القــــــــاعـــــــدة الـــــــجائرة

السلام عليكم و رحمة الله وبركاته
فيه موضوع من أول و انا ودي أقوله لأحد و أنا بأقولكم إياه
ومستعدة أتقبل آرائكم بكل رحابة صدرومهما كان نبقى أخوات
ويبقى كلامي مجرد وجهة نظر لا أقل و لا أكثر ..
هذي طال عمركم قاعدة دايم الناس يرددونها
و لا أدري على أي أساس يقولونها ..
وهي الخير يخص والشر يعم
يعني تلاقين معلمة داخلة ذاك اليوم الفصل
وهي مالها خلق ونفسها في طرف خشمها
وتلاقي ثلاث او خمس بنات مشاغبين
و لا طالعين برا تقوم تفش غلها بباقي البنات
و تقول : خـــــــــــــــــــــــــــــــير يا فصل ...........
والله إنكم صايرين قليلين ادب وماتستحون عقابا لكم
اليوم ما راح أشرح الدرس و إذا كلموها البنات سكتتهم
و إذا طلعوا و كلموها برا الفصل و قالوا طيب اشرحيلنا بلحالنا
قالت : لا يا حبيباتي ما سمعتواإن الخير يخص والشر يعم !!!
ياأختي كان قلتي من اول : اليوم مالي خلق اشرح الدرس نؤجله لبكرة
وعاقبتي البنات الي غلطوا وش ذنب الباقين مساكين ؟؟!!

ولا تلاقين حرمة رجلها معيي يوديها لجمعة أهلها
تكلم أختها تقول : شفت فلان حسبي الله عليه من الصبح و أنا أكرف وأطبخ
و آخر شي يعيي يوديني ما يقدر .. إهئ .. إهئ .. إهئ ..:44:
تقوم أختها يقالها تصبرها ، وتقول : ياعمري هوني عليك كل الرجال كذا
ما عندهم أحاسيس ولا مشاعير ..
طيب ليه كلمة ( كل الرجال ) ياشاطرة إذا أختك رفض رجلها يوديها
فيه ألف رجال غيره بيوافق .. ولا لأ ؟؟!!

ولا تدخل طالبة ذاك اليوم للفصل خانقتها العبرة:21: لأن المعلمة خاسفة درجاتها
وتقول لزميلاتها : حسبي الله على هالمعلمات الله ياخذهم والله إنهم ظالمات
و ........... و ............. و......... وتقعد تغتاب بهالمعلمات
وياخذون حسناتها عشان ذنب معلمة وحدة !!!

وتشوفين جمعة شياب و فيه شايب يحكي يقول : حسبي الله على شباب
هالزمن ماغير تسعسع و تمشي بهالأسواق و وما يرجعون إلا الفجر
وينامون نومة أهل الكهف
ما يقومون إلا الليل لا صلاة ولا شي و لاهم معطينك خيرهم و لا كافينك شرهم ...
طيب هالشايب مسيكين مكتوي من ولده .. طلعوا كل شباب هالزمن مثل هالولد ؟؟!!!
لا طبعا لو إنهم كذا كان ما فيه أحد تزوج ولا جاب عيال ولا صار فيه مشايخ
ولا مجاهدين ولا رجال أعمال ولا شي ...

طبعا حنا أكيد ماراح نغير قاعدة مشوا عليها الناس كل عمرهم
بس يكفي نعلمهم إنها غالبا تكون خطأ ..
وأنا أتمنى أعرف على أي أساس بنوها !!!
وهذي من وجهة نظري قاعدة ظالمة وخاطئة ويكفيها من الخطأ
إنها تخالف قوله تعالى (ولا تزر وازرة وزر أخرى )