الضيوف المفاجئين .. كيف اضيفهم فجأة من غير استعدار ؟

السلام عليكم ورحمة الله وبركاته ...

خواتي الغاليان كلنا نمر بمشكلة الضيوف المفاجئين ..

بصراحه ابداا ما احب الحركة هذي .. خصوصا اللي يزورونك اول مرة ..

مو حلوة تحطين قدامهم بس شاي وقهوة لازم نقدم لهم شيء معه يا حلو يامالح ...

قبل ايام دقوا علي ناس اول مرة اشوفهم في حياتي .. واول مرة يزوروني ..

من باب الواجب انهم يخبروني قبل .. المهم اتصلوا ثلاث الظهر وقالوا بعد صلاة العصر نوصل ؟؟

ما لحقت اسوي شيء .. غير قدمت عصير كوكتيل المراعي ( الفشلة الاولى )

وسويت كيكة كاكاو ما لحقت تبرد وساحت الكريمة كلها تحت على الصحن .. ( الفشلة الثانية ) ..

وآخر الشهر والميزانية محدودة .. حلوها لي يا خبيرات ؟

وولدي صغير عمره شهرين في حضن ابوووه يصرخ يبغي يرضع وانا اسوي كيك ..


المهم ..

الحين انا فكرت اسوي شوية حركات وافرزها ..

بس عمري ما جربت افرز كيك .. مدري يصير ولا لا ؟؟

مفكرة اسوي كب كيك واغلف كل حبة بالنايلون واحطهم كلهم بعلبة ..وفي الفريزر ووقت الزيارة يدوب شوية تسخين بالمكرويف
(( يصير ولا لا ؟؟ ابغي تجاربكم ))

الشيء الثاني ..

ودري اسوي بيتزا + فطاير ..وعلى الفريزر وعند التقديم تسخين فقط .. (( كيف افرزها ؟ بدون طبخ ولا نص طبخ ولا كيف ؟؟؟ ))

وبالنسبة للمقالي مااحبها .. لأنه تترس البيت روايح ..

ابغي شيء مافي دخان ولا روايح ويشرف ..

ابغي مساعدتكم .. ولو في فكرة حلى كاسات سريع جدا .. ما تقصروون ..

وأشكركم جميعا ..