الامساك والغازات ( ام جديده محتاجه لنصيحتكم )

مساء الورد للورد الى قاعد يصير مع ولدج شى عادى هذا المولود ماتعرفين النوم من يشرف الله يصلحهم وانا من يطلع الطفل من المستشفى اعطيه خروع حق الاطفال ينظف البطن ويريحه اعطيه نص ملعقة الاكل مع الرضعه وفيه ناس يكثرونه اشوى بس انا اخااف اعطيه كل اسبوعين او اذا حسيت انه يتلوى ويتعصر واتمنى انى افدتج

والله ماعندي خبره بس دخلت اباركلج
الله يخليه لج يارب ووو يكون من اولا الخير والصلاح ..

حبيبتي الأعشاب ماتنغلي

تحطين ملعقه صغيره يانسون أو حلوه الي مثل اليانسون بس خضرا

وتصبين عليها ماء مغلي وتخلينها دقائق بعدين تصفينها وتعطينها ولدج الله يحفظه ويشفيه

وسألي الدكتور يمكن يغير نوع الحليب

*** بس هذي مشكله يعانون منها كل الأطفال ويتعبووون أمهااااتهم ***

والله يشفيه ويعافيه

تذكرت اعملي مساج لجسمه بزيت الزيتون قبل النوم عشان يرتاح

والله يا أم خلودي دهن العودي ( شفتي التدليع :) ) أنا ما انصحك ابدا ابدا بالاعشاب و لا شئ , بس ماء و حليب بسسسسسسسسسس .....
بتقولين ليه ؟ لان يا حبيبة قلبي الكلى الى الان مش جاهزة عنده كونه رضيع و جسمه بس يحلل الحليب اللي طبعا أفضل شئ من الام .... انتي كذا تتعبين الكلى عنده , انتبهي , انا دكتور منبهني في السعودية و قال لي لا تسمعين كلام احد و الا اللي يقول ما ضر عيالنا قبل و .... و ....

أنا مثلك ولدت ولدي الاول الله يحفظه قيصري , و رفض يشرب مني لان الاخ في المستشفى تعود على الصناعي اللي طعمه حلو و سهل ما يبيله تعب مثل الطبيعي جهد و مص و تعصر يالله تطلع له نقطة ...
الصناعي بس مصة الا هو يطلع ... بس سبحان الله ميزة الصعوبة اللي في الطبيعي اللي اكتشفتها من خلال قرائتي لبعض الكتب , ان هذا يسوي له مثل التمارين لمنطقة الفم و الحلق و البلعوم اللي بتعلمه في المستقبل البلع السليم ... سبحان الله ....
طبعا انتي مثلي , بتقولين خلاص , ما في فايدة , ما يرضى حاولت ,,,, حاولي و الموضوع ترى فيه تعب انا أقولك , و بيعاند هالنتفة و بيضرب عن الرضاعة الطبيعية الى ان ترضخين له في الصناعي ,,, نصيحتي , حاولي ,,,,, لان الحليب من الام خاصة اول 6 شهور يكسب الطفل مناعة طبيعية عن الامراض ( مثل ما كانك تعطينه تطعيم ) عشان كذا تشوفين الاطباء يحرصون على الرضاعة الطبيعية ..... أيضا سمعت من الممرضة انها تزيد نسبة ذكاء الطفل ....
أضعف الايمان اشفطي و رضعيى , اهم شئ , لازم يستفيد من حليبك اللي من جسمك مش المركب صناعيا و لا يستفاد منه الا الشبع و التنفخ ....

السبب في ان المولود يبكي , ان طول التسع شهور يتغذى من سرته ..... الان يتغذى من فمه , ومع الفم يدخل الهواء و يسبب الغازات , لذا احرصي على " التكريع " بعد الرضاعة مهم جدا .
و من الاسباب ايضا ان الامعاء ما تعودت على انها تقوم بعمليه الهضم و التحليل طول التسعة اشهر , لذلك ترين حالة الطوارئ التي تحدث , كلها كم اسبوع و يستتب الامن ان شاء الله .....
بتلاحظين ايضا , ان من يرضع "يتبرز " اكرمك الله ... و هذا شئ عادي .... و الله يعينك على كثرة تغير البامبرز .
نصيحة , انتبهي من اصابة مولودك بالحساسية التي في منطقة الحفاظ تراها بتضايقه جدا و يصير الماء عليها كانه نار :( انصحك بمسح المنطقة بمناديل ( سيبا ميد ) ممتااازة و تجدينها في كل سوبرماركت او صيدلية , ترى فيها مواد طبيعية و لا تسبب اي حساسية .... امسحي لمولودك فيها .
بعد التغيير , عليك بمسح المنطقة بها ثم بكريم سيبا ميد و ضعي طبقة وفيرة عليه حتى تكون طبقة واقية من البراز و البول ( اكرمك الله ) المتكرر جدا في تلك الفترة .....
كل ليلة قبل النوم حممي جسمه مش ضروري الراس, و سخني زيت سمسم او زيت زيتون و خليه دافي ثم ادهني جسم ابنك و اعملي له مساج و منطقة البطن سوي لها مساج بس لا تضغطين بقوة , مساج خفيف على كامل الجسم , و لبسيه البيجامة و رضعيه ( طبعا لازم بيسوي شئ متوقع :) فغيري له ) و نوم العوافي .

انتبهي من ماء غريب سمعت انه ضار اذا اسئ استخدامه .
بالنسبة للحليب , غيريه اذا انتي راح ترضعينه صناعي .... جربي ( نان ) ... بس انتبهي مش كل يوم و الثاني تغيرين لانه راح يسبب له امساك حرام ....

ترى هالحوسة بس هالشهرين ثلاثة , بعدين كل اموركم بتتنظم لا تقلقين و بتصير الحياة وردية !

الغالية ام خالد.... الله يخليه لج

اذا كان يبكي بعد الرضاعة بفتره بسيطه (اذا هضم الرضعة) فحتمال الحليب ماناسب معدته... صارت لي بولدي الأول ومارتاح إلا يوم غيرت له الحليب... جربي كيكوز... هذا الي ضبط معاي أما سيميلاك جربته سبب حق عيالي امساك لأن فيه حديد وايد

بما ان عمر ولدج اسبوع فإن شاء الله فيه مجال يتعود على صدرج... ولدي الأخير تم اسبوع مايبي صدري ابد.. بس الحمدلله بالدعاء والصدقة رد رضع.... عموما أول ولد تلقين صعوبه في ترضيعه.... جربي عطيه نص الرضعة صناعي بعدين حطيه على صدرج حتي يكون نص شبعان ولا يعصب وهو يحاول يمص من صدرج.

اما بالنسبة للأعشاب فمثل ماقالت ام حصة... انا ماعطيت حد من عيالي هالأشياء... احسها هي الي تعور بطونهم.... بس جربت ماي مغلي شوي (2 سم) احط عليه ورقة نعناع في المرضاعة وشوووووي قند واخليه يبرد واعطيه الياهل مرة كل يومين لأن النعناع طارد للغازات


الله يوفقج