شذى اللافندر :

واضح بينكم غيرة اسلوبك تقارنين دائما بينك وبينها وناسية أنكم شخصيتين مختلفتين حتى وإن كنتم أختين أختك تحب الخصوصية في كل شيء وهالشي فهمته من قصة مكياجها ببيتك ليلة زواجها وأنتي حياتك مكشوفة مفتوحة للآخرين وتحبيني مشاركة الآخرين لك في كل تفاصيل حياتك هالشيء فهمته من قصة حملك ، بناء البيت ، زياراتك كل وحده عايشه حياتها بحسب شخصيتها ولكن انتي تطلبين منها أنها تصير مثلك وهالشيء مهوب بيدها لأنها مختلفة عنك على فكرة بصعوبة حاولت أتخلص من تأثير كلماتك لأنك كنتي تحاولين تزرعين الحكم على أختك في أنفسنا لكن أختك حاسة بأنك تدورين أخبارها أو بمعنى أدق تغارين منها علشان كذا تخبي عليك دون الباقين وذكرتيها أكثر من مرة تنتقي من تقول ،، تنتقي من تزور ،، من تتصل ،، مهوب شرط أنها أختك بأنها ترتاح لك وتقول لك كل شيء بحياتها بتقولين أنا سويت لها وسويت لها وسويت لها سؤالي وجاوبي بنفسك .. سويتيه من باب أنك تبغينها تردها لك ؟ أو من باب أنها أختك ؟ وأكبر دليل على أنها ماترتاح وتقول لك كل شيء بحياتها أنك تقولين كان يجي منها قبل الزواج لكن زاد بعد زواجها ليه ؟؟؟؟ لأن قبل زواجها كنت أنتي وياها متكافئتين في كل شيء نفس المزايا ونفس المسؤليات ونفس الحقوق والواجبات لكن بعد ماتزوجت صار فيه اختلاف بينكم .. هي حاولت تبعد حتى ماتثير غيرتك زيادة منها وأنتي تحاولين تعرفين كل شيء عنها و تعتبرين أن ماتقدمينه المفروض يكون له ثمن أقلها تطلعك بكل تحركاتها أو أو أو تقولين أنها حطت عيالها عندك يوم راحت تالد ،، لا تمنين على أختك بهالشيء حتى الجيران يفزعون لبعض في هالأمور وتقولين أنها تسألك عن أحسن مدرسة .. سؤال عابر وعادي .. هل مقابل الإجابة عليه لابد أن تدفع كشف دقيق لحياتها كلكم خوات وتحبون بعض هذي مافيها شك لكن الفرق بينكم أن أختك واعية أكثر منك على أنها أصغر منك وعت بالغيرة اللي بينكم واللي ماحسيتي فيها ويمكنها لسعتها في مواقف من غير ماتحسين بنفسك علشان كذا كانت تحاول أن ماتخسرك كأخت ولكن تبعد حتى ماتثير غيرتك وماتقول لك حتى ما تحترين هي وعت بأن فيه أشخاص في حياتها ممكن أنها تخليهم يشاركونها حياتها مثال أختك الكبيرة ، أمك لأن الغيرة هنا مفقودة وتحاشت بعض أخواتها لأن مهوب في مصلحتها ولا مصلحة أخواتها من الإطلاع على هالأمور مراعاة لمشاعرهن ومثال ذلك ماقالت أنها مسافرة بعد 4 ساعات حتى ما تثير حفيظة خواتها أو غيرتهن التمسي لاختك عذر و مليون عذر وإذا مالقيتي لها عذر قولي لعل لها عذر وأنا ما أعرفه أما من ناحية الخفاء ،، أنتي من نجد وهالشي مهوب غريب بيننا ولا جديد علينا يعني لو وحده من المنطقة الغربية كاتبه الموضوع كان قلت غريبة لكن من نجد كل حياة أهل نجد خفاء × خفاء تطلع الوحده من عند أمها وتروح تعتمر وترجع ولين سألوها قالت جحيد وأمر بعيد يعني خفاء وكذب أنتي محتاجة تغيرين نفسك وتدركين بأن الله هو المعطي وهو المانع ادراك قناعة مهوب ادراك قول إذا وصلت هالقناعة بداخل عقلك بتتركين المقارنة بينك وبين أختك وبين ظروفكم و ظروفها أصلاً بيمتلي قلبك رضا و ماراح تصير أكبر همك وش سوت وش قالت وش خفت محتاجة تفهمين أن هالأنسانة اللي تتكلمين عليها بهالأسلوب هي في النهاية أختك زينها مزينك وشينها مشينك لا تتركين الغيرة تجتاح قلبك وتخليك تبحثين عن أي تقصير منها حتى تكبرين من حجمه مثل قولتك ماتعزم ولا تضيف أحد هل تدرين وش بينها وبين زوجها ؟ وهل تدرين زوجها يعطيها مصروف بيدها أو مهنيها وعازها لكن مايمسكها الهللة وهالشيء فهمته من خلال كتابتك بدليل أنهاماتعزم و بدليل أنها ماقدرت تجيب لك النزالة إلا بعد 3 سنوات مع أنها كل اسبوع عندك البيوت أسرار والناس أجناس ولكن الغبينة لين صارت الأخت تذم بأختها عند الناس بالنسبة لسؤالك الأخير .. هل تزورينها وهل تعطينها هدية ؟ الأصول تزورينها وتعطينها النزالة من سعتك من قدرتك وإذا مامعك مهوب لازم تهدين لها الحين متى ماتيسرت معك أهدي لها ولا تقولين لها شيء أن مامعك أو تعتذرين روحي لها وسلمي عليها وباركي لها ببيتها الجديد هذي أختك مهيب ضرتك وادعي لها بالبركة تيسرت معك المادة اشتري لها نزالة ماتيسرت متى ماتيسرت جيبي لها إنا على دخلة شهر كريم والنفوس تتصافي والقلوب تنغسل ونتعرض فيها لنفحات رحمة الله لا تخلين ابليس يعمي بصيرتك ويغطي على قلبك ادحري ابليس ولا تقطعين رحمك ونصيحة أخيرة .. يمكن هي شافتك تحكين بكل شي بحياتك وهي شخصيتها مختلفة ماتحب الناس تعرف كل شي بحياتها فاعتبرتك مالك سد .. يمكن لهالسبب تتحاشاك خلي لك أسرارك ،، وخلي حياتك الخاصة بك لك ،، والأشياء العادية عادي تظهر للجميع الله يطهر القلوب و يصفي النفوس

