الروتين ليش مهم وضروري

صباح الخير يا عالم حواء 🌸

قريت مدونة جديدة وطبعاً حبيت أشاركها معكم لعلنا نستفيد، لأن الروتين فعلاً مهم ويريح أشخاص كثير خصوصاً للي تحب تكون حياتها على نمط واحد ومعين مايتغير ✨
وفي الحقيقه أغلبنا يحس أنو الروتين ممل ولازم يتغير ، بس بعد ماقريت كلامها حسيت فيه من المنطقيه يمكن لأني من الناس اللي لها روتين معييييين ولو غيرته يتغير شي بسيط لايذكر فبحط لكم كلامها وقيسي على كيف روتينك هل منظم أو حابه تغيرينه ؟

- - -
سلام, تدوينه اليوم تحتاج مخ رايق و مستعد يستقبل معلومات صادمه, انصحكم تسو كوب قهوة او شاهي او اي مشروب يروقكم و تعالو ..
عقلي يتمرد على الركود. أعطني المشاكل ، أعطني العمل ، أعطني أكبر قدر من التشفير ، أو التحليل الأكثر تعقيدًا ، وأنا في جو مناسب لي. لكنني أمقت روتين الوجود الباهت. اتوق لتمجيد العقلي.
سير ارثر كونان دويل.

الاقتباس هذا من سير ارثر كونان دويل - مؤلف شخصية شيرلوك هولمز- كنت حرفيا اعيش به, اكره الروتين و التكرار - جاتني حاله اكتئاب لفتره لما انقبلت في الجامعه و اكتشفت ان كليتي تخصصاتها ادارة اعمال- انا من الاشخاص اللي تنطبق عليهم مقوله “يفكر خارج الصندوق” من كثر ما انا افكر خارج الصندوق ضيعت صندوقي من زمان، و بالنسبة للكثير من المبدعين الروتين نشوفه زي الشيطان, كيف تتوقعو مني اشتغل في مكان راكد و مافيه حركه و حياة و فعاليات و مغامرات, لكن لما بدأت ابحث و اقرأ زيادة عن الانتاجية و عن الناس الناجحين صدمني شي كبير صدمه ليومكم تعور قلبي لكنها في نفس الوقت تحفزني وهي اغلب المبدعين و الناجحين يعتمدو على الروتين في اكثر من ناحية من حياتهم و الكثير يعتبره السبب الاول في قدرتهم على انتاج اعمالها ,,

ها صحيتو من الصدمه؟ اشخاص زي ستيف جوبز (ابل) و مارك زكربيرغ (فيسبوك)مايا انجلو (شاعرة عظيمه) ليوناردو دافينشي (معروف طبعا) توماس اديسون (برضو اتوقع معروف) ، كلل هذول كان عندهم روتين يمشو عليه ستيف و مارك حرفيا يلبسو نفس الشي يوميا - ستيف يلبس بلوزة سوداء برقبة عالية و مارك يلبس تي شيرت رمادي و هودي و جينز- طب اولا, ايش تعريفك للروتين؟

الروتين بشكل مبسط هو مجموعه من الانشطه تسويها بشكل تلقائي زي مثلا:
- تقومي من النوم
- تروحي دورة المياه تتوضي و تفرشي اسنانك
- تصلي الفجر
- تفطري
- تستعدي للدوام
- تركبي السيارة و تروحي الدوام هذه الخطوات اسمها “روتين الصباح” كلنا عندنا اشياء نسويها يوميا او اسبوعيا بشكل تلقائي بدون ما نفكر فيها لان الروتين اذا صار بالتزام و لمدة معينه يتطور الى عادة ، تخيليه زي البوكيمون يبدأ روتين بعدين يتطور و يصير عادة .

الفرق بين العادة و الروتين ان الروتين بناءه اسهل و ممكن يكون مؤقت - روتيني قبل دوري السلة في الجامعه يختلف عن روتيني الطبيعي- و الروتين ممكن يتغير و يتطور و حتى ينحذف تماما, العادة اصعب في كسرها و بناءها .

