رجاوي عسى المانع خير
بانتظارك

الجزء الثاني عشر ...تتمه

جروح..السلام عليكم..


اول ماشافها عبدالاله..انبهر على نعومتها واناقتها ..غير كذا شعرها اللي لفته امها لها بطريقه فاتنه فتنت عيون عبد الاله لها..


ابوجروح.. مدي يدك وصافحيه هذا زوجك..


جروح كانت منزله راسها لاكن من بعد ماقال لها ابوها هالكلمه ارتفع نظرها اللي طاحت على عيون عبدالاله وشافت فيه نظرة الانتصار...ثم رجعت ونزلت راسها بدون اي كلام...


ابوجروح يحاول يغطي حركة بنته..معليش البنت تستحي .**بعدها التفت على بنته**..اقول مدي يدك خلصينا...


عبدالاله باستهتار..معليش ياخال .....خلها على راحتها...


جلست جروح على الكنبه المقابله لعبدالاله على حسب توجيه ابوها...


عبدالاله ..الف مبروك ياقمر... وش هالزين كله ..وش هالحلا؟؟!!


طبعا جروح ماردت ...لاكن ابوها رد بسرعه..الله يبارك فيك وان شاء الله تعيشون حياه سعيده..


**جروح تهمس بصوت سمعه ابوها بس.**.امي ابيها تعيش معاي...


ابوجروح...سكري على الموضوع الحين ماينفع..


عبدالاله..وش بغت ياخال ماسمعتها..؟؟؟


ابوجروح..لا لا مابغت شي..


جروح..الا بغيت ..امي ابيها تعيش معاي..


تفاجأ الجميع على جرأتها بالحكي حتى ان ابوها بغى يقوم عليها يضربها..


عبدالاله مسكه بسرعه..وقف وقف لاتنسى تراها زوجتي ولا ارضى عليها..:42:


قامت جروح بتطلع لاكن عبدالاله ناداها..


جروح حبيبتي..


طالعته جروح بكل استغراب على وقاحته اللي مالها مثيل..حتى ان ابوها استغرب وجلس يناظر فيه؟؟



عبدالاله..وشفيكم متعجبين؟؟؟جروح صارت زوجتي..وانا احب انادي زوجاتي باحلى الالفاظ..!!!!

.شوفي يالغاليه..ادري ان اعمارنا انا وياك متباعده شوي..لاكن وللذمه والضمير بأقولك ان ابوك بايعك علي بيع بقيمة شيك كان بيكلفه حياته لوقضاها بالسجن..


جروح طارت عيونها :(ونست الحياء والتفتت على ابوها.. وش قال يبه ...بايعني بشيك ..؟؟:(



عبدالاله مستهتر..ايه.... بقيمة اربعين الف..متسلفها مني وكل ماقلت له قال اصبرعلي شوي الين جيتي ببالي..



جروح باستغراب وهي تناظر ابوها ولا فكرت تلتفت على عبدالاله..صرت صفقه بيدك ياابوي ..؟؟؟؟؟


ابوجروح ماقدر يتكلم..نزل راسه لانه ماكان متوقع ان عبدالاله يغدر به ويفضحه..


يبه ارجوك فهمني ..؟؟؟؟


ابوجروح..ادخلي عند امك وانتي ساكته..


دخلت جروح وهي منبهره ..مصدومه..متعجبه ...حزينه... ضايقه... والدمعه بعينها وبراسها الف سؤال وسؤال ..


استقبلتها امها... ولما شافت وجهها متغير واسود انهبلت....:( وقالت..جروح وش فيك وجهك اسود..بعدين ليه كل هالدموع..؟؟


جروح ماجاوبتها وهو اللي زاد من توتر امها ..


يمه ردي علي..تراني ماعاد اتحمل ..**مسكت راسها لان الدنيا لفت بها وقعدت على الكنبه **


**راحت لها جروح بسرعه وجلستها على الكنبه**يمه بسم الله عليك معليش لاتواخذيني اللي فيني شي ما يتصدق...شفتي ابوي ..صار مزوجني لعبدالاله علشان يسدد دينه تخيلي ..


***ام جروح ماااستوعبت الكلام لانه اكبر من ان الواحد يستوعبه.***.وش قلتي ؟؟دين ...


جروح ..شفتي عاد يمه ..وش اقول وش احكي ..ابوي يبيعني ..!!!


ام جروح شوي وتنهار..وصلت معاه المواصيل لهالدرجه ..طيب انتي وشلون عرفتي؟؟؟؟


جروح..من اللي مايتسمى ..بكل وقاحه وقلة ادب ..وكأنه يقول انك مثل اي بضاعه تباع وتشترى ..يعني افهميها مالك قدر عند اهلك ..


ام جروح..وشلون بيعرف قدرك وبيحترمك ,,اذا رحتي عنده مادام ذي اولها.....؟؟؟


جروح..يالله... عقلي بيطيرمن راسي وش السواة الحين ..ياربي وش اسوي وش الدبره يايمه ..؟؟؟


ام جروح ماتدري وش تقول..يدبرها اللي ماتنام عينه ..الكريم ..


جروح..طيب وش رايك اكلم عمي سلطان واقول له..!!


ام جروح..ياذا العم اللي ماتهنى ..كل ماغاب شوي رجع لنا بمشكله جديده..


جروح..مالنا الا الله ثم هو ..وش اسوي ؟؟


ام جروح..ومتى بتكلمينه..؟؟ابوك اربع وعشرين ساعه بيكون بالبيت ..واكيد ماراح يرضى يستقبله بالبيت..


جروح..اكيد بينام ..وبوقت نومه ادق عليه..


ام جروح..وان رفع السماعه وسمع الحكي ..وسوى لنا سالفه...!!!!!!


