اسعد الله صباحكم في هذا اليوم من أيام السنة.....
وبالتحديد في هذا اليوم من أيام الشهر ......
وبالتحديد في هذا اليوم من أيام الأسبوع.......
صباحٌ فيه الجو صحو والسماء ملبده بالغيوم ......والشمس تنشر أشعتها البنفسجية ......على التلال الوردية.....والأزهار السماوية
صباحٌ فيه العصافير تعصفر بكل برائه......والحمام تحمحم بكل فغاره .......والبعارصا تصق تصق بكل خبث
ادري أن هناك مشاعر تكبتونها..... وتخنق كبودكم.......في زمن الانقلاب .......والتفكك الأسري ......وانتعاش البورصة!!!!!!
بعد هذه ألمقدمه نذهب إلى موضوعنا <~~ تسمع بالمقدمة!!
سـ أحدثكم اليوم عن ظاهره اجتماعيه صغيرة في ظاهرها ...كبيرة في داخلها!!
ناعمة الملمس .....حرشة في الحقيه!!
واجهاتها حجر .......ومن جوا طين!!<~~ طين ولا رمل!!<~~ ورا ماتخلصين لابكف <~~ طيب لاتفخين <~~ ورانا أشغال استعجلي<~~ اسمعي وأنتي ساكته ولايكثر<~~ خلاص لا تهاوشون <~~ بررررررب ( وجه يقول تراه موضوع مهب شات)
الظاهرة تكمن " مايمديكم على تكمن متعوب عليها ترى"
قبل ما أكمل كلامي فيه تنويه<~~ مانقدر على تنويه
ترى اسمح لكم تطمرون من هنا إلى أخر سطر!!!!! عادي يعني لاتكلفون على أرواحكم!! اهم شي راحتكم!!!!
هاكم الظاهرة "هاكم متعوب عليها بعنف اكثر من تكمن"
الا وهي القطه وما أدراك مالقطه!!
عزيزتي...
كم مره قطيتي مع السياره اللي جمبكم عند الاشاره؟؟
كم مره قطيتي مع الناس اللي يتهاوشون بالسوق؟؟
كم مره قطيتي مع الناس اللي يتغدون بالبر وانتم مارين من جنبهم؟؟
كم مره قطيتي وبسطتي في موضوع لطالبات المدارس وانتي ماتدرسين؟؟
<~~ كم مره قلنا ورا ماتسكتين
سـ أحدثكم بإجاز عن فنون القطه...
وأعلمكم أصولها من الصفر حتى الاحتراف!!!
التعريف العام للقطه: القطه هنا مهب قطة الاستراحه!!لاء..
القطه هنا المقصود بها حب الاستطلاع<~~ تزينها
أو اقرب نسميها اللقافه
وكما تقول العالمة رفيف اللقافه علم وثقافه<~~ الله يعافيها ولا يبلاناوالقطه يعني تقطين كلك مع الناس يعني تدخلين عصك بشي مايخصك....
أو تقطين بجزء من جسمك وغالبا مايكون الأذن أو العين أو كلهم سوا....
القطه لغوياً: مأخوذه من قط يقطُ وهي مثل جدع و يجدعُ و نطل ينطلُ
وتستعمل كلمة القطه للفلوس التي تجدع في الأرض...
تتساءلون طبعا ليش تجدع
لأنها تطلع من ورا الخشم!!و تجمع لكي يتم شراء عشاء <~~ فقر
أو لدفع إيجار الاستراحه أو أيجار المخيم!!
أو شراء فطور مع الصديقات وهذه لاينصح بها علماء النفس!!
أو دفع إيجار الشاليه وانا هنا أعارض بشده<~~ أعصابك
أصل القطه: القطه في أصلها القديم مقتبسه من القط وهو البس!!قولو وشلون!!
أنا أقولكم حتى لو ماسئلتو...
هذي لها سالفه قديمه تحدث عنها احد المعمرين
وهي انه....منذ قديم الزمان قبل العصر الجاهلي!! في منطقة نائية تدعى سطلان ...
يحكى انه كانت فتاة جميله رقيقه تعيش هناك.... وتدعى جعفره وكانت تحب تربية القطط!!
وأهل هذه المنطقه كان فيهم من البلاغه والشرافه الشيء الكثير...
والبلاغة المقصوده هنا ليست السجع وهالمطاريس..لاء البلاغه هنا بمعنى اللقافه ...
وكانت هذه الفتاة في الصباح الباكر تذهب لعمل رياضه اليوقا خلف الطعس!!
وكانت تشيل معها قططها يعني بساستها!!
واهل القريه اشتغلت لقافتهم!! أي تذهب هذه الفتاة كل صباح!!
