الحريم نسيوا انهم حريم ويلوموا المجتمع والغلط منهم

السلام عليكم ورحمة الله وبركاته








اليوم حابه اتكلم عن شي ملاحظته في اماكن كثير بس هنا في المنتدى مره واضح
وهوا اعتبار المراه جماد او روبوت بضغطه زر تنسى جرحها وتنسى المها
وعلى العكس اعتبار الرجل اله معظم ومبجل مستحيل تغلط عليه او تهينه والا في هذي الحاله تكون ماتستحق الحياه اصلا لانها غلطت على الاله
ودايم نلوم المجتمع وطريقة تربيه البنت والولد وهذا اسهل شي نلوم شي مبهم مو محدد ومافي امل نصلحه
صحيح المجتمع ذكور وفيه خلل كبير
بس يابنات لاحظوا معانا سبب الخلل الاساسي
احنا
الحريم
الام اللي ربت البنت على انها تصبر وتضحي بدون مقابل ومو مطلوب من الرجل اي تضحيات هذي حرمه
واحنا هنا بيننا وبين بعض بس نحاسب المراه الرجل مرفوع عنه القلم ومايتحاسب
بس دوره في الحياه يفكر يرضى او مايرضى على الحرمه اللي همها الاول والاخير تشتري رضاه
الكلام عن هذي الامور كثر والمكواضيع اتكررت بس انا اتكلم عن نقطة تعاملنا احنا مع بعض كيف
ماحاكرر كلام الموهومه واخوات كثير غيرها ان انا ماباحرشكم على رجالكم ابدا
لكن
ابغى تعاملنا احنا مع بعض يتغير
ابغى نعامل نفسنا اننا بشر ولنا مشاعر ولنا هفوات
زي مالرجل من راسه لرجوله هفوات في هفوات
عشان اوضح لكم وجه نظري
تجي وحده تكتب موضوع زوجي اكل اكلي وعصبت عليه كلهم يهبوا عليها انتي طفسه وماتستحي وقليله ادب واصلا زوجك مسكين وغلبان المفروض تقوليله بالعافيه على قلبك وتديه بوسه على راسه وتجري على غرفه النوم تتزيني وتلبسي قميص نوم مغري وتجلسي معاه
بس لو كتبت وحده انها اكلت اكل زوجها كانوا قاللوها انتي طفسه وعبيطه وهبله وماتعرفي تحترمي زوجك ولاتعرفي تتعاملي معاه وهوا صابر عليكي الله يعينه مسكين ابتلى فيكي
نجي لموضوع ثاني
وحده تكتب انا عصبيه مااقدر اتحكم في اعصابي كل الردود انتي اصلا ماتستحقي تكوني زوجه لزوج طيب ومسكين وغلبان زي زوجك والله رحمناه المسكين
اصلا زوجك ايش مصبره عليكي لدحين المفروض يطق عليكي وحده ثانيه عشان تتعلمي الادب
لكن لو وحده كتبت زوجي مره عصبي ويكسر البيت لمن يعصب الردود حتكون
مسكين تلاقيه مضغوط وكل الرجال لمن يعصبوا كده احمدي ربك مايشرب وانه يصلي
طيب الحمدلله انه يصلي ومايشرب مع ان مو انا اللي حادخل النار لو عمل دي الاشياء هوا اللي حيدخل يعني هوا مابيصلي عشان عيوني ولا مبعد عن الشرب عشان سواد عيني عشان نفسه
لكن مو من حقي اطلب زوج يحترمني ويتعامل معايا باحترام؟؟لمجرد انه يصلي ومايشرب
تجي وحده تكتب انها خربت حياه زوجها وخلته يترك وظبفته تجي الدعاوي اشكال والوان
الله ياخدك
حسبي الله عليكي
الله يبليكي بمرض ماتتعافي منه\
لانها خربت حياه الاله المبجل
مره قلوبنا تتقطع لمن رجال ينضر بسبب مراه
وتلات ارباع الرجال لمن بيخطوبا موظفات بيخلوهم يتركوا وظايفهم
بس تلاقي الردود عليها اكيد من حقه يخليكي تتركي وظيفتك يبغاكي متزينه له وفاضيه له
مع العلم ان الزوج دوامه اطول من دوام الزوجه بساعات ويرجع من الدوام ينام ويصحى يخرج
يعني يبغاها تفضى للجدران مو شعان يجلس معاها
لكن مجرد تحظيم عاطفي ماابغى انسانه مستقله ماديا ولا كيف اعاقبها والوي ذراعها
انا في مشكله بيني وبين زوجي حلف انه هذا الشهر مافي مصروف
جلست طول الاسبوع مااطبخ
صار ياكل عند امه على اساس يضغط عليا اني استحي من امه واخاف تتكلم عني وانجبر اطبخ