جروح..يسوي اللي يسوي ..ماعاد بقى شي اعظم من اللي سواه بي..


ام جروح..يابنيتي سوي اللي تبينه ....انا خلااااااااااااااااااااااااااص مخي انشل من كثر التفكير..!!!الحين عبدالاله ماراح..


جروح..مااادري عنه ..بعدماطلعني ابوي ماعاد ادري عنه..


ام جروح..طيب وش حسيتي به يوم دخلتي عليه؟؟؟


جروح..اكذب عليك يايمه ان قلت اني حسيت بشي ..ماحسيت الا بالخوف اني قدام رجال غريب ... بس ابدا ماحسيت اني زوجته..بالعكس الا كارهته مره ..وزاد كرهي وحقدي عليه بعد ماقال لي الكلام اللي ماينقال عن ابوي ..والله حسيت باستهتاره وانتقاصه لي ..شي بحياتي ماسمعت ولاشفت مثله ...


ام جروح ماعلقت على الموضوع..


بعد خمس دقايق دخل ابو جروح عليهم وبيده صينية العصير..وهو يناظر بجروح نظرة القهر


اقسم بالله لو انه ماحلف علي وقال ماالمسك كان مردغتك بالارض وخليتك تنسين اسمك ياقليلة الحيا..


ام جروح وصلت حدها وماقدرت تسكت ..اقول يامحمد طفح كيلي منك ومن تصرفاتك معانا ....انت ماتخاف ربك ..خاف الله فينا..انت ماتحس ولا ترحم ..ماتخاف الله يبلاك ويرجع مرضك ..


ابوجروح كان معصب من الاساس..هو كان ناوي على جروح ..لاكن كل غضبه وحقده حطه على ام جروح ..اولها عطاها كف بأقوى ماعنده لف منها وجهها ..طاحت منها على الارض وكمل عليها برجله رجف وضرب ..


جروح ومن الصدمه وقفت تناظر وهي تصرخ..حراااااااام عليك يالظالم حرااام


ماحست بنفسها الا وهي تدف ابوها بأقوى ماعندها وكأن كل القوى اجتمعت معها علشان امها ..


ام جروح من شدة الضرب ومن الصدمه اللي جتها غير الهموم اللي تكالبت عليها ..ماوعت بنفسها الا بغرفة العنايه المشدده وجنبها بنتها تبكي وتنادي عليها ..وبجنبها نوال تحاول تهديها ..وسلطان اللي كان واقف بعيد يتهدد ويتوعد ..:icon33:

.................................................................................................................

سلطان ..حسبي الله ونعم الوكيل عليه..وصلت فيه المواصيل يوصل الضعيفه للعنايه ..اقسم بالله ان سألوني الشرطه لاعلمهم باللي صاير بالتفصيل وخلهم يسوون اللازم ..


نوال ..استهد بالله ياسلطان ..انت عارف محمد اطول مننا نفس ..وترى اللي بيروح فيها جروح وامها ..فلا تتعجل وانا اختك ..


سلطان معصب واصله حده..يوم سكتنا ..وين صرنا عليه !!! ..البنت تملكت والام بالعنايه !!!..والله لو اننا مدخلينه السجن يوم يضرب بنته ذاك المره كان تعدل ..!!هذا ماينفع معاه الا الشده ..هو شافنا ساكتين عنه قال هذولا خايفين مني ..


نوال ماعاد عرفت تتكلم ..اقول هذا ام جروح احس انها وعت .

.دخلت عليها نوال اما سلطان فانسحب وطلع من الغرفه عند نواف ..
>>>>>>>>>>>>>>>>>>>>>>

نواف ..هااه بشر ياخال عساها صحت ..


سلطان وكأنه هدأ شوي .. ااااه وبس والله العظيم ان هالحرمه ماتستاهل اللي يجيها ..والله انه مايستاهلها..بس وش نقول ..؟؟


نواف ..القدر والنصيب ..


سلطان ..على قولتك ..امك قبل مااطلع من عندهم تقول ..انها شافتها بدت تصحصح الحمد لله


نواف.. الحمد لله هواللي جاها شوي ..


سلطان ..والله يوم اننا ننقلها قلت الحرمه ميته ..بس ربك اللي ستر ..


نواف ..انا ماسمعت التليفون يدق!!! وانا كل ذاك الوقت بالبيت..


سلطان ..لاهي دقت على جوالي ورديت عليها بسرعه ..والله يانواف اني انهبلت يوم سمعتها تقول الحق على امي ماتت..


نواف ..طار عقلها الضعيفه..



سلطان..الله يخلف عليها يوم ملكتها يكون اسوأ يوم في حياتها ..


نواف ماعلق لانه حس ان الوضع شوي حساس خصوصا من طرفه..


سلطان ..اقول وش رايك ننزل للبقاله احس اني عطشان وودي اشرب لي عصير ..


نواف مشينا ..

...........................................

في غرفة العنايه ..صحت ام جروح ودمعتها على عينها واللي تقطع منه قلب نوال وجروح..


جروح..الحمد لله على سلامتك يايمه ..ياليت اللي جاك كان فيني ...


نوال ..لا فيك ولا فيها ..


جروح..فيني ياعمه ولا في امي ..***وجلست تبكي لانها طول الوقت كانت كاتمه وماطلعت اللي بخاطرها ***


ضمتها نوال وهي تحاول تهديها ..


نوال ..جروح اذكري الله ولا تزودينها على امك ترا اللي فيها كافيها ..


جروح..انا دقيت على خوالي وهم جايين ان شاء الله اليوم ...خليهم يتفاهمون معاه ..لاني ماعاد اتحمل اخبي عنهم اكثر ..


نوال ..ليه ياجروح..؟؟؟الحين بيصير كل الحمل عليك والله انه راح يحرمك من امك .........هو من سنين
وهو حالف على امك انها ماتدخل اهلها في حياتها ..


