الحياة عندما تتحول الى اللون الاسود

الله مااجمل هالمنتدى وما اجمل ذكرياته مهما طال الزمن وتطورت التكنولوجيا مالي غنى عن حواء وعالمها
اخواتي بحكيلكم مشكلتي لان ماعندي بعد الله احد افضفض له غيركم البشر ماعادهم مثل زمان يحبون يسمعون لك كلن مشغول بهمه
اخواتي ماني عارفة كيف احكي لكم مشكلتي انا انسانة ربي عطاني كل شي ولله الحمد صح اني تعبت وكافحت بالحياة عشان اوصل للي وصلت له رغم كل الظروف القاسية الي مريت فيها
ورغم كفاحي وحربي في هالحياة وضغوطاتها دائما من فضل الله احب نفسي ومهتمه بجمالي واناقتي ورشاقتي ولله الحمد من قبل ومن بعد
وصلت الان لعمر 40 والي يشوفني مستحيل يصدق وهذا فضل من الله
لكن لي سنة ونص تعبانة مره تعبانة جسمي منهك ومهدود احس فيني ضعف لي يمكن 6 شهور اذني تعبانة وفيها زي الضغط واسمع فيها تشويش مايريحني حتى وقت النوم ورحت للاطباء كلهم يقولون مافيك شي لدرجة واحد فيهم يقول خلاص اعمل لك ايه حاولي تتجاهليه
وبحكم اني موظفة ماعندي وقت اصلا للمستشفيات و وكلت امري لله وفعلا تجاهلته
هذا غير هبوط الضغط يجيني بين فترة والثانية لدرجة يغمى علي وبساستفرغ واشوف الموت لحظتها بعيوني يحزنوني اطفالي وهم يصيحون حولي ويجيبون لي الاسعاف ومااحب ابان قدامهم ضعيفة واشيلهم همي انقهر عليهم انا امهم مصدر القوة والامان بدري علي الامراض والتعب واشيلهم همي
وللاسف حتى هبوط الضغط عندي ماله سبب طبي وتحاليلي ولله الحمد سليمة
احس اني بموت صغيرة بسبب هبوط الضغط هذا واحس الدنيا ماعاد تسوى شي بعيوني ومو طايقة الدوام ولا اطيق اشوف الناس ولا اتكلم معهم ولا اجاملهم ماحب احضر مناسبات او اي عزيمة لاني احس مالي خلق للناس
احس صار عندي نظرة سوداوية وانا المشهورة اني انسانة متفاءلة ومحبة للحياة
ادعولي يا اخواتي والي مرت بحالتي تنفعني بتجربتها
والي عندها حل تعطيني و جزاكم الله خير