طب ايش فائدة الروتين؟
الروتين هدفه الاساسي انه يساعدك مع ارهاق الخيارات ،المصطلح هذا جديد نسبيا يدل على الارهاق او التوتر اللي يصيب ادمغتنا لما نضطر اننا نسوي خيارات كثير, مثال على الخيارات اللي نتخذها يوميا ، اي بلوزة نلبس, اي بنطلون, البلوزة و البنطلون يمشو مع بعض ولا لا, نلبس شراب ولا لا, تحطي مكياج ولا لا, شعرك ايش تسوي فيه,ترتبي سريرك ولا لا, تفطري بانكيك ولا ساندوتش,اي شوز تلبسي, تسوي قهوة ولا ولا, تجلسي مع اهلك ولا لحالك, تشتغلي على المشروع ولا البحث, …. و القائمه تطول .

هذي بس الخيارات اللي فكرت فيها تكون قبل الظهر, تخيلو كم خيار و قرار صغير زي كذا تاخذي انتي في يومك بالرغم من انها خيارات تبدو تافهة الان انها تؤثر على دماغنا و تستنزف بعض قدرته، عشان كذا مارك و ستيف اتخذوا قرار اللبس عشان يركزو كل طاقة دماغهم للقرارات الكبيرة اللي تهم اشخاص الشركات الكبيرة ، طيب انا كيف بيفيدني الروتين؟

فائدة الروتين؟
زي اي انسان اكيد انتي طالبة او موظفة أو بالبيت و في يومك مهام حابة تنجزيها على اكمل وجه, اذا افترضنا ان في اليوم الواحد احنا نتخذ 100 قرار صغير, كل قرار نفكر فيه لمده 45 ثانية, هذي 4500 ثانية تساوي تقريبا 75 دقيقة, يعني ساعه و ربع من يومك تروح في القرارات الصغيرة هذي, الروتين ينظم لك الخيارات الصغيرة هذي و يخلي تنفيذها اسرع ، كيف ؟ مثال :

سارة:
- تقوم الصباح (تفكر اذا بترتب سريرها قبل ولا بعد ما تلبس, ما ترتبه)
- تروح الحمام ( تفرش اسنانها و تتوضى, تفكر ايش تستخدم من الكريمات لبشرتها)
- تلبس ملابسها و تحط ميكب(بعد ما تقلب الدولاب فوق تحت و تقرر ايش تلبس و تجلس عشرة دقايق في رسمه الايلاينر)
- ترتب سريرها سريع سريع
- تنزل تفطر ( تحوس عبال ما تقرر ايش تاكل و تسويه و تاكل)
- تخطط ليومها ( ما عندها وقت بتخطط بعدين)
- تروح الدوام

نورا:
- تقوم الصباح (ترتب سريرها)
- تروح الحمام (تسوي اللي هي متعودة عليه, تفرش ,تتوضى)
- تلبس ملابسها و تحط ميكب (اللي مطلعتها من الليل)
- تنزل تفطر (مجهزة نصة من الليل بس تحميه و تسوي الباقي و تفطر)
- تخطط ليومها ( تكتب اهم المهام)
- تروح الدوام

ايش الفرق بين نورا و سارة؟
نورا عارفة ايش مطلوب منها و ايش تحتاج (مجهزة اشياء من الليل) ، اما سارة الله يستر عليها ، و لكم ان تتخيلو كيف باقي اليوم ماشي مع نورا مقارنه بسارة ، الروتين يعطي حياتك شكل هيكلي بحيث مهما عيدتي عندك ضمان انك بتكوني منجزة و اهدافك بتصير، في يوتيوبر بدأت اتابعها قالت جمله و حسيت انها كبت سطل موية باردة على راسي لما سمعتها “عشان توصلي للمكان اللي تبغيه في حياتك لا تحطي اهداف, حطي خطط و روتين لان هذي الاشياء اللي بتوصلك لاهدافك في النهاية”

لما تحطي هدف بدون اي خطط انتي زي اللي يقول “ راس السنه 2021 في نيويورك” بس كذا بدون اي خطه او بحث اما الشخص اللي يقول “ بشتغل اوفر تايم و ببدأ ادخر عشرة بالمئة من دخلي عشان تكون عندي فلوس في حاله قدرت على راس السنه اروح نيويورك اكون مستعد” .

تجربتي الشخصية مع الروتين ، بعطيكم تجربتي مع الروتين بعدها بعطيكم نصائح ان شاء الله انها مضمونه عشان تنجحو في روتينكم . لي عدة تجارب مع الروتين و ضروري اذكرها هي تجربتي مع روتين العناية بالبشرة
طبعا بشرتي دمرانه و حالتها حالة, و قررت انه بلغ السيل الزبى -مدري هي كذا ولا لا المهم- فتحت اي ايرب -كلنا نناديه اي هيرب بس مافي مشاكل- و طلبت منتجات و وصلتني منتجاتي الحبيبة رسمت على مرايتي جدول و سميته “skin care“ و قررت كل يوم التزم فيه بروتيني للعناية بشطب على مربع و نشوف وين اوصل، استمريت بروتيني لمدة شهر كامل! و هذه خطوة عظيمه -اي احد يعرفني يعرف اني ملولة جدا احيانا- و النتيجة بشرتي تحسنت بشكل ملحوظ جدا, حتى الايام اللي اكسل فيها كنت اضغط على نفسي و اسوي الروتين. و من يومها و انا احاول ابني لنفسي روتين في بعض النواحي في حياتي.

عندما يكون لديك هيكلة و روتين، فأنت تدخل نوعًا ما في روتين لتنفيذ فقط ما هو مهم. ثم تقضي الكثير من الوقت في التفكير في الأشياء التي تستطيع عملها بشكل افضل , نيك سبان .
طب كيف ابني روتين ؟
هاتي ورقة و قلم و سجلي معايا يا ست الكل ،شوفي انتي ايش تحتاجي في حياتك, ما ينفع تبني بشكل عشوائي - بشرتك و شعرك يحتاجو عناية, تبغي وزنك ينزل, تعدلي نظام اكلك, الخ ، بعد ما حددتي احتياجاتك شوفي كل احتياج كيف ممكن تبني حوله روتين ، الشعر و البشرة تجيبي منتجات تناسبك و تعالج مشاكلك بعد البحث و مراجعه المختصين.
تخيلي يومك و كيف ممكن تدخلي الروتين الجديد هذا و متى ؟ ابدئي بتنفيذ الروتين هذا و حاولي قدر المستطاع انك مهما كسلتي ما تسحبي على يوم اذا تبغي تبني عادة جديدة من خلال الروتين لا تبني اكثر من عادة او روتين في وقت واحد, مخك ما بيستحمل و بيفصل. اصبري عبال ما تشوفي النتائج طب ما عندي مشاكل بس ابغى اسوي روتين احسه كول ؟ولا تزعلي سوي روتين في انواع كثيرة من الروتين مثلا :
-روتين عناية
-رويتن صباح او مساء
-روتين بعد الدوام
-روتين بعد النادي
-روتين الويكند (يوم اعادة ضبط)
-روتين السبت قبل الدوام
طبي و تخيري بين كل هذول .

نصائح عامه للمحافظة على الروتين :
1- لا تعطي نفسك الخيار, احنا كبشر اذا قدامنا خيارين بنروح للاسهل تسعين بالمية من الوقت
2- قللي من الاحتكاكات - الاشياء اللي ممكن تخليك تسحبي- قدر المستطاع لو ودك تبأي تتمرني حطي ملابس التمرين قدامك اول ما تصحي البسيها او نامي بملابس التمرين و جهزي الاثقال و كل شي بتحتاجيه
3- اعطي نفسك مجال بسيط - اذا مرضتي اعطي نفسك يوم راحه مافي مشكله, لكن لاتسحبي اكثر من يومين ورا بعض
4- خلي قدامك جدول و كل يوم تنفذي فيه الروتين حطي علامه, هذي تحفيز ممتاز

* تذكري وين التزامك بالروتين بيوصلك في النهاية ان شاء الله💜
* تذكرو ان روما ما تم بنائها في يوم 👍
منقول aive_blog@