جروح..محرجها هي مو انا ..ياعمتي نوال ..الى متى وانا صابره وساكته ؟؟..الى متى واحنا نقول بكره بكره ؟؟..خلاص ياعمتي لكل شي له حد على مايقولون ..!!!

نوال..والله انك صادقه ..


جروح..شوفي ياعمه ابوي الظالم وش مسوي بأمي الضعيفه..**وهي تأشر على وجهها ويدها اليسرى ..ورجلينها ***


نوال تأثرت من المنظر ..اعوذ بالله كل ذا !!!!طيب وش الداعي اللي خلاه يسوي كل ذا ..؟؟


تخيلي ياعمتي نوال ..وبعد ماتملكت على عبدالاله ..اكتشف ان زواجي تسديد دين !!!


تفاجات نوال من هالكلام لان ااخر شي تتخيله من اخوها ان توصل فيه المواصيل يبيع بنته!!!


نوال ..صدق والله ؟؟؟؟لا مااصدق ...مستحيل...!!!!


جروح..وش الداعي اني اكذب ياعمه..؟؟


نوال ..انا ماقلت يابنت اخوي انك تكذبين حاشاك والله ..بس هالشي ماينتصدق ..اعوذ بالله ولا في الافلام ؟؟


جروح..اصلا حياتنا مع ابوي صايره زي الفلم الله يخلف علينا !!!


دخلت الممرضه عليهم واخذت قياس الضغط والحراره من ام جروح وطلبت من جروح وعمتها يطلعون لان وقت الزياره انتهى ..


ام جروح كانت ساكته وماخذه دور المتفرج لان الصدمه والضربه منعتها من الكلام ..وعلى حسب كلام الدكتور اللي سألته جروح ......ان الحاله اللي فيها مؤقته وراح تزول بعد ايام ..


جروح ماقدرت تنام ذيك الليله من البكا والخوف ..كانت تبكي على الحال اللي هي وامها فيها ..غير كذا كانت خايفه ان ابوها يدخل عليها بأي لحظه ويسوي اللي سواه بأمها .. عمتها ماخلتها لحالها وباتت عندها ذيك الليله...


ابوجروح ومن بعد ماضرب ام جروح طلع من البيت وراح لبيته الثاني بدون ماتاخذه الرحمه او الشفقه ..كان قلبه قاسي مثل الحجر ..كله ظلم وطغيان وسيطره ...هذا غير ضعف الوازع الديني اللي يجي في المرتبه الاولى..


طبعا اخوال جروح اللي في الشرقيه ثارت ثورتهم من الوضع اللي كانت عليه اختهم وبنت اختهم حتى انهم توعدوا محمد وقالو انهم لازم يحطون للامر حد..لان اللي سواه فيهم اكبر من ان يسكت الواحد عنه..


الخبر وصل محمد واللي بدوره حجز على اقرب رحله لدبي وسافر بحجة انه بيغير جو وبياخذها فترة نقاهه..


طبعا ليلي زوجته مامشت عليها هذي الحركه لاكنها مشتها هالمره بدون اي سؤال ..لان زوجها مايهمها ...غير كذا طلبت منه الطلاق ..وان صح التعبير نقول انها اجبرته يطلقها ..وطردته من بيتها شر طرده.
من جهه ثانيه ...

طلعت ام جروح من العنايه وبقت بالغرفه اسبوع ..جا بعدها اخوانها واخذوها هي وبنتها للشرقيه حتى يحافظون ولو على جزء بسيط من كرامتهم الضايعه..

كانت جروح مبسوطه حيل لانها تشوف نفسية امها تعدلت بشكل ملحوظ...كانت تشعر بالامان لانها بين اهلها وسندها غير بعدها عن مصادر شقاها وحزنها ..

...........................................................................................
وبمكان ثاني..

نوال حكت لولدها وسلطان عن سالفة الدين اللي كان على محمد..وكانت ردة فعلهم قويه تجاه هالوضوع..لان المسأله تعدت انه كبير بالسن الى بيع كرامته لواحد مايستاهلها....



سلطان ..ايا الجبان ..يبيع بنته ويملكها على الرجال وينحاش ..


نواف ..انحاش ؟؟



سلطان ..اجل وش تفسر سفرته بهالوقت بعد ماخرب الدنيا ..


نوال ..واهل سلوى اللي قالبين عليه الدنيا؟؟؟



سلطان ..يالله ..الى متى واحنا بالمشاكل والله الواحد زهق من حياته..



نوال..اللي عرفته من جروح انها وامها راحوا للشرقيه ..


سلطان ..والله انا مااقدر اتصرف بأي شي ..محمد حطنا بموقف مع الناس لايحسد عليه ..حتى والله اني ناوي اضيفهم ببيتي واسوي اللازم بس مالي وجه..

نوال ..انت مالك دخل ياوخيي ورايتك بيضاء


نواف ..طيب خالتي ام جروح وش صار عليها ؟


نوال ..لا يقولون الحمد لله صحتها بالعلالي ..


سلطان ..وجروح ماعلمت الشرطه عن السبب!!


نوال ..لا ماعلمتهم..والله البنت فيها الخير اكثر من ابوها ...بصراحه التربيه لها دور ..



سلطان ...ماشاء الله خلق وفرق..يجي يشوف ويقارن ..بينها وبين بناته الثانيات اللي مافيهم خير ..


كان لهالسالفه اثر كبير في نفسية نواف اللي قرر منها ياخذ دور الفارس المنقذ..

...........................

بعد السالفه ذيك بثلاث ايام ..

كان سلطان يفطر مع اخته وولد اخته وهم يسولفون رن جواله فجأه..


