الزلابيه اولقمة القاضي

بنات هقولكو علي طريقه رووووووعه للقمة القاضي .للامانه اناقريتها في منتدي تاني .دي اول مره اعملها ودورت علي النت علي الطريقه لقيت كذا مقادير بس اخترت دي وحسيتها سهله وقولت كدا كدا هي هتبوظ مني مستحيل اظبطها وقولت هعملها في الخباثه عشان لوباظت اداري الفضيحه من ورا العيال احسن يمسكوها عليا.بس الحمدلله طلعت خطييييره ومقرمشه .المقادير :٢كوب دقيق-معلقة اكل خميره فوريه-٢ملعقة اكل ممسوحه نشا-معلقه اكل سكر-٣معالق اكل زيت-كوب ونص مايه.اخلطي كل المقادير مع بعض وقلبيهم كويس جدا بالمضرب السلك اوشوكه لحد ميبقاش فيها اي تكتلات هي بتبقي طريه مش زي عجينة البيتزا بتبقي طريه وبتمط وبعدكدا غطيها وسيبيها في مكان دافي ساعه بالظبط وخلال الساعه دي اعملي الشربات اوالقطر وسيبيه يبرد وطبعاً كلكوعارفين الشربات بيتعمل ازاي.بعدالساعه هتلاقيها خمرت وعليت قلبيها كويس بالشوكه عشان تهبط وسيبيها تاني ٢٠دقيقه بالظبط وبعدين قلبيها وسخني زيت للقلي .في ناس بتعملها بمعلقه بس اناعن نفسي حطيتها في كيس تلاجه نضيف وقطعت طرفه بالمقص يعني يبقي زي فكرة قرطاس التزيين والزيت يسخن كويس وونزلت دواير صغيره من الكيس في الزيت وهدي النارعليها بتستوي كويس من جوه وتبقي ذهبيه ومقرمشه من بره وتطلعيها من الزيت علي الشربات علطووول بلاش مناديل والكلام دا واقلبها في الشربات واسيبها دقيقه وطلعتها في مصفاه عشان الشربات الزياده ينزل واكل ولادك احلي لقمة القاضي من ايديكي.بجداي حاجه بعملها في البيت وتطلع حلوه بفرح اوي وعيالي وجوزي بياكلوها احلي من حاجة بره.انامصوراها بس مش عارفه الصوربتنزل ازاي.ولوعندكواي استفسارعن الاكل المصري انافي الخدمه انا الحمدلله بطبخ كويس .