هذا الموضوع يعتمد بالدرجة الاولى عليكن انتوا العضوات
كلكم بدون استثنااااء

انتوا من تثرون وتضيفوا للموضوع من نير افكاركم وعقولكم
فلا تحرمونا من ردودكم

يعني الاخت ما راح تزعل لما امها تدلل ولد اختها او تمدحه اكثر من عيالها الا لما تكون هي عانت من التفرقة بينها وبين اختها من الصغر فتربط هذا بهذا وتحس ان امها ما تحبها ولا تحب ذريتها مثل اختها يعني البداية من الطفولة .. والا انتي ايش رايك ؟؟

^

هو صحيح ممكن يكون من الصغر عانت من التفرقه وتزيد حالتها لما تشوف
عيال اختها يتدللون اكثر من عيالهها 

بس برضو انا اعرف بنات من جماعتي واعرفهم زين م كان فيه تفرقه بينهم وﻻ شي
ووحده من البنات تقول لامها ليش تدللين عيالها اكثر شوفي عيالي وش حﻻتهم هاديين اكثر منها 

صراحه وقتها انا ﻻ تععليق اككيد ان الام م كانت منتبهه لنفسها 
واحيانا الطفل يجذبك بكلامه وجرأته اكثر من الاخر ف تلعبه اكثر وتسولف معه 
بس الحب اكييد يكون لهم كلهم ..بس هي تشوف ان امها تحب ولد اختها اكثر من ولدها 

ربي يسعدك يا اهات موضوع ممميز والاميز تركتيه مفتوح للنقاش ونستفيد من بقية الاراء

فعلا الغيرة ترجع للاهل هم الاساس بزرعها او تفاديها
اغلبنا عاش تجارب وبإذن الله نقدر نتجاوزها في تربية اطفالنا وانا معاكم ان التربيه صعبه وتعامل بعض الاطفال يصعبها اكثر لكن مهما كان حنان الام وعطفها والاهم وعيها وثقافتها من هالجانب تسهل كثير

بإذن الله إذا ربي رزقني بعد فترة باخ او اخت لبنتي ما افرق بينهم ف كل الجوانب

بقولك مثال ع الغيرة وزرعها
وهالمثال مو من بعيد لاخوي

اخوي هذا تخرج بنسبه نازله من الثانويه
واهلي متعودين ع النسب العاليه
فلما شاف ابوي نسبته هاوشة وزعل عليه
واحرمة من السيارة اللي كان واعدة فيها إذا تخرج
حتى سيارته القديمة سحبها منه قال انا السبب اللي اعطيتك ودللتك لو كنت قاسي ما طلعت بهالنسبه
ولا حظي ع كلمة لو كنت
طيب ليه اعطيته من البدايه !!
ليه ماوقفت معة !!
ليه ماشجعته وحرصته !!
اهملته وف الاخير توجهت للعقاب !!
كنت انقهر لما اشوفة ينتظر فلان وعلان لياخذوة وسيارات ابوة موقوفة ويقدر يجيب دبلها
لهني وانا ساكته لكن ف موقف ثاني تدخلت وغيرت رايه
عندي اخ صغير ما انجب الا بعد سنواااات طويله
مدلل كلمته ماتصير ثنتين
دمعته ياويل وياسواد ليل اللي ينزلها
وهو ابو 3 سنوات
ف يوم قال بابا إذا تبرت بستلي سياله زديدة حلللوة وبتتب عليها السيح عزوزي وبفحد فيها وبفحد >>هههه كتبت بحروف نطقة
وابوي يضحك بكل روقان ويقول ابشر اكيد
واخوي الكبير جالس
قال لا !!
بتشري له سيارة وبيفحط ويبشر
وانا اقول رجع لي القديمة ورافض
قال إذا مت خذ ورثك واشتر بدل الوحدة عشر !!!
رد عليه قال بعد عمر طويل لكن خذها معاك إذا ماتهنينا فيها وانت عايش مو بحاجتها وانت ميت
والا اقولك وفرها لعزوزي هو يستاهل
!!!!!!!!!!!!
واحد عمرة 19 سنه يقارن بواحد 3 سنوات تخيلي
والمشكله ان ابوي مو كبير ف السن لنقول تفكيرة قديم وتعامل كبار السن كذا لا عمرة 48 سنه واساسا هذاك مجهوده هذا اللي قدر عليه نسبه الذكاء تختلف بين الابناء مو معقول الجميع ع نفس الدرجة!


