مســــاء الخيرات والليرات حوائيااات
من منا مايمر عليه يوم الا مايطيح وجهه من منا لم يمر عليه يوم يتمنى ان الأرض تنشق وتبلعه من منا لم يمر عليه يوم يتمنى انه ماوجد على كوكب الأرض
الموقف الاول
خذوا مثلا هالموقف
هذا الله يسلمكم كان موعد تسليم مكافأتي وانا وقتها ناسيه البوك لكن معي بطاقة الجامعه ومعي 20 ريال المهم اني صرفت 15 ريال على ملزمه الله يقلع ذيك الملزمه كانت سبب طيحة وجهي وشوي الا اسمع عصافير بطني تزقزق والجوع بداء يلعب عالوحده ونص
رحت للقروب وقلت لهم انا حدي جيعانه ومشتهيه بيتزا
طيب خليها بعد المحاضره
لا لا اقولكم جيعانه ابروح للكافتريا واذا تبغون تفطرون معي ولا براحتكم
ياليل ياحرمه خليها بعد المحاضره وفطورك على حسابي
لا تحاولون بفطر الحين وبعدين انا ماحب افطر على حساب غيري
امحق !! خلاص اجل بنفطر معك والله يعينا نتأخر عن المحاضره
المهم رحنا للكافتريا وعطيت الفلبينيه 5 ريال الباقيه وقلت عطيني بيتزا
ناقص 1 ريال
طيب عطيني كرواسون جبن
ناقص 2 ريال
طيب مو مشكله عطيني دونات محشي كاسترد << ياشين المطفره لاصارت تتشرط
ناقص 3 ريال
طيب عطيني خبز فاضي
مافي
عطيني كوكيز
مافي
عطيني اي شي منتهي صلاحيته << حالتها صعبه
مافي
طيب نعيد من اول عطيني بيتزا
ناقص 1 ريال
لحووول وانا بقلبي اقول وش هالبلشه جوع والبنات شروا وخلصوا وينتظروني متى اخلص
قلت يابنت مابدهاش الحين اهايط ساعه جيعانه ومادري وشو آخرتها ارد وانا خاوية اليدين لازم اتصرف
رحت رديت عليها وانا كلي شموخ وثقه ان ماعندها صرف طيب معك صرف 500 ريال !!
ايوا في صرف 500 ريال
يؤ لعنبو ابليسك من وين لك صرف وتوكم فاتحين الكافتريا متى امداك حصلتي صرف
ايوااا هزاا صرف موزود مال امس
اهااا طيب خلاص انا ما ابغى صرف 500
خلاص مافي ريال مافي بيتزا
آ يالنذله اشوا ان ناقصني ريال موب عشره اصبري علي ادبر لك الريال وفوقها 50 ريال بس استلم مكافأتي
لا لا لا جيب ريال شيل بيتزا مافي جيب ريال مافي شيل بيتزا هذا مصكل كبييير بعدين
الله وكبر يالمشكله اللي بتصير اشوا ان ايام تمر عليكم تفطرون
من باقي النص والربع ريال حقتنا وحنا ياغافلين لكم الله
نستهون فيها ومحد تارسك شحم ولحم غير هالكم هلل
ناظرتني بكل استحقار وابتسامة خبث - هذا اللي تبين لي مادري هو خيال ولا صدق
عاد انا هنا بديت اسخن والشرار يطلع مني عيوني والدخان يطلع من أذوني ما بقى الا هالفلبينيه في ارضي وفي بلادي بلاد العز والثروه
تطلب مني انا يالمواطنه السعوديه ريال عشان وشو عشان كل بيتزا << قلبتها وطنيه البنت
واصرخ بصوت عاالي اهتزت له ارجاء الجامعه
تخسيـــــــــن
لابوك لابو من جابك انقلعي انتي والبيتزا خاست لها اسبوع عندكم كل ماجيناكم سخنتوها صايرين ناكل لوح مقطع عليه بصل وزيتون مو بيتزا
لا وتحطون جنبها كاتشاب عساه يتلين
شوي الا الشله والشعب العربي يتجمعون شحــروره وش بلاك وش السالفه
لا لا ابد بس البيتزا حقتهم لقيت فيها صرصور وانسدت نفسي وهونت ماعاد ابي افطر
والفلبينيه تصرخ هزا كزاب هزا يبغى اكل كلو هم هم مافي جيب فلوس يبغى اكل بلوشي هنا كافتريا لازم جيب فلوس مافيه هنا صدقه
الى ان عجت الكافتريا بأصوات القهقه والضحك
اللي تقول مسكينه واللي تقول غريبه مو مبين عليها انها منتفه !!!
