الله يعطيك العافيه

هلا أخت ي.. أنا أم لبنتين وأرضعت طبيعي وما زلت أرضع ,, لكن لي كم تعليق أحب أوجهج لهم


في البداية اتركي نظرية المؤامرة .. ترا الغرب همهم يبيعون وموب همهم صحة والا ضعف اطفال المسلمين .. لأن لو هذا الكلام صحيح ما كان بيبيعون الحليب الصناعي عندهم .. ويسوون حملات عالمية لتشجيع الرضاعة الطبيعية وفيه برنامج من اليونيسيف اللي هو تابع للغرب همه تشجيع الرضاعىة الطبيعية في العالم .. فالموضوع غير مرتبط بنظرية المؤامرة ..


ثاني شيء .. كل أم وظروفها واللي تشوفينه حجة واهية هو حجة قوية عند أصحابه ..
مثلا ببنتي البكر .. رضعتها من أول لحظات الولادة طبيعي وما ذاقت الصناعي اللا بعمر 6 شهور كمساعد للطبيعي مع الاكل وبعد عمر سنة ونص فطمتها عن الطبيعي .. فالنقطة إن الاولى رضعت طبيعي سنة ونص .. منهم أول 6 شهور طبيعي صافي ..
اللي صار إن كل الظروف تكاتفت وشجعتني لإرضاع بنتي .. أولها ولادتي كانت طبيعية .. فكنت قادرة أرضعها بعد الولادة على طول .. وقدرت آكل بشكل جيد من بعد الولادة وبسرعة در الحليب .. ولما رجعت الدوام كان فيه غرفة مخصصة لسحب الحليب كنت أسحب فيها الحليب كل ساعتين وأجمده بالثلاجة وأخذه في شنطة خاصة للبيت وأرضع بنتي طول النهار وثاني يوم الصباح المربية تعطيها حليبي المجمد ..


في بنتي الثانية سبحان الله تقولين صابتني عين .. تعسرت ولادتي جدا وتهدد رحمي بالانفجار في الطلق فحولوني العمليات بنج كامل .. والله اني حسيت بالممرضة وهي تعصر صدري لارضاع البنت .. ظليت يومين موب قادرة أتحرك ودايخة تحت أثر البنج .. ما قدرت آكل وما قدرت أقعد أرضع البنت أبدا .. كانت أمي تحطها بالمقلوب علشان ترضع .. والنتيجة صراخ البنت شال المستشفى من الجوع .. والشفط ما طلع شيء من صدري .. فاضطروا يجيبون صناعي من ثالث يوم شربت !


بعد ما تعافيت ألم العملية وابر التجلط وحبوب العلاج عشت معاها بحالة سد النفس اسبوعين .. تخيلي في اول اسبوع خسرت 10 كيلو ! .. والبنت جوعانة أسحب لها القليل .. والدكتورة كتبت لي حبوب موتيليوم وشوي شوي اعتدل الوضع .. لكن ظل قليل
بعدها دخل رمضان وكنت طهرت وصمت والله الحليب نشف ولا قطرة ورجعت فطرت علشان بنتي وزدت جرعة الموتيليوم ورجع الحليب ..
خلصنا ورجعت الدوام لقيت غرفة سحب الحليب مسكرة لتغيير الديكور وصيانة الدوام وتعبت من احتقان الحليب ومن وقفت الموتيليوم نقص الحليب وكان خلاص بنتهي تنهد من الجوع خاصة انها غير عن أختها تريد الحليب أختها كانت تريد النوم
بعد هالموال أعطيت البنت صناعي من عمر 3 شهور .. طبعا ما زلت أرضعها وآخذ موتيليوم علشان أرضعها لكن ما ترضع الا رضعة أو رضعتين ومن تغفى شوي احط لها الصناعي علشان تشبع


والله ان في بنتي الثانية اشريت علب حفظ الحليب كارتون كامل لأني كنت أستهلكم كثير في البكر .. في الثانية ما استعملت غير حوالي 10 حبات ..
الظروف يا اختي تختلف .. والنية موجودة لكن فعلا كل أم معذورة لو اجتهدت وما قدرت ..

جزاك الله خير