قطع سلطان كلامه وهو يشوف الرقم !!

كان الرقم غريب عليه ..وماحصل انه شافه من قبل ..لاكنه فضل انه يشوف لمين عن الانتظار والتفكير؟؟؟


الو ..


الو السلام عليكم ..


وعليكم السلام من معاي؟؟


هلا سلطان وش اخبارك ..؟؟


سلطان كان مستغرب من الصوت...ولا رد..من معاي ..؟؟


اكيد ماراح تعرفني هذا اول مره اكلمك.. على الرغم اننا اهل ونسايب ..

من هالكلمه عرف سلطان من يكون ...علشان كذا قام من مكانه حتى ان نوال ونواف خافوا من المكالمه ..لان وجه سلطان تغير تغيير جذري ..

دخل سلطان المجلس وسكر عليه الباب ..


نعم وش تبي ؟؟البنت واخذتها بدون علمنا وبدون موافقتها ..واخر شي يصير تسديد دين ..انت ماتخاف الله..واحد كبر ابوها او جدها وياخذ بنت توها بعمر احفاده ..:angry2:


عبدالاله حب يعلق ..لاكن سلطان ماعطاه فرصه..


انت ماتخاف الله ... ..البنيه ضعيفه مالها حول ولا قوه ..استغليت دين ابوها علشان تاخذها وتلعب بها وترميها ..


عبدالاله هنا ثارت ثورته ..شف اقول لك انا مااحب اطول مع اجناس زيك ..

سلطان ..اجناس ..الله الله الله ..اذا احنا اجناس ماتجوز لك اجل انت وش تصير ..

عبدالاله ..يالله ..شف هي كلمه ورد غطاها ..ترا البنت طلقتها وورقتها بتوصلها ..

سلطان انصدم ..سكت وماعرف يعلق ..

عبدالاله ..البنت عندكم وانا في محلي ..خلاص اللي بيننا انتهى ..

سلطان مايدري يفرح على انها انعتقت منه او انه يزعل انه بينزل سمعتها بالارض من كلام الناس عنها ..

سلطان ..طيب ممكن اعرف وش السبب ..؟؟

عبدالاله ..نصيب ..

سلطان ..نصيب ..ليه وبنات الناس لعبه لك ..تتزوج وتطلق بيوم ..

عبدالاله ..الكلام وصلك وانا ماعندي كلام اكثر ..

سكر عبدالاله السماعه من دون حتى ماينتظر منه رد ..

سلطان ماوسعته الدنيا فرح لبنت اخوه ..دخل بسرعه على نوال ..

نوال ..نوال ..نوال

نوال جمد الدم بعروقها وتوقعت ان سلوى صار فيها شي ..وش فيك عسى ماشر ..سلوى فيها شي ..؟؟

سلطان ..لا وين انا ووين سلوى تعرفين اني مااخذ اخبارها الا منك ؟؟

نوال ..قلت يمكن هالرقم الغريب اللي جاك من احد اهلها .!!!!

سلطان ..وين نواف..؟؟

وش تبي بنواف ..علمني تراك اكلت قلبي ..بسرعه تراني بديت اتنافض ..

سلطان ..جروح ..

نوال ..وش فيها ..؟؟بعدين وش دخل نواف بها ؟؟؟

سلطان .وشلون وش دخله ...!!!!.بنزوجها له !!

نوال ..انت صاحي ..سلطان فهمني ..؟؟؟

سلطان ..والجهاز مني ولا ابي من ولدك يدفع ولا ريال ..؟؟

نوال ..لا انت اكيد فيوزك ضربت ..

سلطان ..لا والله الا فرحان ومتشقق ومستااااااااااااااااااااااااانس

نوال ..طيب اقعد الحين وفهمني حبه حبه ...!!

سلطان ..ابشري

وجلس يعلمها باللي صار ..

نوال ماعرفت تعبر عن فرحتها الا انها جلست تبكي ..

سلطان ..الحين دقي على سلوى وبلغيها عن كل شي ..وقولي لها اننا جايينهم خطاب..

نوال جلست تحمد ربها ان الله فرج لجروح وولدها فرج من دون مايعرفون به ..لاكنه الله سبحانه فارج كل هم وضيق ..

نواف لما دخل البيت كان جايب معها كيكه كبيره وبيده الثاني عصيرات من كل شكل ..

اول ماشافوها سلطان ونوال تعجبوا ..

نواف ..مرحبا ..

نوال ...مرحبتين ..وش هالدنيا كلها ..

نواف ..انسان مبسوط ماعرف يعبر عن اللي بداخله الا بهالكيكه !!

سلطان استغرب لان الخبريه مااحد يعرف بها الا هو وامه حتى امه ماوصلت له الخبر ..

نوال ..بسم الله من شوي كنت معنا ..بعدها اختفيت ..ورجعت محمل بهالكيكه ....وش السالفه ..؟؟

نواف ..وش سالفته ..؟؟الكيكه يبيلها مناسبه ..؟؟وشفيكم قلبتوا علي ..ماتبونهاعادي ارجعها وانتهى الموضوع ..؟؟

سلطان ..امش معاي ...

نواف ..على وين ..؟؟

سلطان ..ابيك بكلمة راس ..

نواف ..والكيكه ..؟؟

سلطان ..نواف ..عن الاستهبال وامش معاي ..

نواف ..سم

دخل نواف وسلطان المقلط وجلسوا يتكلمون بأمر جروح ..سلطان كان عنده احساس بان شي صاير وظنه ماخاب

والله ان قلبي دليلي ..بس ليه سويت كذا ..؟؟

يوم علمتني امي ماقدرت اصبر ..قلت يمكن يكون هذا لي ااخر امل ..

وكيف عرفت مكانه ..