لابد وأنها تذهب لأكل الفلافل!أو لشرب البايسن
أو لأكل الاندومي"يارب تديم النعمه"لابد أن نعرف السبب؟؟
واجتمعوا وسوو خطه لمراقبة البنت
وارسلو أم عنتر تراقب البنت!!!وهي تمشي وراها في الفيافي والقفار<~~ حشا وين رايحين!!
أحست الفتاة أن شخصاً ما يسر خلفها...
وفي هذه اللحظة..<~~ نتعب على الاخراج الهندي
التفت البنت....وشافت أم عنتر......
وأطلقت عليها القطه.... وقامت حرب داحس والغبرا!!بين ام عنتر والقطه!!!
وعلكت القطه ام عنتر علكاً شديا!! وبعد ان انتهت من علكها لفظتها!!
وهنا ارتبط مسمى اللقافه بالقطه!!<~~ مقطوعه علشان الوقت
نقطة البدايه: أي جهاز في الجسم مسؤل عن القطه؟؟ هل هو العين؟؟ام الأذن؟؟أم اللسان؟؟
أنا اقولكم..بس ركزوا معي!!
عندما تشعرين برغبة للقطه في موضوع ما
يجب عليك اولا مراقبة الشخص المراد القطوط معه
ثم فأن الخشم يرسل اشارت الى مجلس القطه في المخ....
وهذا المجلس يحتوي على وجار وفله وسعه صدر
يعني كشتات مصغره!!ما أن تصل الاشاره الى مجلس القطه...حتى يرسل موجات متذبذبه الى العضو الذي عليه الدور..
والعضو الذي يتوجب عليه القط!!!! ويذهب هذا العضو إلى القيام بمهمته!!
ويرجع بالأخبار إلى المجلس
ويتفحصون الأخبار ويتنحون فيها!!يعني هي عمليه بسيطه...بس معقده!!
وش العلاقه: اكتشفت من خبرتي في القطه ان فيه علاقه قويه بين قطة العين والاذن!!
قولو وش لووووون؟؟
أنا أعلمكم .....
إذا جدعتي إذنك عند أي شخص..فإن العين تراقب حركات افم الشخص المقطوط معه!!
لكي تستطيع ترجمه حركه الشفايف الى كلمات!!
مثلا...
مره كنا بالشرقيه قاعدين على البحر<~~ بشري امتس
وتعرفون جو البحر والامواج والتراب والحر يهيض على السواليف !!!!
وكانت مرة عمي كانت تسولف مع امي بشويش!!
وانا ما اقدر لازم اسمع السالفه المهم واقرب لهم واجدع أذني عندهم...
وعيوني مركزتها على مرة عمي... ومتحمسه وخاشه جو!!!!!!
جت بنت عمي مثل ابليس قالت بصوت عالي........التسمّع بالاذن مهب بالعيون!!!
طبعا انتبهو اني قاطه معهم!!! وناظروني نظره!! مدري وشي بس شكلها احترام!!
وقطعو سالفتهم!!
و تحسبونه طاح وجهي!! لا حشا وكلا
بس اللي زعلني مرة عمي ماكملت السالفه!!المشكله إني مع كل هالقطه ماقظبت طرف علم
ولا ادري وش يحكون عنه <~~ مشكلة الفهاوهالفوائد لاجتماعيه: القطه لها فوائد عديده...منها انك تتعرفين على المجتمع الأخر!!!
وذالك عن طريق القطه معهم خاصه في السوق!!
-رحنا ذيك اليوم لغرناطه ..... وانا واقفتن عند الدرج ابرقى ويجي فوج شوام مع حريمهم
ووقفو عند الدرج هم وبزرانهم.... ويتوعدهم ابوهم..
اللي فهمت من كلامه انه بيضربهم بالحزام<~~ مهب عاقل!!
الصراحه أول مره اشوف اجانب يهاوشون بزرانهم!!
حتى كلامهم مثل المعلم عمر اللي بليالي الصالحيه!!
ووشو الحزام الي بيضربون به!! تحرونه معهم بالشنطه<~~ تنكه
طبعا كل هالهواجيس وانا عند الدرج!! واهلي رقو وخافنهم تغدو وانا قاطتن مع ذولا!!
ويوم اسكتو انبهت انهم واقفين يحتروني ارقى علشان يرقون<~~ مسويه زحمه
- مره رحت لكارفور مهنا شين ضروري يعني ... رايحتن ابشتري موية ورد <~~ الفراغ يؤدي الى المخدرات
درت درت ردت مالقيت النوع اللي ابيه ..... وش اقعد اسوي ؟؟
واخوي اللي جايبني وراح شوي على قولته!!
