العابد والشيطان

السلام عليكم ورحمة الله وبركاته

كيف الحال وش اخباركم والله ماتتصورون وش كثر مشتاقه لكم بس والله عندي ظروف ومااقدر ادخل الا قليل يالله اتصفح خمس دقايق واطلع وادعو لي ان الله يوفقني ويعيني

المهم يااخواتي عندي لكم قصه يمكن من شهر تقريبا او اكثر وانا ابي اكتبها بس سبحان الله ماحصلت لي الفرصه اني اكتبها كل ماجيت اكتبها وافتح الصفحه الا ويجي عندي شغل واروح اقضيه ويروح علي الوقت (داريه انكم بتقولون اخلصي علينا بس تعرفوني لازم اقص لكم قصة حياتي قبل اي موضوع)
المهم نرجع لموضوعنا وهو القصه
والله هذي القصه حلوه واعجبتني مدري اذا كنتم سمعتوا فيها من قبل ولا اول مره

اكييييييد انكم عصبتوا الحين

خلاص خلاص هدوا اعصابكم بقول لكم القصه
بس فيه شي بقوله قبل ياليت تقطعون الاتصال وتقرونها زين لانها بصراحه فيها من العبر الشي الكثير

القصه هي

كان ياما كان فيه ناس كانوا يعبدون شجره ويتقربون لها وكان في القريه رجل عابد ويعبد الله وضاق صدره يوم شاف الناس يعبدون الشجره من دون الله فقرر انه يروح ويقطع الشجره حتى ينهى عن المنكر
واخذ العابد فاسه وراح متجه للشجره
ولكن وهو في الطريق قابله الشيطان وحاول يمنعه من قطع الشجره ولكن العابد اصر على قطعها فصارت معركه بين العابد والشيطان وانتهت بأستسلام الشيطان للعابد وقال الشيطان خلاص رح اقطع الشجره
لكن العابد كان تعبان من بعد ما تصارع هو والشيطان فقال خلاص بأجل قطع الشجره بكره اصير انشط واقوى
وفعلا اخذ العابد فأسه مع صباح اليوم الثاني ولكن وهو في الطريق قابله الشيطان مره ثانيه وصار معه نفس ماصار معه في المره الاولى وانتصر العابد وقرر انه يأجل قطع الشجره لصباح اليوم الثاني عشان يصير انشط واقوى
وجا صباح اليوم الثاني واخذ العابد فأسه واتجه الى الشجره ولكن هالمره قابله الشيطان لكن بأسلوب ثاني
قال الشيطان للعابد : الحين انت وش تستفيد من قطع الشجره ؟
قال العابد : ابي انهى عن منكر وعشان الناس تعبد الله وتتقرب له وماتعبد الشجره
قال الشيطان : لكن انت تعبد الله وش عليك منهم واذا قطعت الشجره بتخسر صداقة الناس لك وحبهم وبيصيرون يكرهونك لانك قطعت الشجره
وانا عندي لك حل اترك الشجره واترك الناس في حالهم وانت اعبد الله وانا بعطيك كل شهر دينارين تلقاهم تحت فراشك اذا انت ماقطعت الشجره
فكر العابد وفكر
وفي الاخير قرر انه يسوي مثل ماقال له الشيطان وترك الشجره وراح للبيت
ولقى تحت فراشه دينارين وفرح بهم
واستمر على هذي الحال ستة شهور
ولكن بعد ستة شهور قام ومالقى تحت فراشه شي وزعل العابد وأخذ فأسه واتجه للشجره يبي يقطعها لان الشيطان اخلف وعده
وهو في طريقه قابله الشيطان ومنعه من قطع الشجره ولكن العابد اصر على قطعها فصارت معركه بينهم لكن هالمره انتصر الشيطان فيها واستسلم العابد
واستغرب العابد من انتصار الشيطان عليه وهو كان في كل مره ينتصر عليه وقال للشيطان وشلون هالمره انتصرت علي ؟؟
قال الشيطان لانك كنت اول تتضارب معي من أجل الله وكان الله ينصرك علي
ولكن هالمره تضاربنا من اجل الدنانير فأنتصرت عليك
وفعلا( ان تنصروا الله ينصركم )

وخلصت القصه ان شاء الله تكون اعجبتكم :27:
والسلام عليكم