واضح بينكم غيرة اسلوبك تقارنين دائما بينك وبينها وناسية أنكم شخصيتين مختلفتين حتى وإن كنتم...

ساكنة الأطلال :

يالطيف كل هالثرثرة علشان تبررين لأختها من متى الاخوات يدسون اخبارهم عن بعض ويتعاملون زي الاغراب هذي اختي حتى لو اغار منها واحسدها في النهايه أختي صعبه الناس تعرف اخبارها وهما غرب وانا اختها اللي تربيت معاها في بيت واحد تعاملني كأني وحده ماتعرفها ... راجعي نفسك وقناعاتك وتأكدي ان مافي احلى من البساطه والعفويه وان التحفظات والدسدسه تتعب صاحبها وتخليه انسان مو طبيعي ,, اساسآ اتحداكِ لو ترتاحين للحرمه اللي تتحفظ وتجحد صدقيني انك ماتقدرين تجلسين مع هالنوعية من البشر هذا وانتي في السنه حسنه تشوفينهم عكس الانسانه العفويه جلستها حلووه ومريحه وقلبها ابيض تحبين تشوفينها دايمآ فما بالك بالاخوات اللي يتقابلون كل اسبوع ليه مايكونون ودودات وعفويات ومافي بينهم خصوصيات نتشاور ونتناصح ونوقف مع بعض نضحك وننبسط مو احسن من الرسميات والتحفظ معقوله اختي ماتقولي انها سافرت ولاتقولي انها جالسه تبني ولا اعرف متى تحمل ومتى تولد اجل يوم نتقابل نتكلم في ايش كيف حالك وصحتك وخلاص سكتم بكتم جد زمن العجايب ..... انا ممكن اعذر الاخوات اللي ماعاشوا مع بعض لكن الشقيقات من أب وأم وحده تربوا في بيت واحد مااعذرهم ولا ابرر لهم ,, مستعده أدس عن كل الناس اخباري الا اهلي أمي واخواتي أول من يعرف اخباري وتحركاتي

يالطيف كل هالثرثرة علشان تبررين لأختها من متى الاخوات يدسون اخبارهم عن بعض ويتعاملون زي...