الشاي الأخضر والحقائق عنه للنحافه والرشاقه

السلام عليكم يا حلوات

الشاي الأخضر شاغل بال كثير مننا و سمعت زيكم انه ينحف


بس يا بنات ترى في معلومات غلط عن الشاي الأخضر نسويها و حنا مو حاسين

اولا لا تثقلينه لين يصير لونه اخضر

لازم يكون خفييييييف يعني تصبين عليه المويه المغليه لمدة ربع دقيقه و تصفينه و تصبين مويه جديده ربع دقيقه و تصفين و تصبين و تصفين

يعني بس 3 مرات وكبي الكميه لأنو بعد كذا يتأكسد و يصير يضر ما ينفع

و ترى الشاي الاحمر نفس الفكره

التلقيمه اللي نسوي ((انا اموت فيه)) مو كويس

الطريقه الصح طريقة البريطانيين

احمر فاتح وشفاف



ثانيا:

ما في انواع للشاي الاخضر بالشكل اللي تتكلمون عنه
يعني كلهم يحتوون نفس الفايده

لكن درجات الجوده تختلف عند الصينيين حسب التعتيق ((وراح اعلمكم كيفية التعتيق))

و طريقة القطف

اغلى الأنواع تقطفها القرود و لا تلمسها يد بشر

و عندهم انواع مخلوط معها مساحيق عشبيه و بعرصي و شغلات حنا نقرف منها

يعني لو جبتي نعناع ورق كبير و غض ونعناع صغير و شويه ناشف ... يفرق بالمفعول؟؟؟ تقدر نقول هذا نعناع والثاني كوسا؟؟؟؟





ثالثا: كيفية التعتيق اللي تخلي نكهة الشاي تزين و ترفع سعر الكيلو حتى 5000 دولار بامريكا و الصين و اوروبا

جيبي شاي اخضر مجفف عادي

حطيه بعلبه المنيوم ((تنكه عاديه نفس حقت شاي الربيع))

و حطيه بدولاب والا مستودع .. المهم ظلام و جفاف


من تجربتي في محل صيني :
تعتيق من سنه الى 3 سنين يعني مو ذاك الزود بالنكهه .. شاي اخضر عادي

تعتيق من 4-6 سنين .. فيه نكهه كأنه مدخن باخشاب معطره و ريحته حلوه بس النكهه خفيفه حقت الأخشاب

تعتيق من 7-12 سنه يجنن بس ما رضت تبيعني لأن عندها الكميه محجوزه ,,بالطلب و كنت طيارتنا قبل لا يجي دوري باللسته حقتها

نكهه قويه و رائعه ((انا نفسي شينه و اكره النكهات العطريه زي البابونج و الزهورات))

و بنفس الوقت تتركز الفائده و تصير المواد المضاده للأكسده فعاله اكثر


طبعا اللي قالت لي عالتعتيق وحده صينيه و زوجها ... مسلمين و استانسوا علي يوم عرفوا اني سعوديه ((ودهم يحجون مساكين بس يحسون ان شي عظيم و يبون يتهيأون نفسيا))

عاد علمتني شلون يعتقونه و يبيعونه في المزارع و يوصل سعره بعد التعليب و الحركات حتى 5000 دولار للكيلو
((ابو 5000 ما تلمسه يد بشر يعني قرود يقطفونه و المكاين تنظفه يعني مو تجيني وحده تبيعه على البنات على ابو انه شاي اخضر نخب اول))



وبس

هذي معلوماتي

و انا خالتي اسم الله عليها زاد وزنها مع السفر 4 كيلو بس ما بين عليها و نزلتهم بسرررررررررعه مع تخفيف عادي
لأنها مدرسه والمدرسات يموتون على العزايم و الفطور الجماعي

المهم السبب ان ترمس الشاي الأخضر بالزنجبيل و النعناع ما يفارقها

تلاقينها تدور و بيدها بياله و ترمس و جواااال

و ماشاء الله ولا نقطة ترهل ولا نص بطن طالع لها

ماما انحف منها ب 6 كيلو و كأنها جيلو من الترهل و خالتي مشدوده الله يحفظها



اتمنى لكم الفايده و الصحه و الرشاقه

اللي يعجبها موضوعي تدعي لي في قلبها ان الله يحقق اللي في بالي