرض وبعدم الاتصال وبكذا ماتوصل الامور كبيره بالمحاكم

علشان ابوي وبنفس الوقت ابعده عني الله يبعده عني بعد السموات عن الارض

حسبي الله ونعم الوكيل

حسبي الله ونعم الوكيل

حسبي الله ونعم الوكيل


الله على الظالم

الله على الظالم


بنات دعواتكم


محتاجه وقفتكم معاي بعد الله سبحانه وتعالى

لا تحرموني من ارائكم