نواف ..اللي يسأل مايضيع ..انا لي معارف بكل مكان ..وهم اللي دلوني عليه..

سلطان ..وكيف قابلته..

نواف ..لاتذكرني ..

سلطان ..ليه غلط عليك ..؟؟

نواف ..لو ماااني شاري جروح والله مااذل نفسي له ..عطاني من الكلام اللي يسم البدن ..بس تحملت وسكت علشان اوصل معاه لنتيجه..

سلطان انقهر من الكلام...وش تكلم عليك ..؟؟

نواف ماحب يتكلم.... كلام راح وبس ..وارجوك ياخالي سلطان لا تضغط علي اهم شي النتيجه ..

سلطان..كم اخذ منك ..

نواف ..فدا جروح..

سلطان ..يعني استغلك ..؟؟

نواف يحاول يتهرب من الجواب..اهم شي النتيجه!!

سلطان ..عنيد...ههههههههههههه يالله تستاهلها ..وترى جهازها علي ..وعرسي وعرسك بيوم واحد..

انحرج نواف من الكلام ..ونزل راسه وهو مبتسم

سلطان..ارفع راسك ..اشهد انك رجال ينشد الظهر بك ..

نواف ..الله يخليك ياخالي ..

سلطان ..اجل يله نروح لامك علشان تكلم سلوى وبنتها..

يله...

دخلوا الصاله ولقوا نوال تكلم سلوى ومنهمكه بالسالفه ..ضحكوا على حالها وجلسوا جنبها ينتظرونها تسكر..

لما سكرت ..سألها سلطان عن اللي صار ..

نوال .. ماتتصور وشلون كانت فرحتهم ..تخيلوا بالبدايه ماصدقوني حتى حلفت لهم ...قعدت سلوى المسكينه تبكي وتزغرط وتصرخ وتنادي بنتها ..والله اني سميت عليها ..

سلطان ..يحق لها واللي جاها شوي ..

نواف ..والبنت ..

نوال ...يووووووووووه ماتتصور كيف فرحت ...الحمد لله اللي فرج لها هم مايحتمل...

نواف انبسط من الكلام ..لاكنه انحرج يوم شاف الكل يطالعه وحب يصرف الموضوع...اقول كيكتي قطعوها ..!!

ضحك الكل وامضوا ليله سعيده لاتنسى ..حتى عبدالله شاركهم فرحتهم بجو عائلي يملئه الحب والموده...

..................................................................................................................................>>>>>>>>>> بالشرقيه وتحديدا الخبر

الف الف الف مبروك يابنيتي قلت الصبر زين ومن صبر ظفر ...يالله لك الحمد ...

جروح..الحمد لله يايمه احس نفسي مو مصدقه اللي صار ..كذا بلمحة بصر يتركني ..يمه احس اني احلم

ام جروح ..يابعد عمري يابنيتي ..

دخلت عليهم جدة جروح واللي كانت تتكي على العصا ..وتمشي حبه حبه

على البركه وانا امك ..تستاهلين كل خير ..

**قامت جروح وباست راس جدتها ..بعدها قربت لها الكرسي وساعدتها بالجلوس **

الجده ..الله يرضى عليك يابنتي ..ربيتي واحسنتي ياسلوى ..

**ابتسمت سلوى من كلام امها ..**

مشكوره يايمه هذي جروحه الغاليه..جروح حبيبتي روحي جيبي القهوه من تحت ونادي خالك سعد ..وخالك عمر تلقينهم بغرفهم

(((عمر وسعد اخوان سلوى الصغار ..عزابيه ....سعد يشتغل مدرس مرحلة متوسط انسان جنتل وذوق وحنون لابعد حد...وعمر يشتغل بتجارة العود انسان موهوب وذكي بس عيبه ان نومه ثقيل.. اكثر ما يميزهم برهم العظيم لابوهم وامهم ..واحترامهم لاخواتهم واخوانهم والكل يشهد لهم بكذا ..حتى ان الله بارك لهم في دنياهم وصار الخير يجيهم من كل مكان ...)))

راحت جروح لخالها سعد ولقته نايم ..حاولت تصحيه لاكن ماسمعها..

طلعت من الغرفه لاكنه ناداها قبل ماتطلع..

جروح تبين شي ..

جروح..معليش ياخالي ازعجتك ..بس جدتي وامي بيتقهوون بغرفتنا انا وامي لان جدتي فيها ....قالوا لي اقومكم انت وخالي عمر علشان تتقهون معاهم..

سعد ..خلاص انا جايكم الحين..

طلعت جروح وراحت لغرفة خالها عمر لاكن لقت غرفته مقفله..حاوله تطق الباب بكل الطرق لاكن وكالعاده بدون فايده ..

رجعت تبي تنزل للمطبخ لاكن خالها سعد ناداها ..

تعالي ياجروح ابيك شوي ..

راحت جروح له في غرفته ..

سعد .. اسمحي لي شوي جروحه... بادخل اغسل وجهي وطالع لك ..

**جلست جروح تتامل ترتيب غرفته وتنظيمه هذا غير الديكور والتناسق واللي ابرز الذوق وحسن الأختيار اللي اكتشفته في خالها**

سعد وهو يمسح وجهه..اشوفك تتأملين بالغرفه عجبتك..؟؟

جروح..ايه والله ياخالي ..ماشاء الله عليك مافيه جزء من الغرفه الا وابرزت فيه شي حلو وجميل ..

سعد ...لا مااقدر على الكلام الحلو ..ههههههههههه شكرا ياجروح بس يمكن تبالغين شوي هههههههههه

جروح..لا والله ياخال ماابالغ ..بصراحه غرفتك مرررررررررره حلوه ..

قام سعد وفتح الدرج المقابل وطلع منه ملف وكله اوراق ..طيب وبما انك عطيتيني رايك بغرفتي ابيك بعد تعطيني رايك بهذا ..