عاد قعدت ادور واتفرج على اغراض خلق الله!! تصدقون واحد شاري كرتون كتشب!!
شكله مثل الما عندهم
بغيت اقوله لاتنتهي مدته بس وانتم ما اكلتوه!!طيب اشتر بالحبه واذا خلص جب ثاني!!
وشوله القلق والزحمه<~~ وش دخلك!!
وفيه رجل وزوجته واقفين عند الكوسه ..تصدقون أنهم يشترون بالعدد!!
قالها خوذي زياده....قالت لاءبسوي صينه وحده!!
شكلهم ذولا يشرون الخضار كل يوم بيومه<~~ نحتتهم
تخيلت إننا نروح حنا وابوي وناقف عند الباذنجان!!
تخيلو اسأل ابوي كم حبه ناخذ!!
الفوائد الدينيه: كل شي له فائده بالحياة ...حتى القطه!!
انك اذا شفتي ناس مبتلين..تحمديين ربك على العافيه...
امس كان عندي اختبار!! أنا كنت في المعمل أذاكر في أمان الله..
ودخلت وحده من الطالبات!! يوم دخلت وتطير عيوني... واتنح بلبسها
انهبلن البنات وقعدن!!
لابستن عباة مفتوحه..يعني ماتنصك!!...اصلا ماتقدر تجمعها!!
خلو العباة!!
لابسه بلوزه اقرب مايقال عنها انها مفصخه!! صدرها كله طالع!! وبدون اكمام!!
يقالك كشخه يعني!! طيب برد ياجحا!!
خلو البلوزه !!
لابسه بنطلون ما ادري وشلون مدخلته!!
ما ادري هل هو مايطلع!! يعني مخيوط على الجسم الى الممات!!!
المشكله انه جينز ثقيل!! طيب وشلون دخلته؟؟
تحرونها داهنتن رجولها بفازلين علشان يدخل!!
خلو اللبس!!
المشكله انها تناظرك يعنني كشخه ومحد قدي!!!
ترى كل الناس تقدر تفصخ <~~ تحسونها حاقده
وقسم اني كارهه الدراسه من لبسهم<~~ طيب لاتصيحين
الحمد لله بس اللي عافانا مما ابتلاهم فيه...
"كاني طلعت عن الموضوع"
الى هنا ونقف.<~~ حامت كبدها تذكرت البنات.
انتهى درس اليوم
هذا كل مالدينا اليوم عن القطه وفنونها للمبتدئات
الدرس الجاي عن تفسير معاني كلمة بقريح وابو زنه
منهو قريح!! ولماذا نقول طس بقريح!!
تابعونا<~~ لايكثر هرجتس بس
وللاستزاده...الرجوع للمراجع التاليه :
كتاب:النطه في فنون القطه ~~~~> للكاتبه نبيطه
كتاب: كم القطه ~~~~~> للكاتبه مفلسه
كتاب: قطي بس لاتبسطين~~~~~> للكاتبه قاطه مع المريخ
ــــــــــــــــــــــــــــ
♣ محجوووووووز <~~ هذي للنسخ واللصق خابرتن فيكم شفاحه حجز
♣اللي ماجازلها اللون أو ماتشوف منه!!! تسوي رايت كليك تحديد الكل<~~ قضيه طيب غيري هاللون
♣ ترى متعوب على اللغه الفصحى اللي في الموضوع<~~ ضفي وجهتس الله يرحم والديك
♣ ومازالت مشكلة المقدمه موجوده!!!!
® ® خارج الموضوع ® ®
قَطَعْتَ شُهورَ العـامِ لهـواً وغـــــفلةً *** ولم تحترم فيمــــا أتَيْتَ المُحَرَّمــــــــا
فلا رجَبـــــــــاً وافَيْــــــتَ فـيه بِحَقِّـهِ *** ولا صُمتَ شهر الصوم صوماً مُتَمَّما
ولا في ليالي عشرِ ذي الحجةِ الذي *** مضى كُنْتَ قَوَّامـــاً ولا كُـــنْتَ مُحْرِما
فَهَل لك أن تمحو الذُّنـــــــوب بِعَبرةٍ *** وتبكي عليهـــــا حســـــرةً وتنَدُّمــــــا
وتستقبلَ العـــــــــــــامَ الجديدَ بِتَوبةٍ *** لعلَّك أن تمــحو بهـا مـــــــا تَقَدَّمـــــا
عَنْ أَبِي هُرَيْرَةَ رضي الله عنه قَالَ: قَالَ رَسُولُ اللَّهِ صلى الله عليه وسلم : « أفضل الصيام بعد رمضان شهر الله المحرَّم. وأفضل الصَّلاة بعد الفريضة، صلاة الليل»رواه مسلم