ف الاول والاخير وخلاصة كلامي الغيرة شئ فطري
لكن المقارنه والكرة والعداوة مو فطريه
هذي زراعة من الاب او الام
وهذي اللي بإذن الله كلنا نتفاداها ..

يا سبحان الله كل اللي احبهن في المنتدى متحابات ربي يظلنا بظله يوم لا ظل الا ظله
و كلنا نتحمس لنفس المواضيع

غاليتي آهات رحلة و لا يهونوا الباقيات

فعلا و الله التربية اصعب مما كنت أتصور

زمان كنت اشوف اخطاء الأهل في التعامل مع اولادهم و استغرب بس لما جربت عرفت ان التربية صعبة و عيال هالزمن صعبين فنضطر احيانا نسوي تنازلات مو مقتنعين بها بس إنقاذا لموقف خصوصا لما نستنفذ طاقتنا و نتعب عالااااااخر بس الأكيد بإذن الله ما فيه تنازلات في المبادىء العامة و أسس التربية الحقة
مثلا احيانا أرضخ لولدي و اخليه يعمل شيء مو مقتنعة به و من ذلك مثلا انو للان مو مقتنع بفكرة الحمام أكرمكم الله مع انه يفهم و يعبر عن نفسه و حتى الغسل أغسل له في الحمام أكرمكم الله بس للأسف يروح يتخبى عني حتى يسوي كل شيء في البامبرز أكرمكم الله بصراحة أزعل بس احاول ما اعصب كثير و لو تعرفوني راح تعرفوا انه جهاد كبير ههههه
و الأمثلة غيرها كبيرة عن التنازلات بس الأكيد بإذن الله و معونته أرسخ فيه انه مثله مثل اخته في الحقوق و الواجبات و المشاعر و المسؤولية و حتى صرت اطلب من ابوه يطلع اخته برة و يخليه معي لما احضر العشاء مثلا و هو يروح البقالة يجيب شيء او حتى مجرد يتمشى شوي و يرجع لانه من قبل كان هو اللي يطلع معاه

انا بصراحة من أشد أعداء العنصرية أيا كان شكلها في اللون او العرق او الجنسية او الجنس و احارب النظرة الدونية و التعامل المختلف مع ذوي الاحتياجات الخاصة او المرضى او الفقراء ......و احب اولادي يطلعوا مثلي في النقطة ذي بإذن الله و طبعا عندي عيوب اتمنى اولادي ما يأخذوها مني ياااااااا رب
يا ريت ترفعوا الموضوع بافكاركم التربوية حتى نثري الموضوع و نفيد و نستفيد بالأمثلة الحية لأنو بصراحة اشوف ان الغيرة سبب كبير لقلة الثقة بالنفس و الشعور بالنقص و بالتالي فشل على الصعيد النفسي و الاجتماعي ممكن مع الوقت يتحول الى فشل اخر

انا اشوف لو الام صاحبت اولادها بتنحل كثير من المشاكل 
لان الطفل يتخيل امور و اشياء غير صحيحة 
ف لو الام صادقت اولادها فاكيد بتعرف وش يدور في راسه 
واكبر مثال انا : 
امي ولدت وانا عمري في13او حولها
فخرجتنا برات الغرفة وهي نفاس
و طبعا انا قلت اكيد انحرق كرتنا 🌚
ف رحت اقول لاخواني اللي حولي شوفوا امي طردتنا عشان م تحبنا 🐇
و الواقع اني انا واخواني ازعجناها وهي كانت تبي تنوم النونو هههههه 
فتخيلت انها كرهتنا عشان المولود الجديد 
اللي حصل بعد فترة كانت تغسل شعري 😝🌚
و سالتها ليش كذا يا امي نسيتينا 😐
و بررت لي الموقف وفهمت ونمت وانا مرتاحه 😂
بعد ما كنت احترق بنار الغيرة والكرة

الخلاصة الام المهمله والاب المهمل 
والاعتماد على المربية من اهم مشاكل التربية الخاطئة