** مد لها الملف ..وجروح اخذته منه **

وش هذا يالخالي ..؟؟

سعد..افتحيه واقريه ..

فتحته جروح وقرت ورقه ورقه ..كانت متعجبه ومذهوله من اللي كان مكتوب فيها ..معقوله ..كل هذا طيب وشلون ؟؟؟

سعد..احسن من ديكور الغرفه او لا ..؟؟؟هههههههههههههه

جروح..خالي سعد انا موفاهمه شي ..

سعد ..كل شي واضح ياجروح ومايحتاج شرح..

جروح ..بس وشلون ومن وين ..؟؟


......................... وش تتوقعون يكون بهالاوراق ؟؟؟؟

طيب خمنوا شوي قبل ماتكملون


واذا مستعجلين ...


كملوا وفالكم طيب ههههههههههههههههههه

............................................عدنا.............................



سعد هههههههههههههههه ياحليلك ياجروح ..الموضوع ومافيه ان والدتك كان لها ارض كبيره بالخبر... شراها لها ابوي يوم كنا صغار ..كانت هذي الارض مع الاراضي اللي شراها لنا رخيييييييصه مره بذاك الوقت وموقعها حلو ومساحتها كبيره ...بما ان ابوي واللي هو جدك خبير بالاراضي والعقار حب انه ياخذها لنا واحد واحد..


وبعد مامرت الايام والشهور والسنين ..
ولما زاد العمران ومخططات الاراضي..

بحثت البلديه عن اصحاب الاراضي حتى لقتنا ..الاراضي الحين تساوي اضعاف اضعاف اضعاف سعرها ..انا واخوي وباقي اخواتي بعنا اراضينا قبل كم سنه واخذنا نصيبنا ..اما امك سلوى هي الوحيده اللي رفضت بيعتها وقالت لي اكتبها بأسمك من دون مايدري ابوك بالموضوع..

جروح ..لي انا ؟؟بس امي ماعطتني خبر ..؟؟

سعد ..هي طلبت مني اتكتم على الموضوع الين يجي اليوم المناسب اللي اعلمك فيه ..وانا احس ان اليوم انسب وافضل يوم اقدر اكلمك عنها ..

جروح..الارض انباعت الحين ..

سعد ..ههههههههه ايه ...والارقام اللي قريتيها من شوي هو سعرها ..لان البلديه اجبرتنا نبيعها لانها اعاقت المد السكاني بحكم مساحتها الكبيره....و بما ان امك موكلتني على امرها فانا تصرفت فيها بموجب التوكيل حتى من دون ماااخذ رايها..

جروح بدهشه ؟؟اربع ملايين وسبع مية الف ...؟؟

سعد .وكسور بعد هههههه.. حلال زلال لك ولحالك !!!

***جروح ماقدرت تصدق وتستوعب الخبر*** ..اربع ملايين لي...

سعد**يضحك على شكلها وهي مندهشه** ..ههههههههههههه وسبع مية الف ..بس ابيك توقعين على استلام المبلغ ..

جروح..وامي عندها خبر ..

سعد ..ايه وهي اللي بلغتني اعطيك اياها ..

جروح ..احس اني احلم ..هذا ثاني خبر اليوم يجيني ..وكل واحد اكبر واغرب من الثاني ..

سعد وهو يقرب لها الاوراق..الحمد لله ياجروح هذي نعمه من الله ..الحين انتي وقعي هنا **وأشر لها على المكان ** وخلينا ننزل تحت بيقولون تأخروا علينا ..

جروح ..ان شاء الله ..***وقعت جروح الاوراق وهي بين تصديق وتكذيب ..بين رغبه بالضحك ورغبه بالبكاء **

نزلت جروح وراحت للمطبخ تجيب القهوه وهي شوي وتطير

اما سعد..راح يقوم اخوه لان عنده مفتاح احتياط ..هم حاطينه لان نوم عمر ثقيل واحيانا تجي ظروف يحتاجونه فيه ...او احيانا يستدعي الوضع انهم يبون يتطمنون عليه بحكم الساعات الطويله اللي يقضيها بالنوم.

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

عمر ..عمر ..عمر ..يله قم الحين ...

يوووووووووووووووووه وش تبي انت ليه فاتح علي الباب ؟؟؟

اقول قم خلصنا امنا واختي سلوى ينتظرونا ..**ويرمي عليه مخده كبيره كانت بالارض**

لاحوووووووووووووووووووووووووول اقول انت شكلك رايق ..سعد اطلع وانا الحقك ..

لو بانتظرك والله ماتقوم ...

والله بأقوم والله انا احلف ..بس شوي اطلع وبألحقك ..

سعد..يعني طرده ..

عمر ...ايه طرده بس اطلع ...

طلع سعد وبعدها بشوي قام عمر واجتمع الكل في غرفة سلوى وبنتها وجلسوا يتقهوون ...

الف مبروك ياجروح .على انك انعتقتي وعلى .الارض اللي جابت لها سعر خيالي ..

الله يبارك فيك ياخالي والله الموضوعين فاجئوني ولا كنت بيوم احلم يصير لي كذا..

عمر ...احلى يالمليونيره ..والله ماحد قدك ههههههههههههههههه

جروح...هههههههههههههه والله احس كل شعر جسمي طلع ..احس اني احلم ..

ام جروح ...لا يايمه ماتحلمين ..جا الوقت اللي تستمتعين بحياتك وتودعين ايام الحرمان...

جدة جروح ..الله يهنينك ببركتهم يابنيتي ..بس انتبهي لهم ..ولا تصرفين اي قرش الا بالحلال ..

جروح ..اكيد ياجده ان شاء الله ..خالي عمر وخالي سعد اكيد ماراح يتركوني وبيساعدوني في استثمارها

سعد ..ياقويه ..استثمار مره وحده

ام جروح ..ههههههههههه وانتم تحسبون جروح سهله

عمر ...هههههههههههه اقول مالك الا العود تعالي معاي بس

سعد ..ماعليك منه شوفي اللي ودك فيه واحنا معاك ..

ام جروح ..ماتقصرون والله ...ماقلت لكم ان سلطان عم جروح واخته وولدها بيجون بكره ..

جروح انبسطت حيل لما سمعت بطاري اهلها وابتسمت ..شافها خالها عمر وعلق عليها

شف البنات ...؟؟؟شف وشلون البنت فرحت لما سمعت طاري الحبايب

**جروح استحت مره وماقدرت تقعد ..**

عمر ..ياهووووووووووه يالخجل ..

جدة جروح..اترك البنت بحالها لا تحرجها ..

سعد ...ههههههههههههههه ياحليلها جروح تستحي

ا جروح ..اكيد بتستحي مادام انكم استلمتوها ..المهم ..اقول لكم اهل جروح بيجون بكره يخطبون عاد ابيكم تستقبلونهم ..

عمر ..اكيد ان شاء الله ..انتي بتنادين اخواني الباقين سالم وسليمان ..

ا جروح ..انا دقيت عليهم وعطيتهم خبر وان شاء الله بيجون ..

الجده ...الله يوفقها ان شاء الله ويسعدها ..

ام جروح ..اللهم اامين ..

تمت مراسم الخطبه واتحدد يوم الملكه بعدها بأسبوع ..جروح ونواف كانوا في قمة سعادتهم ..طبعا العائله اخذتها فرصه يطلعون مع بعض لشاطي الشرقيه ويستمتعون بالجو الساحر ليلا ..كانت العايلتين فرحانه ...حتى انهم ماحسوا بمرور الاسبوع ...

طبعا جروح ونواف كانوا في عالمهم الثاني ..الكل منهم كانت الدنيا ماتوسعه فرح وسعاده ..الكل منهم ينتظر اليوم اللي يجتمعون فيه ببيت واحد..

حب صمد رغم كل الظروف ..حب جابه كل العقبات ..

الحب الصادق ..الحب العفيف ..

جا يوم الملكه..كان سلطان وعبدالله..وسعد وعمر الشهود على زواجها ..

دخل عمر عليها علشان تتجهز بسرعه ..وتدخل على نواف..

ام جروح ..استنى شوي البنت ماسكتها نفاظه من قالوا لها انك تملكتي عليه ههههههههههههههههههه

عمر ..هههههههههههههه ياحليلك ياجروح ..

جروح ..تكفى ياخالي لا تقول شي ..احس ان خط ميتين وعشرين شابك على ظهري

عمر وام جروح ..هههههههههههههههههههههههه

عمر ..وش رايك اقول له يدخل هو..؟؟

جروح ..لالا لايجي ..

عمر ..احلى يالدلع كل ذا ماتبين تتعبينه هههههههه

**دخلت الجده وبيدها كاس مويه**

بسم الله عليك يابنيتي الله يحرسك وش هالزين كله ..**ومدت لها كاس المويه **

جروح..كان ماتعبتي نفسك ياامي نوره

الجده..اشربي هذي قرايه علشان تهدين شوي ..كلام الله يطمن القلب ..

جروح ..ياحبي لك ياامي نوره **وقامت وحبت راسها**

الجده ..تحبين الكعبه ..يله اذكري الله وادخلي بشوي شوي والله بيحرسك ان شاء الله ..بس انتي اذكري الله وماعليك خوف ..

جروح حست انها هدت شوي علشان كذا قامت ومشت مع خالها للمجلس ..

عمانها وخوالها كانوا مجتمعين لاكنهم راحوا للمجلس الثاني مع المملك علشان يعطون العريسين الحريه والخصوصيه ..

فتح عمر الباب وتقدم ..كانت جروح وراه منزله راسها ..

اول مارفعت راسها ..كانت عيون نواف بعيونها ..انبهر بالقمر اللي داخل عليه ..

ياحبني لك دون كل المخاليق................ياللي تساوي كل شي بحياتي
لاشفت زولك ينجلي عني الضيق................وان غبت عن عيني تزيد عبراتي
دايم عيوني من فراقك غواريق ..................وطلعتك ترسم بسمتي في شفاتي
الحب مفتاح القفول المغاليق.......................وحبك دواي وفرحتي ياغناتي



وقفت ..ماعرفت وش تسوي ..حست ان النفاضه رجعت لها من جديد ..نزلت راسها وجلست عند اقرب كرسي ..

عمر ..ماودك تسلمين قبل ...؟؟؟

انحرجت جروح وماعرفت وش ترد عليه ....!!!

نواف ..خلها على راحتها انا جايها ..

اول ماسمعت جروح هالكلمه ..ارتعش كل جسمها ..وحست ان الدم جمد بعروقها ..

عمر ..اجل اترككم الحين ..الف مبروك لكم جميع والله يوفقكم ..

طلع عمر ..ونوااف قرب لها ..

حست جروح ان قلبها بيطلع من مكانه ..

نواف بكل هدوء وحنيه..مبروك علينا يالغاليه...

جروح ماعرفت ترد..حاولت ان الكلمات تطلع بس مارضت..

نواف ..خايفه؟؟؟

جروح...**رفعت راسها والتقت العينين مره ثانيه لاكن هالمره غير..هالمره شافت حلمها ..حبها ..شوقها ..حنينها ..شوق الليالي ..والايام ..

نواف حلم حياتها قدامها ..صار الحين زوجها ,,صار لها ولحالها ..ماهي مستوعبه الفرحه ..ماعرفت كيف تعبر ..الا بدمعه نزلت على خدها ..

