الحمدلله على سلامتي.. رجعت لكم وفي جعبتي طراطيع

هلالالا والله عيدكم مبارك ايامكم سعيده من العايدين من الفايزين كل عام وانتم بخيـــر

بشروا عساكم عيدتوا؟؟ وجمعتوا عيادي؟؟والا مثلي....العيد جا وراح ولاحسيت به ابدددددد

عاد انا مايهنى لي العيد ولا احس به الا لما اشوف عتاب تراكض وتدربي كرشتها مع البرزان وتغني (اهلا اهلا بالعيد مرحب مرحب بالعيد)
بس مااااش هالسنه قلبت المحطات مالقيتها....وين راحت تهقون؟

المهم...والله مالكم داعي....كذا سفانه تغيب عنكم اسبوع لاحس ولاخبر...وانتم ولاسالتوا عني ولادريتوا وين ارضي؟ <-----اسبوع تراه مو قرن!!

ايييييه ماقالوا لكم وش صار بي....الناس تعيد وتستانس وانا من مستشفى العظام الى مستشفى الاسنان مرورا بمستشفى الامراض العقليه (هذي الاخيره ماعليكم منها نمزح نمزح) ومحد منكم حن علي وتحمد سلامتي وجاب لي ورد بنفسجي وقال يااسفانه فقدناتس..حمدالله على سلامتس...يتربى بعزتس!! <----وشبلاي قمت اقط خيط وخيط؟!

سبب غيابي ان سالتوني...وانا داريه انكم منتم سالين بس غصب بقولكم وش كان فيني

....رحت اعيد عند خوالي....كل شي اوكي....بس البلا اني ماخليت سوق الا ومترته....وهاتك صرف!
اللي يسمعني الحين يقول يووووه...ياهي كشخت بالعيد....وغطت على بنات خوالها!
وانا ماحطيت فلوسي الا بالطراطيع...ادمااااان..ووالله ثم والله اني ماشريت ولا شي لا لبس ولااكسسورات ولاشنط.....الفلوس اللي المفروض اشري بها ملابس...مردتها على الطراطيع..كل شوي اقول خلاص هذي اخر طرطعانه اشتريها

بس هيهات...تجيني عقبها وحده من ذا العبدات شايله معها طراطيع غريبه...من وين جايبينها مدري....يدي بصراحه تحكني... واخم لكم ثلاثه ارباع الكرتون والحرمه تدعي لي...ايه..جزاني الله خير ويكثر من امثالي

بس والله مااستمتعت بها....تجمعوا علي البزران كللللل ابوهم يدرون ان هذي اللي تجيب لهم طراطيع كل سنه
واغريهم بالطراطيع واللي اخليه يهمزني واللي اخليه يسوي لي بيض مع جبن...ولامنه جابه لي قلت له وع مااحب البيض مايسوى عليهم يحول كل ذا عشان اولع لهم الطراطيع

والله من اول ماوصلت وكل القوافل وجحافل الجيوش من البزران والبزرات واقفين حولي حتى ماامداي دخلت وفسخت عباتي...عاد شكلي وانا شايله انواع الكراتين حقت الطراطيع اللي محزمه بحبال تقل تكرونيه عند باب الحرم تطر هي وعييلها

وخوالي يوم كل واحد شاف قشي خبوا ولاعاتهم وكل واحد خذا بزرانه خايف يجيهم شي مني

لكن هيهات....لا بغت شي سفانه لازم يصير

صفيت البزران بالشارع....لان الحوش لو ولعنا فيه بيهاوشنا جدي...خايف على المرسيدس حقته !!!!!!
واتقبع عباتي واطلع بالشارع حافيه....وانا ماسكه معي ورقه جريده ولعتها من الفرن واركض واركض طالعه من البيت ووصلت الشارع والبزران يصفقون لي ويصفرون تقل جايبه الشعله الاولمبيه

وبسررررعه قبل لاتطفي حطيتها على الصواريخ...ويللللاااا واحد ورا الثاني وذيك الاصوااااات اللي ترد الروح <----تعشق صوت الطراطيع

وفي كل مره على هالحال طالعه داخله من البيت وانا شايله الجريده اللي شابته نار

والبزران صافتهم بعيييييد عشان مايتوذى واحد منهم زي السنه اللي راحت همن يذبحوني امهاتهم....

المهم....وحده من الطراطيع ام خمس وعشرين ريال هذيك اللي به خمس وعشرين صاروخ
مربعه تقل قوطي تونه...تولعها بعدين ينطلق منها كل صاروخ لون مختلف

انا خليته اخر شي...لان اول مره اشتري هالنوعيه من الصواريخ

يوم ولعته وخرت عنه الا والصواريخ واحد ورى الثاني...ويتجمعون عيال الحااره كلللل ابوهم يتفرجون على طرطعانتي (بدا الفقش!!!)
خخخخخخخخخخخ المهم...وقفت الصواريخ عند 19 واحد!!

ياربي 6 صواريخ ماطلعن...لايكون لعبت علي ذا البياعه ام قنصوع....

قربت منها...بشيلها افحصها....الا ويقمز صاروخين على وجهي ورا بعض

واحد ورا الثاني...البزران ووووواااااااااع صارخ وزعيق تقل فيلم هندي...وانا تشقلبت للخلف بحركه سنمائيه...ورجعت بسرعه على ورا....الله لايعمينا ياربي وعلى طرف الرصيف دعست على قزازه كوكا كولا خش نصها برجلي
قمزت بسرعه وطحت من على الرصيف على ظهري...وصقع راسي بطرف سياره خالي
وانا اللي ماغير اشوف العصافير والبروق فوق راسي زي الرسومات ابد ولا ادري عن الدنيا
<-------منسجمه مع الفقش ماشيه 180

اشوى طلع احد البزران اجودي ونادى خالي...خبركم ذوليك كل واحد اندس بمكان لان اهلهم بيدبغونهم لو دروا انهم طلعوا معي نطرطع! (سبحان الله مدري ليش اخذين عني فكره اني خطر على المجتمع وعلى ورعانهم)

المهم لفوا رجلي مع ان مابها شي...محدثتكم قطو بسبع ارواح ماشالله علي ولصقوا لي الجروح اللي ملت يدي من اثار الطراطيع مع اني عادي متعوده عليها
لا وصارلي موقف بعد يوم رجعت البيت...كانوا عندنا حريم خوال امي وخالات امي وجيران خوالي زحممممه

دخلت عليهم اعرج...يعنني اتدلع وانا كما سبق وذكرت مافيني الا العافيه

وسلامات وش بك...عسى ماشر....
امي رقعت لي ماتبي تقول انها كانت تلعب بالطراطيع عشان ماي***وني ثم يهونون عني محد يخطبني لولده
قالت (ابد بس البنت طاحت من الدرج)

رحت انا قلت لاااااا انا كنت العب كوره مع البزران برا وجاني رباط صليبي!! <----ماتدري وشو بس تسمع به بالاخبار الرياضيه

عاد يقالي رقعت الحين...ويطيح وجهها امي يابعدي مسيكينه والله ماكان قصدي افشلها:(...بس هي عاد الله يهديها وشوله تقول طاحت من الدرج بعدين يحسبوني مطفوقه ومرجوجه ومااعرف امشي مع الدرج <-----لا بالله منتي مطفوقه ابد!

الــــمهم.....قضت سوالفي...هذا عيدنا انا واهلي كل عام ماتغير به شي...بعدين من زمان ماهرجت عليكم قلت اخش عرض عليكم واخرعكم!

ان شاء الله عجبكم الموضوع

يلا ردو عاد لاتفشلوني يامعين
:44: