الحكيمات و الخبيرات ابغاكم في موضوع!!

اتمنى و ارجو رجاء خااااص من المشرفات عدم نقل الموضوع ،ارجوكم بنات احتاج اكثر ردود ممكنه و تفاعل ، مره الموضوع اثر فيني و بكيت من قلب

صديقتي طلبت مني اكتب لها رساله مو مهم طولها او قصرها المهم انها تبغى توصل كلام مؤثر لشخص و انا قلتلها بستشيركم و اتمنى ما تردوني خايبه

صديقتي عندها اخ عنده اعاقه ذهنيه بسيطه جدا، حركته طبيعيه و كلامه طبيعي بس تفكيره شوي متأخر من عمره ، ما يكتب ولا يقراء بس ما شاء الله يعرف كل شيء و حتى عنايته الشخصيه يقوم فيها بنفسه و في البيت وضعه مرتاح يعني ابدا ما تعرفي فرقه من غيره الا اذا ركزتي في كلامه و تصرفاته مره، عمره حاليا 20 سنه و جالس بالبيت بدون وظيفه ولا دراسه بعد ما خلص مدارس تربيه فكريه ، وين المشكله؟ المشكله عندها اخوان غيره اكبر و اصغر منه طبيعين و كل واحد منهم لاهي بحياته ، تعرفون الشباب كاشتين مع اصدقائهم او ملتهين في دراستهم او وظايفهم و هو المسكين بس طول يومه في البيت عند التلفزيون او يجلس عند باب الشارع يتفرج على اللي رايح واللي جاي او يروح مع امه واخواته بيت جدانهم اذا راحو يعني حياته محصوره في منطقه محدوده، هو فاهم انه وضعه اكيد مو طبيعي ، حتى يقول لهم ليش ما عندي اصدقاء ليش ما اسوق السياره ليش ما اقدر ادرس جامعه ، يعني حاسس بالفرق بينه و بين الي حوالينه، المشكله تقولي اخواني ما يهتمو ياخذونه معهم في مشاويرهم او يصادقوه او يكونو حوالينه اكبر وقت ممكن عشان يعوضون النقص الي هو يعيشه، صديقتي تقولي بعض الاحيان ابكي واتمنى اني خلقت ولد علشان اطلع معاه و اقوي من شخصيته و اكون صديقه الي يتمنى بس حدودي معاه داخل البيت او اخذه اروح معاه المولات واجلس اسولف معاه انا وامي دايما حوله بس تعرفون كيف احس احسن لو معاه ولد يعلمه على التعامل مع المجتمع و الرجال . ابوه الله يجزاه خير رجال كبير في السن ياخذه معه المسجد كل صلاة و مسويله برنامج حفظ قرآن بالتلقي كل يوم بعد المغرب ساعه يجلس يحفظ فيه القرآن، صح هو ينسى بس الاب حريص على متابعته.

المشكله الثانيه بعض الايام هالولد يكون معصب تعرفو كيف ذوي الاحتياجات بعضهم عنده عصبيه و اذا صارت مشاده في الكلام مع اخوانه يتضاربو معاه تحلف انه اخوانها طيبين و اخلاقهم زينه بس ما يعرفون يتعاملون معاه و يحسسوه بأنه معاق و ما يفهم ، و هي تقول انه يحرق قلبها احد يلمسه او يأذيه لانها تحسه في الآخر ما يملك الحيله و الذكاء الكافي مثلهم عشان يحطو عقلهم بعقله، اكيد من وضعه تجيه احباطات و اكيد عنده مشاعر مكتومه ما يقدر يعبر عنها.

هذي مختصر الموضوع: صديقتي تبغى كلام معبر تكتبه لاخوانها منها تعاتبهم على تعاملهم معاه ومنها تحثهم على صحبته و على الاحساس بالمسؤوليه مو الماديه تجاهه لا المسؤوليه الاجتماعيه و النفسيه و انهم هم الحياه بالنسبه له ما عنده مكان غيرهم يلجاء له، البنات مصيرهم الزواج وترك البيت و الام والاب الله يطول في عمرهم بس ماهم دايمين يعني لازم يكونو اقرب لاخوهم و يحتضنوه لانه خلاص هذي حياته ما له غيرها. اتمنى محد يدعي على اخوانه هم اكيد مو عارفين كيف يتعاملو معاه.

دعواتكم له انه ربي يمن عليه بالشفاء و انه على ذلك لقدير.