الرجيمات السريعه .. تجربتي الخاصه و كلام الاطباء

السلام عليكم

بادخل بالموضوع علطول
انا من عمري و من عرفت وزني الزايد و انا احاربه بشتى الوسائل
رجيم اليوم الواحد
رجيم الفواكه
رجيم الاناناس
رجيم الكيميائي
رجيم الوجبه الوحده

و ما اكذب لو قلت اني نحفت على بعضها و سمنت على بعضها و ثبت وزني عالبعض الاخر

بالمحصله .. نزول وزني كان لقلة السعرات الحراريه اصلا يعني بعمري ما نحفت وزن كبير على رجيم سريع

و جاني فقر دم من 12 سنه تقريبا ((من اول مره عملت الرجيم الكيميائي حق اسامه حمدي))
تساقط بالشعر
شحوب بالبشره
ضعف عام بالصحه

و الطامه الكبرى

اختلال بالغدد و على راسهم الغده الدرقيه

غدتي كسلت بسبب رجيماتي العجيبه .. و بسبب قلة الوجبات احيانا
و هالحكي اكدته طبيبه لقريبتي و هاوشتها على رجيم الوجبه الوحده
و صديقتي الان تموت نفسها بالرجيمات والمشي وما تنحف

و كان سبب ان انا وقريبتي مو قادرين ننحف ((انا يبيلي عالوزن المثالي 20 كيلو و هي يمكن مجرد 5 كيلو و ثنتينا نعاني من نفس المشكله لاننا سوينا نفس الغلطه))

يا بنات الوزن اللي ينزل بشده يكون من عضلات الجسم مو من الدهون
الكتله العضليه تضمر و تصير عضلاتك اضعف و تعبانه
و هالشي يقلل الحرق .. انا اعرف هالمعلومه بس كنت اتجاهلها لاني اقرا بالمنتديات العربيه بالذات عن نزول 30 كيلو بشهر و 10 كيلو بشهر و مدري وشو
كلام مغري
لكنه مو حقيقي

جسمك يظن انه في حالة مجاعه فا ما يحرق ابدا



تذكرت ضحكي على المغامرين بالبورصه واللي يصدقون العروض الخياليه للمكاسب الغير معقوله
انا زيهم بس مو بالبورصه .. انا لعبت بصحتي و كنت اقدر انحف من زماااااااااااااان لو اني مريحه جسمي من التعب

خمسه كيلو بالشهر مهيب شينه

يعني لين اخر السنه 25 كيلو !! حلوين جدا جدا

لكن مع كذا اروح اقرا التجارب الخياليه اللي ممكن بعضها اذا كان حقيقي يكون له اسباب طبيه صاحبتها ما تعرف عنها
مثلا تركت دواء معين
تحركت اكثر و سوت رياضه
جسمها مخزن سوائل فوق المعدل الطبيعي
اي شيء


و الان لما رجعت لرجيمات السعرات الحراريه ((حاليا دايت سنتر 1200 كالوري))
احس اني انسانه طبيعيه
اكل و ما انحرم و بنفس الوقت انحف بشكل معقول و مقبول
6 كيلو بالشهر لكني مو مفجوعه
اذا رحت مناسبه او بيت احد ما احس اني ببكي من الحرمان

و الشهر طار بسرعه و عالعيد ان شاء الله انزل 6 كيلو ثانيين

هذول 12 .... شينين؟؟

ممكن رجيم السعرات ينعمل بدون اشتراك بدايت سنتر
مجرد تحددين الوجبه اللي تحبينها و تحسبين سعراتها وتسوين منيو زي المطعم



مثال:

ساندويش بيض
صامولي + بيضه+ شريحة جبن قليل الدسم + مسترد + طماطم وشطه 340 كالوري

بيتزا البيت السريعه
1 الرغيف الصحي + صلصة طماطم بدون زيت + ربع كوب موزاريلا + مشروم + فلفل اخضر 150 كالوري


و هكذا

ولما تحطين كل وجباتك المفضله الصحيه و السعرات جنبها .. ابدأي كوني يومك منها يعني اختاري من الجدول لين تكملين 1000 او 1100 او 1200

عشان ما تقعدين تحسبين كل شوي ..


و ممكن تتبعين رجيم النقاط لانه مقارب بالفكره و حلو و يريحك من العد

و الرجيمات القاسيه ما تسوينها اكثر من 3 ايام بالشهر



طبعا اكيد ناس كثير بيفكرون ان كلامي احباط قياسا لتجارب كثير نقرأها بالنت
بس ما شفت ولا وحده تقول انها نحفت عالرجيم زي نحف صاحبة الموضوع الاساسيه

يجيك العنوان 30 كيلو بشهر بس انتي و كل العضوات تسوونه وما تنزلون فوق ال 7 كيلو !!


ما اعرف اكتب خاتمه بس اتمنى تستفيدون و تتلاحقون صحتكم لان النحف على المرض زي المتن .... شييييييييييييييين