شعرت وقتها ان مافيه امل من ترقيع الموضوع فصرخت بصوت عااالي
يلا ياشله مشينا للمحاضره وذكروني بعد المحاضره اقدم شكوى
وتجي صديقتي تهمس لي
امشي امشي الله يفشلك والله لو مخليه الفطور بعد المحاضره
كان ماطاح وجهك لكن تستاهلين هذا اللي مايسمع الكلام
والثانيه تقولي شوفي ياشحــروره ..
حاولي تغيبين اسبوع وكاد احد ينسى السالفه ولا داومتي بعد اسبوع البسي باروكه لزووم التنكر عسى محد يتعرف عليك
طبعا انا طاح وجهي غبت ودبلت على الاسبوع اسبوع
وداومت بعدها وانا مسويه تانك ولابست باروكه طالعه كأني بيونسي << اي هين طيب خلاص طالعه كآني هيا الشعيبي
الموقف الثاني
ولا مره من المراير رحت مع الوالده عزيمه وكنان وقتها بداية انفلويسا لكن امي اصرت اني اروح معها المهم اني رحت للعزيمه وانا المنديل ماسكته بيدي طول العزيمه
درئا لجريان نهري دجله والفرات
وخلاص انتهى موعد الزياره وعلى طلعتنا رحت ابسلم على حرمه كبيره وانا بيدي المنديل
شوي الا هالحرمه تستلمني حلفان والله ماخذها
والله ما تحللي _ يعني ماتكون حلال لي لكن هذي اختصار _
انا صارت خشتي كذا >>
شوي الا ينبض عرق الاستيعاب وانتبه ان هالكهله تظن ان اللي بالمنديل دارهم فقلت يابنت دامها جت منها سلكي الدور
وانا قعدت احلف لا ياخاله مايصير لازم ولو افا عليك بس
اعتبريها من واحد من عيالك << ابد مو عاده نفسها بنت
ياخاله هذا شي بسيط ولا يسوى امانه تاخذينها
وعاد انا مسكت خط وماصدقت آخرتها ردت علي الكهله وقالت :
طيب يابنتي دامك حلفتي ماودي اخليك تصومين وتكفرين
هاه وشو
خلاص انا باخذها
وتسحب المنديل وانا اسحبه
صرخت علي وقالت وش بلاك كانك هونتي
لا لا ابد ماهونت ولو انا منك وفيك
وارمي لها المنديل وادق سلف والحق امي
وهذا وجه الضيف
لكن ابشركم انها ماتقرب لنا ومن ذاك الوقت الى الحين
وانا ماحصلي الشرف اني قابلتها ولله الحمد والمنه
الموقف الثالث
مالكم بالطويله هذا الله يسلمكم مره كان عندنا
حفل تكريم للطالبات المتفوقات والمثاليات
قبل اذاعة الصباح المهم جاء وقت اعلان أسامي الطالبات المتفوقات والبنات صافين طوابير والمدرسات والمديرات واقفين حتى الخالات
شوي الا تقول
الطالبه شحــروره بنت مقلع فلتتفضل
وانا ادرى بعمري ادري ان وجهي مو وجه تكريم وآخر مره تكرمت فيها وانا بثاني ابتدائي ولا بعد شهادة زور ورشاوي ويالله يالله تكرمت يعني ابدا ولا واحد بالميه احتمال اني اتكرم
البنات يدفوني يلا ياشحــروره روحي
وانا اقول لا وش اروح والله موب انا اكيد هذي طالبه ثانيه
يابنت روحي
خير اروح مو بس انا اللي اسمي شحــروره بنت مقلع ليه نسيتوا الدافوره شحــروره اللي بفصل 2/3 اكيد هذي بس تشابه أسماء
والبنت تكرر الطالبه شحــروره بنت مقلع فلتتفضل !!
ياحرمه روحي ماتشوفين محد طالع
طيب خلاص ابطلع وامري لله
وانا امشي وكلي ثقه وشموخ العزه يعتلي محياي واطلع فوق الاستيج وآخذ الشهادة
شوي الا هالحرمه ماشيه الفين هي وعبايتها تقل غراب وتسحب الشهادة مني
وتقول لمقدمة الحفل
معليش بنتي شحــروره تعبانه وانا امها جايه نيابة عنها عشان استلم شهادتها
والمدرسه كلهم تسدحوا من الضحك وصرت مصخره مابعدها مصخره وعلى اثر هالموقف السخيف وبعد ان قعدت ربع ساعه القط وجهي حتى جوني مجموعة بنات يسفلون فيني
اللي تقول شحــروره خشمك هناك
واللي تلقط لها خيط من الأرض تقول خذي حواجبك واللي تقول لسانك قاعد يفرفر ورى ستارة البروجكتر
عاد وقتها انا طرطعت وضغطي ضرب واطيح فيهم طق وتصفيق لما جوا المدرسات فكوا بينا
وتم بفضل الله وكرمه فصلي من المدرسه
ههههههههههههههههههههههههههههه:hahaha:
حلوة
:26: