عزيزتي كل اللي ذكرتية مهم واقولة لك مافية بيت مافية عيوب والله حتى القصور الفخمة اللي تشوفيها في عيوب بس مايعرفها الا اللي ساكنين بس فية عيوب عن عيوب عاد انتي شوفي ايش يناسبك يعني انا مثلا كان اهم شي ان الابواب والرخام كويس وطبعا تفصيل البيت يكون مناسبني لكن مثلا الادوات الصحية قلنا بتمشي معنا سنة او سنة ونص ومو مشكلة بنغيرها وكمان الصبغ فية الوان في البيت خليتها زي ماهي وبعضها غيرتها لالوان انا كنت ابيها وبالنسبة للمهندس ضروري تجيبونة خلي زوجك يسأل اصحابة عن مهندسين متخصصين في الكشف عن البنا ومااعرف بصراحة كم ياخذ بس مااتوقع اكثر من 5000 ريال وحي اشبيليا اذا كان من الاحياء اللي شرق الرياض اللي في بالي هو مو راقي لكن معقولة اسعارة ويعتبر كويس لكن الاحياء الراقية في الرياض معروفة مثل النخيل والمحمدية والواحة وحي الملك فهد والغدير ولو انه مررررة مايعجبني وكمان انتبهي من الفلل اللي تجيكي مجموعة فلل مع بعض للبيع احسهم كذابين فية فلل واحد يبنيهم ويبيعها احس اللي كذا افضل وبس انشاء الله ساعدتك ....

اهلين اختي لوزه الاموره شرفتينا وخليك متابعه معانا عشان تستفيدي وبالنسبه للبنك هم يعطونك المبلغ على قد الراتب اللي بتقصدون منه والقسط ماياخذون اكثر من ثلث الراتب
النميله شكرا على مرورك حبيبتي وموضوع الصبات من وين اكتشفه من المخطط والا المهندس هو اللي يكتشفه
اختي demo مبروك عليكم البيت بس والله صعبه بعد اشتري وبعدين اقعد اعدل من جديد لكن انتي اعطيتني امل انه فيه عيوب مقدور عليها بعدين حنا لو بنشتري كله اقصاد على البنك وبنضل عمرنا كله نقصدهم يعني ظروفنا مراح تسمح نسوي تعديلات من جديد

jewelشكرا لك ياعمري افدتينا والله جزاك الله خير
وبالنسبه للاحياء اللي ذكرت ودي فيها من زمان لكن يبيلي خمس سنين عشان اقدر اشتري فيها وانا خلاص تعبت من الايجار والضيق الكل يقلي توك على الشرا بس انا ودي ارتاح باول حياتي كمان عيالي ودي ياخذون راحتهم ويتعودون على نمط من الحياه من هم صغار
وبعدين البنك على راتبي وراتب زوجي مايعطينا الا 800 الف وهذي كيف بتجيبلنا بيت في هالاحياء
وبالنسبه لا شبيليا هذا حي جديد ونظيف واسعاره معقوله لكن العرض فيه كثير واغلب الفلل مبنيه عشان تنباع عشان كذا ماتعرفين الزين من الشين
طولتها عليك اختي جزاك الله خير
ومازلنا ننتظر تجارب اخرى

<<<<< بااجار بس استفادت يسلمووووووووو

شوفى اختى انا اشتريت بيت جاهز من شهرين ولسه ماسكنت .......... وعيوبة مثل ماقالت اختي شقراويه ........
قلة الافياش الكهربائية وعدم تمديد خط 220 الا في المطبخ

انخفاض سور البيت وسور السطح