الأفران الكهربائية%%

ما فيه ولا رد ولا احد يجبر بخاطري :( :(

هلا أختي توني أشوف الموضوع... أنا اللي عندي فرن كهربائي مب كبير لا وسط وصار له معاي تقريبا أكثر من 5 سنوات وتوزيعه للحراره ممتاز يعني يحمّر الأكل فيه من فوق ومن تحت وعيبه أنه ما يشيل الصياني الكبيره وبالنسبه للغاز وفاتورة الكهربا إسمحيلي ما عندي فكره...

تسلمي يا عيوني في انتظار الأخوات لمزيد من المعلومات
يا بنات حواء لا تفشلوني

السلام عليكم ورحمة الله وبركاته .....

أختي العزيزة ..هذه الملاحظات من خلال تجربتي للأفران( يعني رأي شخصي) .....

فرن الغاز....

مميزاته :

- يعطي الأكل طعم و رائحة مميزة
- ناره حامية وسريع في الغلي وتسخين الماء
- مثالي في قلي السمك ( لأنه حار ويعطي السمك طعم مميز )
-اذا كان كبير ...فهو يتسع للصواني الكبيرة

عيوبه :

- ممكن يوهق الوحدة اذا خلص الغاز وكان فيه ضيوف :icon810:
- صعب التنظيف ومتعب
- غير مثالي لعمل الكيك والفطاير لأنه يخلي الكيكة تطلع مثل الطابوقة :icon29:
- لا يمكن الاستفادة من الحرارة بعد اغلاقه
- خطر اذا كان هناك تسرب في الغاز
- لا يمكن تنظيف الفرن من الداخل تنظيف ذاتي


الفرن الكهربائي .....

مميزاته :

- سهل التنظيف خصوصا اذا كان من نوع اللي سطحه يكون سيراميك ( ما فيه اسهل منه)
- مثالي لعمل الكيك والفطاير لأنك تتحكمين بالحرارة يشكل افضل
- آمن نسبيا لأنه حتى لو كان فيه خلل فأكثر شي بيصير ان الكهرباء بتنقطع ...
- فيه ميزة التنظيف الذاتي ....بالنسبة للأفران الجديدة تقفل ذاتي وترتفع الحرارة الى 500 تقريبا وتنظف الفرن بحيث تخلي بقايا الأكل والزيوت تذوب ويصير مثل الرماد طبعا على حسب توسخ الفرن ممكن يستمر التنظيف لمدة ساعتين لأن الحرارة تستغرق وقت للأرتفاع ثم للنزول ولا ينفتح الباب الا اذا انخفضت الحرارة بشكل مناسب وهذا للأمان ثم امسحي الفرن فقط لتنظيف الرماد ....عن نفسي استخدم التنظيف الذاتي اذا تركت الفرن مدة ولم انضفه فيصعب تنظيفه ....
-يمكن الاستفاده من الحرارة المتبقية بعد اطفاء الفرن
- في الافران الجديدة تتوافر مروحة لتوزيع الحرارة داخل الفرن فتحمر اللأكل والكيك والمعجناتبشكل جميل ومتساوي


عيوبه :

- لم يعجبني لقلي السمك فالسمك يحتاج حرارة مرتفعة حتى لا يصير زفر
-صغير بالنسبة لفرن الغاز الكبير فلا يتسع للصواني الكبيرة جداً
- حرارة السطح ليست بقوة حرارة نار الغاز


بالنسبة لأفضل الأنواع ... ماركة جنرال الكتريك general electricاو ميتاج maytag او ورل بول whirll pool

والأسعار تتراوح ما بين 3000 ريال الى 5000 ريال...يعتمد على المواصفات اللي فيه يعني سطح سيراميك او السلك الملفوف او اللي يكون مقل قطعة الفحم الدائرية وهذا ما انصحك به لأنه يحرق الأكل بسرعة

بصراحة هذا اللي جاء في بالي ...قارني واسألي وبعدين قرري بنفسك ...واختاري اللي يعجبك ويناسبك ...وبالنسبة للصرف والفاتورة في اعتقادي انه لا يستهلك الكثير يعني ممكن يكون نفس صرف الثلاجة .....


اذا كان عندك اي سؤال لا تترددين .....

يا عيوني يا رشة عطر تسلمين والله يجزاك عني خير الجزاء وابدعيلك في ظهر الغيب
أنت قلتي أنه ما ياخذ الصياني الكبيره ما فيه أحجام أو يكون الفرن دورين يأخذ الصياني في وقت واحد..
وبالنسبة لارتفاعه قالوا أنه رفيع يعني القصيرة صعب عليها تراه مو لي بس موصية عليه
وأقول يسلللموا يا رشة عطر على الرد والله يبارك فيك