الحمد لله بعد خمس سنين رزقنى الله بالحمل

أنا متزوجة من سبع سنوات وبعد زواجى بسبع شهور حملت ورزقنى الله ببنوتة ربنا يباركلى فيها وبعد الولادة ما أخذت اى موانع للحمل وكنا نمنع الحمل بالوسائل الموضعية ولما تمت بنتى سنتين قررت أجيب أخ أو أخت لبنتى ومن هنا بدأت المعاناة إنتظرت شهر إتنين ثلاثة إلى أن وصلت لسنة وما حصل حمل بدأت مشوار الدكاترة وطلبت منى الدكتورة تحاليل الهرمونات عملتها وطلع عندى نقص فى هرمون fsh المهم وصفتلى إبر منشطة وتابعت تبويض وكانت عندى بويضتين حجمهم ممتاز وخدت إبرة تفجير والدكتورة أعطتنى أمل كبير فى حدوث الحمل هذا الشهر ولم يحدث حمل
قررت تانى شهر نفس الكورس ولم يحدث حمل طلبت منى الدكتورة أعمل أشعة صبغة ويا ويلى من اشعة الصبغة عملتها وطلعت سليمة وتابعت تبويض مرة أخرى بدون منشطات وكان تبويضى ممتاز ولم يحدث حمل فى خلال الفترة دى أجرى زوجى تحاليلة وكانت جيدة المهم تعبت وتعبت نفسيتى قررت اريح نفسى من العلاجات
وبعد 3 شهورة سافرت أجازة إلى مصر قولنا نروح نكشف هناك وذهبنا للدكتور وكنت فى أيام تبويض وكان يومها عندى بويضة بحجم ممتاز وإقترح علينا الدكتور نعمل تلقيح صناعى وخصوصا عندى بويضة جاهزة وفعلا إدانى موعد بعد يومين وعملنا التلقيح وقعدت أنتظر خبر يفرحنى ولم يحدث حمل
ورجعت من أجازتى بمصر إلى المملكة ونفسيتى زفت قررت ترك الموضوع فترة
وبنتى تكبر سنة بعد سنة ووحيدة وأنا فى غربة بعيد عن أهلى ولا عندى جيران ولا أصحاب وحالة بنتى كانت بتقطع قلبى لما أجدها ماشية تدور فى البيت مش لاقية حد يلعب معاها ولو خرجنا للسوق أو السوبر ماركت وشافت أطفال تبقى هاتجنن وتلعب معاهم
قررت بعد فترة نجرب حظنا تانى مع طبيب آخر طلب منى إعادة اشعة الصبغة مرة اخرى بعد رفضى فى البداية لأنى جربتها قبل كده وتعبت منها فى النهاية أقنعنى زوجى وتوكلت على الله وقولت أعملها تانى وطلعت سليمة وتابعت تبويض وكان ممتاز ولم يحدث حمل
والدكتور قالنا ما تتعبوش نفسكو وإعملو تلقيح مجهرى ونظرا لأننا مقيمين بعيد عن مراكز العقم اللى بتعمل مثل هذه العمليات اجلنا الموضوع وفوضت أمرى لله وشيلت الموضوع من دماغى وأصبر نفسى وأقول الحمد لله أنا احسن من غيرى على الأقل ربنا رزقنى ببنت أمال المحرومين من الاطفال يعملو إيه
وقعدت سنة أخرى بدون ما اروح لدكاترة وتمت بنتى خمس سنوات ولم يعد امامى سوى دعائى لله ودعاء أمى لى
ومن حوالى 10 أيام حسيت بتعب شديد فى الجيوب الانفية ذهبت للمستشفى طلب منى الدكتور أعمل أشعة إكس على الأنف روحت عشان أعملها طلبت منى الممرضة عمل تحليل حمل للتأكد من عدم الحمل قبل عمل الأشعة ذهبت وعملت التحليل والنتيجة تظهر بعد نصف ساعة
فى خلال النصف ساعة زوجى لاحظ وجود إستشارى فى المستشقى إقترح عليا نروح نكشف عنده ونبتدى مشوار العلاجات كان لسه على موعد دورتى حوالى 3 أيام الدكتور قالى ننتظر قدوم الدورة ونبتدى الفحوصات وهانلجأ لعمل منظار ونصحنى بعدم عمل أشعة إكس حتى لو النتيجة طلعت سلبية لأن قبل الدورة النتيجة لا تظهر بدقة
وخرجنا من عند الدكتور روحنا على المختبر ناخد النتيجة وكانت سلبية
وروحنا البيت وأنابجهز نفسى لمشوار العلاج اللى هامشيه وآلام الدورة هلت عليا ومغص يجى ويروح وأقول خلاص هاتنزل النهاردة هاتنزل بكرة جه معادها وما نزلتش قولت يمكن لخبطة هرمونات لأنى كنت تعبانة وبآخد مضاد حيوى عدى يوم إتنين تلاتة وما نزلت قولت لزوجى يأتينى بالإحتبار المنزلى
وإستيقظت من النوم صباحا ودخلت الحمام وعملت الإختبار وروحت ألبس بنتى عشان المدرسة ورايحة جاية والإختبار قدامى وخايفة أروح اشوفه
المهم تشجعت وروحت أشوفه واخيرررررررررررا أشوف الخطين ياربى مش مصدقة نفسى بكيت من فرحتى وسجدت شكر ا لله وإسيقظ زوجى من النوم وناديت عليه ووريته الإختبار ويا فرحة زوجى
قولت لزوجى نروح المستشفى نعمل تحليل دم نتأكد وروحنا المغرب وعملنا التحليل والنتيجة تظهر بعد نص ساعة كانت نص ساعة عصيبة وظهرت النتيجة موجب الحمد لله واعطانى الدكتور موعد بعد إسبوعين نكشف سونار بنتظر الأيام تعدى عشان أروح أشوف جنينى وأملى عينى منه
إدعلولى ربنا يتمملى على خير ويفرحنى بضنايا
إعذرونى على طول الموضوع