مسيكم بالخير يا بنات منتدانا
عطونا اخباركم ونعطيكم اخبارنا
وشلونكم ويش اخباركم ؟؟
عساكم يا رب بخير ومصحوبه بالعفو والعافيه
المهم يا بنات ندخل بالموزوع
اهئ اهئ اهئ
موزوعنا اليوم عن المدارس
والدراسهيعني بالموضوع ضيقه صد ر وخصوصا
لبنات الواحه اللي يد رسن يعني كلها ايام وليالي
ويجي الغثاء لحد بيبانكم و بابي
بس تصدقون يا بنات
مو بس انتم اللي تنغثون من الدراسه والمدارس
حتى حنا يالامهات نتعب ايام الدراسه مع عيالنا
تد ريس وتعب ونم وقم وحل الواجب وذاكر
بس الله لا يخيب التعب
المهم والموهيم والمهيهم
حنا يالامهات نتعب بايام الدراسه وايام الاختبارات
وهالايام صرنا نتعب بعد بايام التجهيزات للمدارس
قبل ماكنا نحس بالتعب اما هالايام ياساتر من بنات هالوقت
ابي اسوي لكم مقارنه بين الحاضر والماضي
الماضي اللي مهوب بعيد بالحيل
كان على ايامنا يوم كنت صغينونه اروح للمد رسه
وانا لابسه ذاك المريول كان مود يله فيه جيبين تقل انها خرج
بس انا متأكده انكم تعرفون الخرج ويش يصير!!!!!!!!!!!
كان بالمريول حزام من وراء
علشان يربطون المريول بنا تد رون ليش؟؟؟؟؟؟؟؟؟؟
علشان ما يهج المريول من جلود نا
يقعد علينا اسبوع كامل يعني من السبت الى الاربعاء
لا وفيه بعض بنات الجيران يواصلن مايفصخن المريول
الا يوم الجمعة يعني ينامون
ويقومون فيهلا وكنت انا واختي الصغيرة امنيه عند نا اننا نواصل
مثلهن <<<<< الله من زين الاماني هههههههههه
عاد ويش تتوقعون ريحه المريول اذا صار ما يفصخ
لمده اسبوع؟؟؟؟؟
الجواب: عفن يؤ دي الى فتح
الجيوب الانفيه في حاله الالتهاب الحاد
عاد عرفتوا ويش فايده الحزام .........
بعد هذا التقرير اكيد وحتما وشيور عرفتوا
هذا الموجز واليكم تفصيل النشرة الوصفيه
بالنسبه للشوشه
كانت الوالده من الليل تقضب فيها يعني تهبطها
باللي يقد رها الله عليه شوي زيت على شوي دهن
الا على طاري الدهن تخبرون كريم النخاع الابيض هاه تذكرونه ؟؟؟
الا الا تذ كروه ايه هو هذا بالضبط اللي بالقارورة القزاز وغطاه اسود
عاد تضيف الوالده للكشه شوي زبده على شوي كشنه <<<< حشى طلع لنا صحن
كشري مو كشه وكل هالغرابيل ويالله يالله
وبعد هالتعزير تهجد و تهبط الكشه بعد كذا تقوم الوالده بكل ما اوتيت
من قوة وتقضب الشوشه وتسوي منها ذ يك الجد يلتين
عاد تحط اكسسوارت ذ يك الايام وهي عبارة عن شرايط بيضاء وتربط طرف الجد يله بمغاط
سراويل هالايام اذاكنتم تعرفونها؟؟
يوووووووووووه يووووووووووه
نسيت اقولكم
اننا يا ويل اللي تنام من قبل لا تلبس الشراب علشان ماتجلس
الوحده تتعافر مع الشراب الصبح وهمن تصيف على المد رسه
(( لغير الناطقين بالقصيمي ))
ترجمه الجمله الاخيرة : بعد ين تتاخر على المدرسه
علشان الصبح ماغير تلبس المريول وتربطه
وتد خل رجلينها بمكانها الطبيعي
ومكانها الطبيعي هو ذ يك الجزمه السوداء
ام مزلاج بالجنب
يعني قفل الجزمه
اضف الى معلوماتك تررررن موسيقى تصويريه
كنا نسمي الجزمه في ايامنا كند رة
عطيناكم تقرير للشعر والمريول والكند رة
لحظه لحظه ماقلت لكم ان الشراب كان
نوعه مو مطاطي علشان كذا تطلب منا الماما نلبسه من الليل
وكانا اذا لبسانه يوصل للركبه
الحين جاء دور الشنطه
وياعيني على الشنطه لعلمكم شنطه زماننا ماعاد توجد الحين
الا في بعض ولا حظوا بعض دول القارة الافريقيه لا وتحت القارة
هاه عرفتوا ؟؟
ايه ابيكم تصحصحون معي مهوب الوحده دالقه اثمه
ماتد ري ويش السالفه !!