ولا همني
الين ماصار يطلب مني الاكل ويقولي صضرت استحي من امي قلتله تحرمني من حقوقي احرمك من حقوقك
لمن يخلص الشهر ويجي الشهر الجاي ووقت المصروف الجديد ارجع اطبخ
الين مارجع المصروف واستلمته رجعت اطبخ وادلعه واقوله اطلب واتشرط وتلاقيه موجود
معليش انا مو جماد وانت انسان لك حقوق وانا عادي اتنازل
انا مابقول خلي راسك براس الرجال بس بطلوا كلمه هوا رجال
تقولك زوجي طول الوقت بره البيت وانا مايخرجني وحتى مانعني من اهلي تقولوا هوا رجال الرجال مايجلس في البيت
نفسي اعرف من فين جات هذي القوانين
انا ابغى وجهة نظرنا تتعدل يعني لمن تحكمي على مشكله او موقف احكمي انه صار انسان وانسان واحكمي بدون ماتفكري في رجال وحرمه
لان صاير عندنا اي غلط يغلطه الرجال معذور ومسكين وكل الرجال كده
بس لمن الحرمه تغلط
ليش زوجك مااتزوج عليكي الين دحين؟؟؟
ايش مصبره
يعني احنا ماصار عندنا رحمه على نفسنا ليش نبغى الرجال يرحمنا
احنا صرنا مانفكر في نفسنا اننا بشر ليش نبغى الرجال يعاملنا اننا بشر ولنا مشاعر
صح المراه رمز العطاء والتضحيه
بس لاتنسى انك انسان وبشر وربنا كرمك وعزك وانتي بتتنازلي عن هذي العزه والكرامه اللي ربي ميزك فيها
ضحي ومشي ومو في كل مشكله تسوي فيها بطله وشجاعه
بس لاتضغطي على نفسك وتدوسي على مشاعرك غصبن عنك وتجبري نفسك تبلعي الخيانه وتبلعي الاهانه وترسمي ابتسانه على وجهك
عالاقل اعطي نفسك الحق انك تحزني ويبان حزنك على وجهك
ماادري وضحكت فكرتي ولا لا
بس في ناس تكون الانسانه في عز مرضها وتعبها تقوم وتتروش وتتمكيج وتطبخ وهيا بتموت من المرض عشان تخاف زوجها يزعل ولا يتزوج عليها
مو معطيه نفسها الحق تكون انسانه وحتى قوانين المرض تنطبق عليها
وطبعا الزوج لمن يمرض تنقلب الدنيا ولازم تلصق جنبه وتمسك يده وتسويله وتسويله
ولو وحده كتبت انها تركت زوجها في مرضه
يقولولها اصلا المفروض زوجك يتزوج عليكي انتي ماعندك قلب
بس لو وحده كتبت انها مريضه وزوجها سافر وقالها روحي مع اخوكي
يقولولها مره زوجك كريم وطيب وحنون تركلك فلوس الدوا او اعطاكي الاذن تروحي مع اخوكي الله يرزق بنتي زوج حنون زي زوجك
صرنا نستغرب المعامله الانسانيه من الزوج كاننا مانستحق اي معامله حسنه ومانستحق الا الاهانه
كل وحده تحط فغي بالها محد حيحبك ويفكر فيكي اذا ماحبيتي نفسك
ولو نلاحظ اغلب الرجال بيخونوا حريمهم مع حريم اكبر من الرجال نفسهم وعجايز ومو حلوات زي حريمهم
بس يقولك الرجل يتزوج اتلمراه الضعيفه ولكن يعشق ويحب الرماه القويه
بس يتزوج الضعيفه عشان يتحكم فيها ويسوي رجوله
واتذكرت قصه الاخت ماتت فرحتي اللي كانت تكلم زوجها على انها وحده ثانيه
وزوجها كان يبهدلها لو صرفت 400 وعلى ادويه ولدها ماراحت اشترت فيها عطر
بس كان يعطي عشيقته ب30 الف ومافوق وعشره الاف بس كده هديه مصروف يد وساعات الماس ولاب توبات ومصاريف بالهبل
لانها قويه
بس احنا الزوجات نخاف على رجالنا وعلى فلوسهم ونوفر لهم وفي الاخير ناكل على راسنا
وكنت تقريبا كل يوم اقرا عن وحده اخدت قروض وباعت دهبها عشان زوجها وفي الاخير اتزوج عليها
بس برضو لو جات وحده استشارت البنات تبيع دهبها لزوجها ولا لا كلهم يقولوها اكيد هذا زوجك حبيبك كيف قلبك يطاوعك والبنات اللي نصحوكي ماتعطيه يبغوا يخربوا بيتك
مانتعلم الدرس الا لو صار فينا