نواف ..ليه الدموع ياجروح ..؟؟ان ماغالطني احساسي اقول ان هذي دموع الفرح ..

**نزلت جروح راسها وغمضت عينها شوي ..وتنهدت تنهيده قويه ..بعدها فتحت عينها **

نواف ..تبيني اطلع عنك ..؟؟اشوفك متوتره!!

ماردت عليه وكان بنفسها ودها تصرخ وتقول اني اموت بقربك ..واني اسعد انسانه بهالوجود ..لاكن لسانها خانها ..والكلمات بعدت عنها ..

**قام نواف ..وحب انه يطلع لان ماوده يحرجها اكثر ..هو يعرف بقرارة نفسه انها مبسوطه والدنيا مو واسعتها لاكنه بنفس الوقت لازم يحترم وضعها ..هو عارف انها ومن يومهم صغار أنها انسانه خجوله ..علشان كذا قام وراح للباب ..

الف مبروك ياجروح ..انا بأكلم خالتي سلوى اسألها عنك ..انتي انتبهي لنفسك والف مبروك مره ثانيه ..




**فتح نواف الباب وكان ناوي يطلع ..لاكنه سمع اندى واجمل واعذب صوت لقلبه,,,صوت حبه الاول والاخير يناديه**

نواف ...نواف ..لاتروح..

***التفت نواف لها بسرعه مو مستوعب ولا مصدق **

هلا يالغلا ..

**كانت جروح مبتسمه وواقفه ...مدت يدينها ** ماسلمت عليك ..؟؟

***نواف من فرحته ..اسرع لها ومسك يدينها وضمها ضمه قويه .. حتى هي ضمته ضم الشوق والحنين ..حتى انها بكت وبكا حتى نواف فرح وسعاده..التقت فيها الارواح قبل الاجساد.. ***..

ضويتي بخاطري شمعه..نسيت اني بوسط الناس.....................عيونك هلت الدمعه..دلايل رهفة الاحساس..
صمتك حديث عيونك..وهمس الحكي بشفاتك ......................شفت الحياء من دونك...مخلوق في همساتك..
عيني على ماتنظره..فيك اشغلتني نظرتك ............................شوقي ترى مااقدره ..ساقني في طاعتك..
وقت مضى لايهمك..انتهى مع ناسه ...............................واللي جذبني يمك ...يصعب علي قياسه..
تذكري بكره وبعد...للقاء وش ننتظر...............................ننتظر حلو الوعد...وبسعاده نستمر..


الف الف الف مبروك ياجروح..

جروح تمسح دموعها ... الله يبارك فيك يانواف ..

نواف ..اخيرا اجتمعنا ولا فيه احد بالدنيا يقدر يفرقنا الا الموت ..

جروح...بسم الله عليك يانواف ..

نواف..تخافين علي ؟؟؟

جروح نزلت راسها..اكيد اخاف عليك !!

بنفس الوقت كان عمر ينادي نواف من ورا الباب..

عمر ..يله يابو الشباب خالك سلطان وعبدالله ينتظرونك ..

نواف بصوت عالي ..ان شاء الله جاي ثواني ..

التفت على جروح..عاد ابيك تنتبهين لنفسك الحين انتي حلالي ولا ابي اي شي يجيك ..انا ماشي الليله للرياض مضطر لان اجازتي بتنتهي بكره ..قبل ما اروح بامر عليك اعطيك شريحة جوال وجهاز جوال جديد علشان نبقى متواصلين ..

جروح ..مشكور ماتقصر..

نواف ..العفو.. انتي تستاهلين الدنيا كلها ..

جروح ...مشكور يانواف يعطيك العافيه ..

نواف ..الله يعافيك ..انتبهي علي لاني ماتحمل هالكلام الحلو ...

**ضحكت جروح على كلامه** طيب ..انتبه لنفسك من الطريق..

نواف ..من عيوني ..يله استأذن الحين ..

طلع نواف وجروح ماطاحت عينها عنه كانت مبسوطه والبسمه مافارقتها ..

بعد ماطلع دخلت على امها وجدتها بشكل ثاني غير عن اللي تركتهم عليه ..ام جروح والجده لاحظوا هالشي وانبسطوا مره ان بنتهم سعيده مع اللي اختاره قلبها ..

ومثل ماوعد نواف ..مرعليها وعطاها الجهاز وفيها شريحة جوال ..بقوا من بعدها على اتصال بالليل وبالنهار ..اول مايصحى وقبل ماينام ..

حتى جروح تعودت عليه ..لانه وبأسلوبه قدر يقربها له ويكسر كل الحوجز اللي بينهم ..

جروح كانت تحس معاه بالامان ..كانت لما تسمع صوته تنسى الدنيا باللي فيها ..كانت تتنتظر اتصاله وكل مره يزيد شوقها عن اليوم اللي قبله

كان يستشيرها بكل شي ..من ديكور البيت ..للون غرفة النوم ..وكل صغيره وكبيره ببيتهم الصغير ..

هالشي رجع لجروح ثقتها بنفسها اللي فقدتهاعلى مر السنين .. حست فيه انها صارت انسانه لها اهميتها ولها كيانها ..

............................................................................................................................................



عسى الجزء اعجبكم ...


ان شاءالله يارب


تحياتي يالغاليات


اختكم


رجــــــــــــــــــــــــاوي:26:

ثانكيو للكل على السؤال

على فكره هذا اطول بارت انزله علشان عيون اللي طلبوني

تسلمين تسلمين وتسلمين على الجزء الحلو ياعسل بصراحة جداً روعه هالجزء
لكن بسأل هل القصة انتهت ولا باقي جزء
ومشكورة ماتقصرين الله يعطيك العافية ياقمر