وبعض من شناطنا عند بعض شيبان هالوقت
تلاقينه حاط فيها وثايق مهمه:
صك عرسه – صك بيته – صك ارض له –
صك حوش غنم – صك د جاجته وعنزه
كانت الشنطه سوداء من ربل لها كتفات على الظهر
وبعد ين فيها من قدام جيبين
بالعرض للبنات وبالطول للعيال وفيها جيب للد روس
يعني ماغير فتحتين من قداموحده ومن وراءثانيه وقضت الشنطه
وفيها قفل للعيال وقفلين للبنات
الشنطه لجميع ابناء الجزيرة العربيه من بنات وعيال
يعني كان كل البنات هذا هو زيهم للمد رسه
وعد تهم : قلم رصاص اللي فيه محايه من فوق
وكان الوانه احمر واخضر وازرق والبرايه كانت ام مرايه
وقلم ازرق جاف ويا ويل اللي يضيعه وهو ماكحكح حبره
والد فتر نجلده بفرخ ابيض همن نلبسه بلاستيك مثل حق اللحم
وند بسه بالد باسه
وبس ماهنا غرابيل والمسطرة خشب تعمر معنا الى ما يشاء الله
مافيه احد يختلف عن احد الا كان بنت ناس متمد نه و مرفهه شوي
جايه ومعها مطاره مويه لا ونتقعد لها نقضي مويتها حنا
يعني هي تشخص بالمطارة وحنا نقحن
هذا هو وصف عد تنا وعتاد نا بالماضي
يلله عاد جاء د ور الحاضر اعصبوا روسكم من اللي يبي يجيكم
الحاضر وياويلي من الحاضر
من يوم صغار ومابعد طلعوا من البيضه
على قولت الماما وهم يتشرطون
عاد ويش يبون يسون الحين يوم كبروا ....
فترة التجهيز للمدارس فترة عصيبه للامهات.
لا وخصوصاً اذاكانوا في مدارس خاصه,
لا والله حتى المدارس الحكوميه مهوب قليلن شر يلحقوا ربعهم
الجزم ما ينفع الا الماركات
فيلا * سكتشرس* نايك * د يزل * بنزين هههههههههههههههههههه
اسامي ما اد ري من وين جابوها يعني ماركات اشكال والوان
الشناط زي الماركات الاوله وزود عليها كاتر بالر انا خابره كاتر بالر للدركترات
وش جابهم للملا بس والخلا قين ونواعم الحريم
آي د نت نــــــو!!!!!!!!
