السلام عليكم ورحمة الله وبركاته ،
أول مشاركه ، ولكني متابعه من اكثر من ست سنين لهالقسم ولكل التجارب ،
اروح وارجع بدون فايده ، ومافي ريجيم يستمر عندي فوق الاسبوع ،
جربت حبوب زينيكال وليبو 6 ، وحرمت نفسي ،
وكنت انتظر نتيجه فوريه في اقل من اسبوع ،
من الاخير ما بقى ريجيم ما جربته ، بدون ادنى نقص ،
الشكل ابد ما يتغير ، !
طولي 148 بس ، ووزني 82
ما تداركت حجم مصيبتي الا متأخره ،
ع قصري لكن مافيني مكان اكبر من الثاني ، جسمي كله كتله وحده ،
عندي يقين تام " لهذي اللحظه اني مستحيل اضعف "
المهم ، كنت اقرا قصص هني سببت لي الاحباط ،
اللي تنزل فاسبوع عشره واللي تنزل 8 واللي فالشهرين تخسر 20 كيلو ،
وانا مكانك سر ، !
يوم تاريخ 23/ 12 /2010 ، قبل شهر وست ايام بالضبط من كتابة هالموضوع ،
حطيت قدمي فأول عتبة لسلم الريجيم ، وخاطري مكسور وعارفه صعوبة خسارة كل هالوزن .
المهم ، امتنعت عن كل مالذ وطاب ، وبديت اشرب شوربه بس ،
واكل صدر دياي ، او قطعة لحم ، واشرب قهوه عربيه ، وبيض متوزع فالاسبوع،
وخضروات وفواكه ، واهم شي اعتزلت الميزان نهائياً :)
يوم / يومين / ثلاثه ،
صداع وغثيان مب طبيعي . ونفسيه زفت وامتحانات نصف الفصل ،
راسي بينفجر وبطني ذبحني ولوعه ما استحملتها ابد ،
المهم ،
مروا 14 يوم بالضبط ، لا لا والله 13 يوم ،
طلعت الميزان وانا ادعي ربي ، ان يكون نزل كيلو بس ،
كان يوم بديت الريجيم 82 ، وبعد ماوزنت صار 77
بغيت اطير من الفرحه ، وقلت مابشوف الميزان اسبوع بعد ،
وكملت ريجيم المخفف بهالطريقه ، اضفت له مرتدلا وتركي مدخن وشرايح جبن قليل الدسم ،
ولين اسبوع يعني بعد 20 يوم من الريجيم كان وزني 75 كيلو ، !
لكن الكارثه العظمى ،
ان هالوزن ثبت اكثر من ثلاث اسابيع بدون تحرك وبغت تييني جلطه وانواع الاحباطات ،
وقالوا لي اكسري الريجيم وسويت بحث عن هالموضوع ، ولكني ما اقتنعت اكسر ريجيم ،
جربت وكسرته وكثرت كمية اللحم وشربت لبن ، ووزنت اليوم اللي بعده وطلع وزني 78 ،
قربت انهار نفسياً ، لاني حارمه نفسي من كل شي ، اقصد مخففه ،
واخر شي اكتشفت مؤخراً إن اثناء الدوره الوزن يزيد وحمدت ربي ان الامور طبيعيه !
=)
كنت امشي يومياً نص ساعه ، وعقبها بديت اكثر لاربعين دقيقه وحالياً امشي 45 دقيقه ،
واستريح يومين فالاسبوع !
قبل فتره اقرا عن ريجيم التمر واللبن وما اقتنعت فيه حسيته ممل جداً ،
ولكني قلت يلا دامنا فيران تجارب خل نجرب ،
جربت مدة الاسبوع اللي طاف كله وماقربت صوب الميزان ، وقلت يارب تكون في نتيجه ،
امس وزنت نفسي يوم خلصت مدة الريجيم ،
الحمدلله بحول الله وصل 72 كيلو ،
صحيح بطيء بس اهم شي افتكيت من شوف الـ 75 ،
الكل حولي يقولي شكلج ماتغير ولا تغير فيج شي بس ويهج ذبلان ،
احباطات قويه ،
ونفسيات محطمه ،
الكل يقولي خسرتي عشره ومابينت فيج ،
وانا لازلت صامده ،
معطيه نفسي مهله قدرها بداية شهر اربع ، اني اوصل الــ 58 باذن اللي عيونه ما تنام ،
صحيح شكلها صعبه ، بس الاراده تكسر المستحيل ، وانا قد المستحيل ، !
انا مابسمح لنفسي اعيش شبابي مكسوره ، البنات في عمري اميرات ،
وانا مثل وحده عمرها 90 سنه !
ابا روحي حلوه وشكلي حلو ، الكل يقولي تكفي روحج الحلوه ،
لكن انا ماتكفيني ، لاني اللي سمحت لنفسي اكون بهالبشاعه ،
قراري حازم ، ان نفسي اضعف من انها تمشيني ،
صحيح مافي حد جبر خاطري للحين وقالي شكلج تغير ،
لكن انا يهمني اوصل للهدف المطلوب خلال هالثلاث شهور ،
وبقدر باذن الله !
:)