انا ما أحب اسوي المعجنات لأني أخاف ما أضبطها..بس هاي سويتها وتخبلو عليها أهل ريلي. البيكان هي نوع من المكسرات وهاي هي صورته
أنا طبعاً تهايزت أسير سبنيس واشتريه من هناك فسرت الجمعية وخذت يوز (عين الجمل). المهم هاذي هي المقادير والطريقة وإن شاء الله تعيبكم..
بتريا الرد..ها!!
المقادير (عشان تضبط عندكم استخدمو الكوب مال القياسات):
- 1/2 كوب سكر
- 2 م.ط. زبدة
- 2 م.ط. ماء
- كيس HERSHEY'S Semi-Sweet Chocolate Chips (صورته آخر شيء) مقسومة بالنصف (يعني يستوي عندكم كوبين)
- 2 بيض
- 1 م.ش. فانيليا
- 3/4 الكوب طحين متعدد الإستعمالات
- 1/4 م.ش. بيكنج صودا (bicarbonate of sodium )
- 1/4 م.ش. ملح
- 1 كوب بيكان
- صلصة الكرامل (الطريقة تحت)
الطريقة:
- سخني الفرن لدرجة 200. وحضري صينية طولها 9 إنتش ولفيها بالقصدير تأكدي إنج لفيتي الأطراف بعد. بعدين إدهنيها بالزيت رشي عليها شوية طحين.
- حطي السكر والزبد والماء على نار هاديه حتى يتجانس ويبتدي يغلي طبعاً مع التحريك المستمر. عقب ما يغلي ارفعيه عن النار وحطي عليه على طول كوب من الكاكاو (chocolate chips ) وإخلطيه زين حتى يذوب. بعدين إخفقي البيض والفانيليا وحطيه على خليط الكاكاو وإخلطيه بعد. آخر شيء حطي الطحين والبيكنج صودا والملح على الخليط الأولي وحركيه لين ما يمتزج عدل وصبيه في الصينيه.
- حطي الصينية في الفرن واخبزيها لمدة 15 أو عشرين دقيقة ولين ما تبتدي الكيكة تتفكك من أطراف الصينية. ابتدي بتحضير صلصة الكرامل.
طريقة تحضير الكرامل:
خذي 25 حبة من حلاوة الكرامل وحطيها في طبق خاص بالمايكرويف وضيفي عليها 2 م.ط. زبدة و 1 م.ط. حليب سائل. حطيه في المايكرويف وشغليه على الـhigh لمدة دقيقة. طلعيه وإخلطي الصلصة وردي حطيه في المايكرويف وشغليه على الـhigh لمدة 30 ثانية. طلعيه مرة ثانية وكرري الخطوات لين ما تذوب حبات الكرامل ويستوي عندج صلصة.
- أول ما تخلص الكيكة وتطلعينها من الفرن على طول صبي عليها صلصة الكرامل ووزعيها على كامل الكيكة. ذري عليها الكوب الباقي من حبات الكاكاو وبعدين البيكان. خليها لين ما تبرد زين وقطعيها.
بالهناء والشفاء....
صورة HERSHEY'S Semi-Sweet Chocolate Chips
