الحمدلله الذي بنعمته تتم الصالحات ..جاني بنوته

السلام عليكم ورحمة الله وبركاته
كيفكم بنااات
طبعا محد جاب خبري لوول بس معليش قلت لازم ابشركم واقولكم اني ولدت بحمدالله ومنته
وجبت بنوتتي اللي عيت تطلع الله يصلحها
طبعا ذبحتكم بكثرة مواضيعي هنا لاني انواع الرعب من الكشف اكثر من الولادة
وبما ان بنتي طولت في بطني وانا مافيني اي طلق
فقرروا لي طلق صناعي
رحت وركبوا فيني طلق وجلست اطلق اطلق والصراحة شي غريب الطلق الم يخليني افرفر بمكاني لوول
طبعا فتح عندي الرحم تقريبا 4 سم وطلبت ابرة الظهر ..
جت ابرة الظهر
واشهد بالله العلي العظيم انها كالسحر من بعدها ماحسيت بشي
المهم فكوا موية البيبي وكان زوجي عندي ومواصل من امس وخليته يرقى للغرفة ينام شوي لانهم قالو مافي ولادة الا الظهر..وانا بعد انام شوي واقوم
انتظم الطلق عندي وصار يفتح الرحم بسلام ماشالله وتفاءلت كل ساعة يفتح سم ..
بعدين جا الظهر بس كان 8 سم
كلمت زوجي ونزل لي
انتظرنا ساعة ساعتين ثلاث
جت الساعه 3 ياسلام ولادة..وقفوا لي ابرة الظهر وبديت احس بطلوووق ودفع جت دكتورة مناوبه الله يهديها ويصلحها
كشفت علي قالت احتمال كبير سيزيريان عملية طبعا قالتها ولا ماقالتها انهرت لان دكنورتي تقول وضعي طبيعي
واجلس صياح لاني انفجعت الصراحه
واطلبهم دكتورتي جت قالت لا ان شالله الحين طبيعي يالله وتدخل يدها تكشف وتقول لي ادفعي ادفعي
واجلس ادفع ادفع بعدين قالت استني شوي
وش السالفه
قالت البيبي ارتفع مع الطلق سبحان الله
وغير كذا انقلبت على وجهها سبحان الله بين لحظات تغيرت كل الاوضاع
انهبلت طبعا واسئلها قلت وش نسوي طيب
قالت نسحبها بالجفت بس توقعون على تعهد لان السحب بيجي على الوجه بما انه هو اللي مقابلنا مو الراس..وانتم تتحملون النتائج
او عمليه وهو الحل الاسلم لك وللبيبي..لكن الجفت اسلم لك وخطر عالبيبي
طبعا زوجي واقف عندي واجلس اناظر فيه واصيييييح احس بنهار مو خوف من العملية بس جلست اقول للدكتورة ليه مو من الاول خليتوها عملية وارتحت ..وتجلس تحبب فيني الله يسعدها وتقول لي انو مو شي ينعرف من زمان
هذي في الولادة تتحدد وربي سبحانه هو اللي يقدر لنا هالشي..
طبعا صار صياح صياح طول الوقت وجهزوني للعملية واخذوني لغرفة العمليات وقابلني طبيب التخدير الله المستعان اللي كنت متغطية عنه انكشف على بس الله يجزاه خير محترم مره
جلس ينصحني وان ربي هو اللي يكتب لك ومن هالكلام لاتزعلين احمدي الله ان له مخرج اخر وزود لي جرعة ابرة الظهر وعطاني منوم ...
والحمدلله صحيت بس عشان اشوف بنيتي الله يجعلها من اهل الصلاح والتقى ..ورجعت نمت وماقمت الا بغرفة الافاقة اتنااااافض من البرد..شي عجيب سبحان الله نفاظه لدرجة الم بأسناني فضيع من كثر ماتصاككوا..

وبالنهايه جبت بنوتتي بكلا الطريفتين طبيعي وعملية وسبحان الله ..كانها فلم بس مو شي مخيف ابدا
يعني انا جبانه جدا بس ربك ييسر..حسيت الامور تمشي بسرعه والقررات تتخذها بسرعه..يعني ماضاق صدري الا بس بالاول اني سويت عملية ..الحين كملت اسبوع الحمدلله والامور ماشيه كويس يارب لك الحمد..ولو خيروني بين الطبيعي والعملية ..اختار اللي يختاره لي ربي..راضيه باللي يكتبه يكفي انه عطاني ذريه طيبه معافاة وهذي بحد ذاتها نعمه..

طبعا الحين انتهينا من الولادة وبديت بالنفاس وانواع تقلب النفسيات مع بنتي
ياناس مسوؤليه تخوف وغير كذا صدري مافيه حلم وانا من اول الحمل وانا بس ادهن فيه واسحب فيهم عشان يطلعون والحين التهبوا علي وتشققوا وبنتي ماترضى تاخذهم ابدا
فاضطر اشفط واعطيها والباقي صناعي لكن قلبي يتقطع مليون قطعه من جوا ابيها ترضع من صدري انا مره كنت متحمسه للرضاعة الطبيعية وهذا يخلي الواحد نفسيته تنحاس..الله المستعان.


وهذي القصه ومافيها ..
ويارب تهون على كل حامل وتقر عينها بشوفة جنينها