الد فاتر
المدارس الخاصه تعطي اغراض المد رسه
من اقلام ود فاتر صحيح انه ماشي حاله
بس ما دام الشي مد فوع قيمته مع الرسوم
ليش ما يستفاد منه ؟؟
رد بنات الحاضر : لا تفشل ماتصلح
عاد تعالي شوفي وشو اللي يصلح عند المكتبات
اللي اسعارها فوق ونار وغاليه هي اللي تصلح
حتى ابو ريالين مايصلح يسقط من القايمه للاقتناء منه
نجي الحين للاغراض المدرسيه حد ث ولا حرج
الاقلام اشكال والوان حتى الفسفوري صاروا يكتبون فيه
انا مادري وشلون يقرون فيه ما تنفقع عيونهم
انا خابرة الالوان الفسفوريه تشخطين على السطر المهم
لا وتتفقع عيون اللي يقرأ
وقلم الرصاص له شوشه من فوق
قضينا من شوشنا جتنا شوش الاقلام
كانه راس جني يادافع البلاء
وشي من الاقلا م يولع لمبات كنه صاله افراح ولا مطعم بخاري
وشي يتكلم انا خابرة القلم يكتب وهو ساكت ماخبرت انه يحتسي
كفرنا بهم وآمنا بالله
مساحات- برايات - مساطر- الوان..... الخ
كل شي يهول اكثر من غيره
يعني الفترة اللي قبل المدارس
ماغير طبقي بالاسواق الله لايواخذ نا
من سوق لمكتبه
ماكفاهم الاغراض اللي جابوها معهم
من السفر لا ويبون زود الله لايعاقبنا
عاد اللي ينقص من بناتي يكملونه خواتي
يعني الضعيف هو انا والسواق الد لخ
والله ورم راسي وصدعت رجولي
ولا مهوب تسذا خربطت قصدي
ورمت رجولي من الدوران وصدع راسي
ماغيرامشي وابلع بناد ول قاهر الاوجاع
كل هذا والله حاصل ويسير من تجهيز المدارس
هذا غير الطلبات اللي تطلع بعد ماتبدا الد راسه
هذي كراسه فلانيه
وهذا د فتر مكعبات
وهذي الوان مائيه وزيتيه
ومريله مطبخ والله يعظم الاجر
اهب عليهم جــــيل اللا بيليو والنعومه
مايقنعهم شي مايبون الا التميز لحالهم باغراضهم
واذا شافوا احد زيهم جدعوا الشي
ويقولون : فيه احد مثلنا بالمد رسه
طيب واذا صار!! مافيها شي!!
هذا رد بنات الحاضر:
لا مابي احد زي لبسي واغراضي
هذا غير ملا بس الشتاء وفنايلهم وجاكيتاتهم
يبون الشي يصنع لهم لحالهم
عجيب والله وينهم عن ايامنا مافيه وحده مختلفه عن الثانيه
تشوفين الواحده تبين تطلعين فرق واحد بينه وبين زميلته ماتقد رين
مافيه احد افضل من احد كلنا سيم سيم مافيه شي يميز احد عن الثاني
الا فرق ان هذي متفوقه وهذي د لخه صاكه القزاز.... قصدي كمخه وكسلا نه
مدارس الماضي هي اللي طلعتنا رجال اوووه قصدي حريم ننحط على يمناك
نسيت نسيت
اصبروا اصبروا ماقضيت
آخر اقلاعات البنات بالمدارس طاحوا قبل فتره بظاهرة
التقويم مهوب التقويم الهجري لا!!!
تقويم الاسنان حتى اللي اسنانها تقل لولو ومافيه احسن منها
تقول مثلي مثل غيري من البنات وابي احط واغير الوان التقويم كل شهر لون وشكل
كنها الوان التلفزيون اذا صك وخلص الارسال
احمر اخضر ازرق بنفسجي يعني الوان الطيف
بس بد ون الرنين والازعاج المصاحب له
طيب ويش معنى هذا قلد وا فيه وغيره لا؟؟
او هذا علشان فيه زود خساااااااااير
بس عش يوما ترى عجباً<<< ترى هذا المثل من راسي وخزعبلا تي
خلاص شرفنا على النهايه استانسوا نبي نخلص بس خلاصه كلامي
ليش مايصير التميز
بالتفوق
والاخلاق الكريمه
وحفظ القرآن
هذا هو كلامي لبناتي دايم لكن لاحياة لمن تنادي
سؤال موجه لبنات الواحه:
هاه انتم توحون ؟؟
سلااااااااااااام
ود متم لمن يحبكم وأنا أم تأ بط شراً منهم
ياحبيلك ام دحيم اثرك مستدير راسك بالشواع مالك حس ولاخبر عشان تشترون مقلمه ماحد بالعالم عنده مثله والا برايه من دون مرايه خخخخخخ والاقلم يحل الواجب بدون مانمسكه ياعمري والله
اجل انا مرتاحه الحمد لله ماعندي بنت تغثني خخخخخخخخخخخ لان البنات هن الغثيثات ((خلي البنات يولعن من القهر))
والا وش رايكم يابنوتات ؟؟؟؟؟؟؟؟؟؟؟؟؟