التنمر في المدارس

صبحكم الله بالخير يا عالم حواء 💜

بدت المدارس الحمدلله وبدت أجواء الصباح تتغير صارت بدل ماتصحين لحالك الصباح صرتي تصحين عيالك صار فيه أكشن صباحي إضافي 😁

لعلي أهوجس من يومين في سالفة قالتها لي بنتي اللي بالصف الأول إبتدائي بالرغم من أنها قالتها لي متعجبه مو متضايقه بس انا اللي شلت هم وجلست أفكر ، بعد أول يوم دوام لها جلسنا نسولف وش صار وكذا سولفت وخلصت بعدين قالت صح ماما تذكرت فيه بنات كبار مو معنا بنفس الفصل لما كنا موقفين عشان نعرف مكان فصولنا ( كانو يأشرون علينا ويضحكون يقولون ضفدع ) 😥😮 سألتني قالت صح هذا تنمر ؟انا كانت ردة فعلي ضحكت ماخليت الموضوع جدي بصراحه فقمت سألتها قلت لها طيب أنتِ ضفدع زي ماقالو ؟ قالت لا قلللت شفتي ماعليك منهم وأسفهيهم ، قالت بس صديقتي اللي معي راحت وعلمت المعلمة والمعلمة قالت هم يسولفون مع بعض مايقصدون ، أنا أعتقد أن رد المعلمة كذا عشان ماتضيق صدورهم ، بس هي عارفه ومتأكده أنو المفترض ماينقال للبنات الصغار كذا لأنه فعلاً يعتبر تنمر🤥
بعدين فهمتها وعلمتها بأنو ممكن تسمع كلام موب زين في المدرسة وشرحت لها أنو اللي يتكلم كذا مسكين وماعنده عقل ولازم نسفهه مانعطيه وجه .
تخيلو لو مثلا بنتي شخصيتها مهزوزه أو حياويه أو من النوع اللي يسكت ومايعلم وتتأثر بأي كلمه أعتقد بتكره المدرسه من اول يوم ومعاد تبي تداوم ، الله يهديهم ويصلحهم بعض البنات قوتها تكون في أنو تهين غيرها وتفشله ..

فأنا أشوف المفترض من الإدارة أنها توعي الطلاب و الطالبات وتفهمهم أنو التنمر تصرف سيء وممنوع جداً وغير مسموح بأي شكل من الأشكال، أنا أعرف التنمر بكل مكان حتى احنا يالكبار نواجهه ، بس أحس للأطفال إذا كان كل يوم وبشكل دائم لا مفر منه يعتبر مشكلة كبيرة ، وكثير سمعنا قصص نهايتها تكون مأساوية والسبب التنمر 🛑

السؤال لكم يا أخوات لو أطفالكم جاهم تنمر أيش بيكون تصرفكم ، ولو كان طفلك نفسه هو اللي يتنمر على الغير أيش بيكون تصرفك معه ؟